’வொய் திஸ் கொலவெறி’, ‘வேணாம் மச்சான் வேணாம் இந்த பொண்ணுங்க காதலு’, ’இந்த பொண்ணுங்களே இப்படித்தான்’ என்று தமிழில் வெளியான ‘சூப் சாங்’ பட்டியல் மிகப்பெரியது. rashmika stunned with her simple moves in kuberaa
அதென்ன ‘சூப் சாங்’? வேறொன்றுமில்லை, ‘காதல் கசக்குதய்யா’ பாணியில் மது போதையில் பாடக் கூடியது. அதில் சோகத்திற்குப் பதிலாக மகிழ்ச்சி மிகுதியாகத் தெரியும். ‘நான் தோத்து போயிட்டேன்’ என்று சிரித்தவாறே சொல்வதற்கு ஈடானதாக அது அமைந்திருக்கும். சுருக்கமாகச் சொன்னால், காதல் தோல்வியில் சோகத்தில் தோய்வதற்குப் பதிலாக அதனைக் கொண்டாடுவது எனலாம்.
’அப்படிப்பட்ட ‘சூப் சாங்’ ஆண்களுக்கு மட்டும்தானா, பெண்களுக்குக் கிடையாதா’ என்று உங்களில் சிலர் கேட்பது புரிகிறது. அவர்களுக்காகவே, இயக்குனர் சேகர் கம்முலாவின் ‘குபேரா’ படத்திற்காக ‘பிப்பி பிப்பி டும் டும்’ பாடலைத் தந்திருக்கிறார் இசையமைப்பாளர் தேவிஸ்ரீ பிரசாத்.
மும்பையில் நடந்த இப்பாடல் வெளியீட்டு விழாவில் படத்தில் நடித்த தனுஷ், நாகார்ஜுனா, ராஷ்மிகா, ஜிம் சரஃப், தலிப் தஹில் உள்ளிட்ட பலர் கலந்துகொண்டனர். அதில் ‘பிப்பி பிப்பி’ பாடலும் திரையிடப்பட்டது.
அந்நிகழ்ச்சியில் பேசிய ராஷ்மிகா, ‘இந்த பாடல் காதலில் தோல்வியடைந்த ஒரு பெண் கொண்டாட்ட மனநிலையில் பாடுவது’ என்று தெரிவித்திருக்கிறார். ’இதயம் உடைந்த நிலையில் ஆண்கள்தான் காதல் தோல்வியைப் பாடலில் சொல்வார்களா, பெண்கள் நாங்கள் சொல்லக் கூடாதா’ என்ற தொனியில் அத்தகவலைப் பகிர்ந்தார். ’காதல் தோல்வியில் இதயம் உடைந்ததை மகிழ்ச்சியோடு நோக்குகிற ஒரு பெண்ணின் பார்வையை இதில் நீங்கள் காணலாம்’ என்று ரசிகர்கள் ரசிகைகளிடம் விளக்கம் தந்தார்.
கூடவே, இதனை அடிக்கடி ’இன்ஸ்டாரீல்ஸ்’ஸில் பார்க்க வேண்டும் என்றும் ‘அன்புக்கட்டளை’ இட்டிருக்கிறார்.
பாடலைக் கேட்டபிறகு, ‘சூப் கூட குடிக்காம பாடுற இந்த பாட்டு எப்படி சூப் சாங்ல சேரும்’ என்று கேட்கக் கூடாது.
இந்த நிகழ்ச்சியில் தனுஷின் நடிப்பு பற்றி தொகுப்பாளினி கேள்வி கேட்டார். அதற்கு, ‘அவருடன் பணியாற்றும்போது கூடுதலாக 10 மடங்கல்ல நூறு மடங்கு உழைத்தால், அவரது நடிப்பில் 10 சதவிகிதம் வரை எட்ட முயற்சிக்கலாம். அப்படித்தானே சார்’ என்று தனுஷைப் பார்த்துக் கேட்க, அவர் வெட்கத்துடன் ‘இல்லை’ என்று மறுத்தார்.
