டிஜிட்டல் திண்ணை: ‘செங்ஸ்’ புது இன்னிங்ஸ் ஆரம்பம்.. விஜய் தலைமையில் ‘மெகா கூட்டணி’- பாஜக அதிர்ச்சி!

வைஃபை ஆன் செய்ததும், ”உச்சகட்ட காட்சி நடக்குதம்மா…” என பாடியபடியே டைப் செய்ய தொடங்கியது வாட்ஸ் அப்.

என்னய்யா ‘சோகமா’? அல்லது ‘கிண்டலா’?

நமக்கு என்னய்யா.. சோகம், கிண்டல்.. நாட்டு நடப்பை சொன்னேன்..

ஆஹா ஏதோ பெரிசாக சொல்லப் போறீர்… ஆரம்பிச்சு விடுங்க..

அதிமுகவுல இருந்து வெளியேற்றப்பட்ட செங்கோட்டையன் ஏரியாவான கோபிசெட்டிபாளையத்தில் இபிஎஸ் நவம்பர் 30ஆம் தேதி பிரசாரம் செய்யப் போறாரு. இதுக்காக ஜரூரான ஏற்பாடு நடக்குது.

நம்ம கோட்டைக்கு வரப் போற இபிஎஸ்க்கு ஷாக் கொடுக்கனும்னுதான், நவம்பர் 27ஆம் தேதி விஜய் முன்னிலையில் தவெகவில் இணைய செங்கோட்டையன் முடிவெடுத்திருக்கிறாரு.. இதுபற்றி நேற்று நாமதான் முதல்ல சொன்னோம் இல்லையா?

ஆமாம்.. அதுல என்ன டெவலப்மெண்ட்..

இதுபற்றி செங்கோட்டையனுக்கு நெருக்கமானவங்க கிட்ட பேசுனப்ப, “பாஜக க்ரீன் சிக்னல் கொடுத்ததாலதானே இபிஎஸ்-க்கு எதிரா பேசுனாரு அண்ணன்.. ஆனால் பாஜக இப்ப சுத்தமாக கண்டுக்கலையே.. இதுல அண்ணனுக்கு ரொம்பவே வருத்தம்..

சென்னை எம்.ஆர்.சி. நகரில்தான நிர்மலா சீதாராமனை அண்ணன் சந்திச்சு பேசியிருந்தாரு.. அப்ப எல்லாம் ஆதரிச்சாங்க.. இப்ப இபிஎஸ் கட்சியை விட்டே நீக்கிட்டாரு.. ஆனா பாஜக கண்டுக்கல.. அதனாலதான் விஜய் கட்சியில இணையுறதுன்னு முடிவெடுத்துவிட்டாருன்னு” சொல்றாங்க..

பாஜக தரப்புல விசாரிச்சா, “செங்கோட்டையனை எங்க தலைவர்கள் சந்திச்சாங்க.. பேசுனாங்கன்னு எல்லோருக்கும் தெரிஞ்சதுதான்.. ஆனால் செங்கோட்டையன் கேட்டது ரொம்ப பெரிய விஷயமாச்சே.. அதிமுகவையே அவருகிட்ட ஒப்படைக்கனும்னு எதிர்பார்த்தாரு.. இபிஎஸ்-க்கு பதிலா அவரை பொதுச்செயலாளராக்கனும்னு விரும்புனாரு.. அதை எல்லாம் எப்படி செஞ்சுட முடியும்?” என்கின்றனர்.

தவெகவில் விஜய்க்கு நெருக்கமானவர்களிடம் செங்கோட்டையன் பற்றி நாம் கேட்ட போது, “தவெகவுல சேருவது பற்றி புஸ்ஸி ஆனந்த், ஆதவ் அர்ஜூனா, ஜான் ஆரோக்கியசாமின்னு எல்லாருகிட்டயும் செங்கோட்டையன் பேசிகிட்டுதான் இருந்தாரு.. அவங்களும் தளபதி கிட்ட போய், செங்கோட்டையனோட விருப்பத்தை சொன்னாங்க..

அப்படியே, கொங்கு பெல்ட்டில செங்கோட்டையன் நம்ம கூட இருக்கிறது ரொம்ப பலமா இருக்கும்.. இதே ஜோருல ஒவ்வொரு ஜோனில் இருந்தும் முக்கியமான ஆட்களை நம்ம கட்சியில சேர்க்க ஆரம்பிச்சுடலாம்.. எலக்‌ஷனுக்கு ஹெல்ப்பா இருக்கும் என்றும் தளபதி கிட்ட சொன்னாங்க.. அவரும் சரி.. யார் யார் சேருவாங்கன்னு பாருங்க.. கட்சியில இணைய சொல்லிடலாம்னு ஓகே சொல்லிட்டாரு.. இப்ப யார் யாரெல்லாம் தவெகவுக்கு வரப் போறாங்கன்னு லிஸ்ட் ரெடி செஞ்சுட்டு பேசிகிட்டு இருக்காங்க..

அதேபோல, தவெகவுல சேருகிற செங்கோட்டையனுக்கு என்ன பொறுப்பு கொடுக்கிறதுன்னும் ஒரு பேச்சு வந்தது.. அதிமுகவுல இருந்து செங்கோட்டையனை இபிஎஸ் நீக்குனப்ப.. பெரிய அளவுக்கு எம்.எல்.ஏ.க்கள், எம்.பி.க்கள் யாரும் அவரு பின்னாடி வரல.. கோபிசெட்டிபாளையம் லோக்கல் நிர்வாகிகள்தான் அவருக்கு சப்போர்ட்.. இதை எல்லாம் கால்குலேஷன் போட்டுதான் செங்கோட்டையனுக்கு பொறுப்பு கொடுப்பாங்க” என்றனர்.

ரொம்பவே பரபரப்பா இருக்கே..

பொறுமய்யா.. இபிஎஸ்க்கு எதிராக பேச தொடங்குன செங்கோட்டையன் ரொம்ப கவனமாக சசிகலா, டிடிவி தினகரன், ஓபிஎஸ் கூட கை கோர்த்து கிட்டாரு.. பசும்பொன்னில் முத்துராமலிங்க தேவர் ஜெயந்திக்குப் போனப்ப ஓபிஎஸ்ஸுடன் ஒரே காரில் பயணம், ஓபிஎஸ்ஸுடன் இணைந்த கைகளாக ரோடு ஷோ எல்லாம் நடத்தினாங்க.. சசிகலா, டிடிவி தினகரன், ஓபிஎஸ்னு எல்லாருடனும் பேசினாரு செங்கோட்டையன்.

இப்ப தவெகவுக்கு தாவப் போற செங்கோட்டையன் அங்க போன உடனே முதல் வேலையாக செய்யப் போறதே ஓபிஎஸ், டிடிவி தினகரனை விஜய் தலைமையிலான கூட்டணிக்குள் இழுக்கிறதுதானாம்.. அது பற்றியும் ரொம்ப சீரியசாகவே பேச்சுவார்த்தை ஒரு பக்கம் நடந்துகிட்டே இருக்கிறதாம்..

அடடே செம்ம ஸ்கெட்சா இருக்கே..

நாளையில இருந்துதான் செங்கோட்டையனின் புது இன்னிங்ஸ் தொடங்கப் போகுது.. ஓபிஎஸ் கோஷ்டியில் இருந்து திமுகவுக்கு மனோஜ் பாண்டியன் தாவுனப்ப எம்.எல்.ஏ. பதவியை ராஜினாமா செஞ்சாரு இல்லையா.. அதே மாதிரி செங்கோட்டையன் நவம்பர் 26-ந் தேதி தமது எம்.எல்.ஏ. பதவியை ராஜினாமா செய்யப் போறாரு..

ஓஹோ..

தவெகவுக்கு தாவப் போறது பற்றி செங்கோட்டையனுக்கு நெருக்கமானவர்களிடம் நாம் பேசினால், ஆம் என்றோ இல்லை என்றோ சொல்லாமல் மவுனமாக இருக்கின்றனர்.

செங்கோட்டையனின் இந்த மூவ், டெல்லி பாஜக தலைவர்களை ரொம்பவே அதிர்ச்சி அடைய வைச்சிருக்காம்.. இதனால செங்கோட்டையனை எப்படியாவது தடுத்து நிறுத்த ரொம்பவே மெனக்கெட்டு பேச்சுவார்த்தை நடத்திகிட்டே இருக்குது டெல்லி என டைப் செய்தபடியே சென்ட் பட்டனை தட்டிவிட்டு ஆப் லைனுக்கு போனது வாட்ஸ் அப்.