தொகுதி மறுவரையறை… தென்மாநிலங்களுக்கான அநீதி – அமித் ஷாவுக்கு சித்தராமையா கண்டனம்!

பாஜகவை எதிர்க்கும் தென் மாநில மக்களை தண்டிக்கும் ஆயுதமாக தொகுதி மறுவரையறையை பிரதமர் மோடி பயன்படுத்துகிறார். இதுதொடர்பாக உள்துறை அமைச்சர் அமித் ஷா அளித்துள்ள வாக்குறுதி நம்பகத்தன்மையற்றது என கர்நாடக முதல்வர் சித்தராமையா விமர்சித்துள்ளார். siddharamaiya condemns amit shah on delimitation

கடந்த 26 ஆம் தேதி கோவையில் பாஜக அலுவலகத்தை திறந்து வைத்து பேசிய மத்திய உள்துறை அமைச்சர் அமித் ஷா, ”தொகுதி மறுசீரமைப்பில் எந்த தென்னிந்திய மாநிலத்திலும் தொகுதிகள் குறையாது, கூடுதலாகத்தான் சேரும் என்று நாடாளுமன்றத்திலேயே பிரதமர் மோடி தெரிவித்திருக்கிறார். தொகுதி மறுசீரமைப்பு விகிதாச்சாரம் அடிப்படையில் ஒதுக்கப்படும் என்றும்,

இதுதொடர்பாக தமிழக மக்களுக்கு ஸ்டாலின் பொய்யை சொல்லி துரோகம் செய்கிறார்.  புதிய பிரச்சினையாக அதை உருவாக்கி, இதற்காக அனைத்துக் கட்சி கூட்டத்தை நடத்தவிருக்கிறார் என்று விமர்சித்தார்.

இந்த நிலையில், அமித் ஷாவின் இந்தக் கருத்து தொடர்பாக கர்நாடகா முதல்வர் சித்தராமையா அறிக்கை வெளியிட்டுள்ளார்.

அமித் ஷா தவறாக வழிநடத்துகிறார்! siddharamaiya condemns amit shah on delimitation

அதில் “தொகுதிகள் மறுவரையறையின் போது தென் மாநிலங்களுக்கு அநீதி இழைக்க அனுமதிக்க மாட்டோம் என்ற மத்திய உள்துறை அமைச்சர் அமித் ஷாவின் உறுதிமொழி நம்பகத்தன்மையற்றது. தவறாக வழிநடத்தக் கூடியது. துல்லியமான தகவல் இல்லாமல் கர்நாடகா, தெலுங்கானா, தமிழ்நாடு, கேரளா மற்றும் ஆந்திரா ஆகிய தென் மாநிலங்களில் குழப்பத்தை ஏற்படுத்தும் தீங்கிழைக்கும் நோக்கம் கொண்டதாக அவரது பேச்சு உள்ளது என்பதைப் புரிந்து கொள்ளலாம்.

தென் மாநிலங்களுக்கு அநீதி இழைக்கக்கூடாது என்ற நல்ல எண்ணம் மத்திய அரசுக்கு இருந்தால், மக்கள்தொகை விகிதத்தின் அடிப்படையில் தொகுதி மறுவரையறை செய்ய வேண்டுமா அல்லது தற்போதைய மக்களவை உறுப்பினர்களின் எண்ணிக்கையின் விகிதத்தில் அது செய்யப்படுமா? உள்துறை அமைச்சர் முக்கிய கேள்விக்கு பதிலளிக்க வேண்டும்.

கடந்த 50 ஆண்டுகளில், தென் மாநிலங்கள் மக்கள்தொகையை பயனுள்ள நடவடிக்கைகள் மூலம் கட்டுப்படுத்தியது மட்டுமல்லாமல், வளர்ச்சிப் பாதையிலும் முன்னேறி வருகின்றன. அதே நேரத்தில், உத்தரப் பிரதேசம், பீகார், மத்தியப் பிரதேசம் போன்ற வட மாநிலங்கள் மக்கள்தொகை கட்டுப்பாட்டில் முற்றிலும் தோல்வியடைந்தது மட்டுமல்லாமல், வளர்ச்சிப் பாதையில் இன்னும் தடுமாறி வருகின்றன.

எனவே, சமீபத்திய மக்கள் தொகை கணக்கெடுப்பிலிருந்து பெறப்பட்ட மக்கள்தொகை விகிதத்தின் அடிப்படையில் இடங்களை மறுவரையறை செய்தால், மக்கள்தொகை கட்டுப்பாட்டைக் கொண்ட கர்நாடகா உள்ளிட்ட தென் மாநிலங்களில் உள்ள மக்களவை இடங்களின் எண்ணிக்கை குறையும். அதிகம் பாதிக்கப்படும் என்பது உள்துறை அமைச்சர் அமித் ஷாக்குத் தெரியாதா?

அநீதியை பொறுத்துக்கொள்ள முடியாது! siddharamaiya condemns amit shah on delimitation

தொகுதி நிர்ணய விளைவுகள் குறித்து பல ஆய்வுகள் நடத்தப்பட்டுள்ளன. அவர்களின் கூற்றுப்படி, சமீபத்திய மக்கள் தொகை கணக்கெடுப்பின் அடிப்படையில் மட்டுமே எல்லை நிர்ணயம் செய்யப்பட்டால், கர்நாடகாவில் மக்களவை இடங்களின் எண்ணிக்கை 28 இல் இருந்து 26 ஆகக் குறையும் வாய்ப்பு உள்ளது. அதேபோல், ஆந்திராவில் மக்களவை இடங்களின் எண்ணிக்கை 42 இல் இருந்து 34 ஆகவும், கேரளாவில் 20 இல் இருந்து 12 ஆகவும், தமிழ்நாட்டில் 39 இல் இருந்து 31 ஆகவும் குறையும்.

அதே நேரத்தில், உத்தரபிரதேசத்தில் மக்களவை இடங்களின் எண்ணிக்கை 80 இல் இருந்து 91 ஆகவும், பீகாரில் 40 இல் இருந்து 50 ஆகவும், மத்தியப் பிரதேசத்தில் 29 இல் இருந்து 33 ஆகவும் அதிகரிக்கும். இதை அநீதி என்று சொல்லாமல் நீதி என்று சொல்ல முடியுமா? இந்த அநீதியை பொறுத்துக்கொள்ள முடியாது.

தொகுதி மறுவரையறை கர்நாடகா உள்ளிட்ட தென் மாநிலங்களுக்கு அநீதியை ஏற்படுத்தவில்லை என்றால், 1971 மக்கள் தொகை கணக்கெடுப்பை அடிப்படையாகப் பயன்படுத்த வேண்டும். இல்லையெனில், மக்கள் தொகை அளவுகோலைக் கைவிட்டு, தற்போதைய மக்களவைத் தொகுதிகளின் எண்ணிக்கையை விகிதாசாரமாக அதிகரிக்க வேண்டும்.

பாஜக எதிர்ப்பு குரலை ஒடுக்கும் முயற்சி! siddharamaiya condemns amit shah on delimitation

தொகுதி மறுசீரமைப்பில் பிரதமர் மோடி தலைமையிலான மத்திய அரசு காட்டும் ஆர்வம், பாஜகவை எதிர்க்கும் தென் மாநில மக்களை தண்டிக்கும் ஒரு தீய நோக்கமாகத் தெரிகிறது.

பாஜக தேசிய தலைவர் ஜே.பி நட்டா, சட்டமன்றத் தேர்தல் பிரச்சாரத்தின் போது, ”கர்நாடக மக்கள் பாஜகவை ஆதரிக்கவில்லை என்றால், மாநிலத்திற்கு நரேந்திர மோடியின் ஆசிர்வாதம் இருக்காது” என்று வழங்கிய எச்சரிக்கை, நமது மாநிலத்திற்கு எதிராக மத்திய அரசு எடுக்கும் ஒவ்வொரு நடவடிக்கையிலும் உண்மையாகி வருகிறது.

வரி பகிர்வில் உள்ள அநீதி, ஜிஎஸ்டி மற்றும் இயற்கை பேரிடர் நிவாரணம், மாநிலத்திற்கு முட்களாக இருக்கும் புதிய கல்விக் கொள்கை மற்றும் யுஜிசி விதிமுறைகளில் திருத்தம் உள்ளிட்ட மத்திய அரசின் ஒவ்வொரு நடவடிக்கையும், மாநிலத்தை தண்டிக்கும் தீய நோக்கம் அப்பட்டமாக தெளிவாகி வருகிறது.

தேசிய அளவில் இந்த அநீதிகளுக்கு எதிராக தென் மாநிலங்கள் குரல் எழுப்புவதைத் தடுக்க, நாடாளுமன்றத்தில் அவர்களின் குரலை மேலும் பலவீனப்படுத்தும் முயற்சியாக தான் மத்தியில் உள்ள பாஜக அரசு இப்போது தொகுதி மறுசீரமைப்பு என்ற புதிய ஆயுதத்தை கையில் எடுத்துள்ளது.

அண்டை மாநிலங்களுடன் சேர்ந்து போராட்டம்! siddharamaiya condemns amit shah on delimitation

கர்நாடகாவுக்கு இழைக்கப்படும் இத்தகைய தொடர் அநீதிகளைக் கண்டாலும், மாநிலத்திலிருந்து மக்களவைக்குத் தேர்ந்தெடுக்கப்பட்ட பதினேழு பாஜக மற்றும் இரண்டு ஜேடிஎஸ் உறுப்பினர்கள் வாயை மூடிக்கொண்டு அடிமைகளைப் போல அமர்ந்திருக்கிறார்கள்.

மாநிலத்தின் பாஜக
தலைவர்கள் தெரு சண்டைகளில் மும்முரமாக உள்ளனர், ஒருவருக்கொருவர் சேற்றை வீசுகிறார்கள்.

இத்தகைய சூழ்நிலையில், அனைத்து கன்னடர்களும், சாதி, மதம், கட்சி மற்றும் பிரிவு வேறுபாடுகளை மறந்து, மத்திய அரசால் மாநிலத்திற்கு இழைக்கப்படும் அநீதிக்கு எதிராக குரல் எழுப்ப வேண்டும். இந்த அநீதிக்கு எதிராக விரிவான போராட்டத்தை நடத்த அண்டை தென் மாநிலங்களுடனும் பேச்சுவார்த்தை நடத்தப்பட்டு வருகிறது. வரும் நாட்களில், அநீதியை எதிர்கொள்ளும் அனைத்து மாநிலங்களுடனும் ஒரு ஒழுங்கமைக்கப்பட்ட போராட்டம் நடத்தப்படும்” என கர்நாடகா முதல்வர் சித்தராமையா தெரிவித்துள்ளார்.