சிவகங்கை மாவட்டம் கும்பங்குடி பாலம் அருகே இரண்டு அரசு பேருந்துகள் நேருக்கு நேராக மோதிய பயங்கர விபத்தில் 11 பேர் பரிதாபமாக பலியாகினர்.
காரைக்குடி நோக்கி சென்ற அரசுப் பேருந்தும் மதுரை நோக்கி சென்ற அரசுப் பேருந்தும் சிவகங்கை கும்பங்குடி பாலத்தில் நேருக்கு நேராக மோதி பயங்கர விபத்து ஏற்பட்டது. இந்த விபத்தில் ஓட்டுநர், 9 பெண்கள் உட்பட மொத்தம் 11 பேர் பரிதாபமாக உயிரிழந்தனர்.
இந்த விபத்து நடந்த இடத்தில் மீட்பு பணிகள் மேற்கொள்ளப்பட்டு பலர் படுகாயமடைந்த நிலையில் மருத்துவமனைகளில் அனுமதிக்கப்பட்டுள்ளனர். அண்மையில் தென்காசி அருகே 2 பேருந்துகள் மோதியதில் 7 பேர் உயிரிழந்தது குறிப்பிடத்தக்கது.
சிவகங்கை விபத்து தொடர்பாக முதல்வர் ஸ்டாலின் தமது எக்ஸ் பக்கத்தில், “சிவகங்கை மாவட்டம் திருப்பத்தூர் அருகே நிகழ்ந்த விபத்தில் 11 பேர் உயிரிழந்துள்ளனர் என்ற துயரச் செய்தியறிந்ததும் மிகுந்த அதிர்ச்சிக்கும் வேதனைக்கும் உள்ளானேன். உடனடியாக மாவட்ட ஆட்சியரையும் மாவட்டப் பொறுப்பு அமைச்சர் கே.ஆர்.பெரியகருப்பனை தொடர்புகொண்டு, சம்பவ இடத்திற்கு விரைந்து சென்று பாதிக்கப்பட்டுள்ளவர்களுக்கு உரிய உயர்தர சிகிச்சை கிடைப்பதை உறுதிசெய்திடுமாறு அறிவுறுத்தியுள்ளேன். இவ்விபத்தில் உயிரிழந்தவர்களுக்கு ஆழ்ந்த இரங்கலைத் தெரிவித்துக் கொள்வதோடு, காயமடைந்துள்ளவர்கள் விரைந்து நலம்பெற விழைகிறேன்” என பதிவிட்டுள்ளார்.