“ஒரே பரீட்சைன்னு நினைச்சுடாதீங்க… இனிமேல் ‘ரெண்டு’ ரவுண்டு! புதுச்சேரி அரசு தேர்வில் புதிய அதிரடி மாற்றம்!”

“குரூப்-4 தேர்வு மாதிரி ஒரே ஒரு எக்ஸாம் எழுதிட்டு, நேரா வேலைக்கு போயிடலாம்னு நினைச்சா… அந்த காலம் எல்லாம் மலையேறிப் போச்சு பாஸ்!” புதுச்சேரி அரசுப் பணியாளர் மற்றும் நிர்வாகச் சீர்திருத்தத் துறை (DPAR) தற்போது எடுத்துவரும் புதிய நடவடிக்கைகளைப் பார்த்தால், “திறமை இருக்கிறவன் மட்டும் உள்ளே வா” என்று சொல்வது போல் தெரிகிறது.

புதுச்சேரியில் புதிதாக அறிவிக்கப்படும் ‘குரூப் பி’ (Group B) மற்றும் ‘குரூப் சி’ (Group C) உள்ளிட்ட முக்கிய அரசுப் பணிகளுக்கு, இனி இரண்டு கட்டங்களாகத் தேர்வுகள் நடத்தப்படும் என்ற புதிய முறை (Two-Tier System) நடைமுறைக்கு வந்துள்ளது. இது குறித்துத் தேர்வர்கள் கட்டாயம் தெரிந்து கொள்ள வேண்டிய விஷயங்கள் இதோ.

ஏன் இந்த மாற்றம்? சாதாரணமாக ஒரு அரசு வேலைக்கு அறிவிப்பு வந்தாலே, ஆயிரக்கணக்கில் விண்ணப்பங்கள் குவிகின்றன. அனைவரையும் ஒரே ஒரு தேர்வை வைத்து மட்டும் தரம் பிரிப்பது கடினமாக இருக்கிறது. மேலும், எஸ்.எஸ்.சி (SSC) பாணியில் தரமான அதிகாரிகளைத் தேர்ந்தெடுக்கப் புதுச்சேரி அரசு விரும்புகிறது. இதற்காகவே பிரத்யேகமாக ‘Puducherry Examining Authority’ (PEA) என்ற அமைப்பும் உருவாக்கப்பட்டுள்ளது.

இரண்டு கட்டங்கள் என்ன? குறிப்பாக உதவியாளர் (Assistant), யூடிசி (UDC) மற்றும் உயர் ரகப் பதவிகளுக்கு இந்த முறை பின்பற்றப்படுகிறது.

• முதல் நிலைத் தேர்வு (Tier-I / Preliminary): இது ஒரு ‘வடிகட்டி’ (Screening Test) மட்டுமே. இதில் பொது அறிவு, கணிதம், ரீசனிங் கேள்விகள் இருக்கும். இதில் தேர்ச்சி பெற்றால் தான் அடுத்த கட்டத்திற்குச் செல்ல முடியும்.
• முதன்மைத் தேர்வு (Tier-II / Main Exam): இதுதான் ‘கேம் சேஞ்சர்’. இதில் எடுக்கும் மதிப்பெண்கள் தான் வேலைவாய்ப்பை உறுதி செய்யும். சில பணிகளுக்கு ஸ்கில் டெஸ்ட் (Skill Test) அல்லது கணினித் தேர்வு தனியாக இருக்கும்.

யாருக்கு லாபம்? “என்னடா இது சோதனை… ரெண்டு பரீட்சையா?” என்று சலித்துக் கொள்ளாதீர்கள். ஒவ்வொரு துறைக்கும் தனித்தனியாகத் தேர்வு எழுதுவதற்குப் பதில், ஒரே மாதிரியான தகுதி கொண்ட பணிகளுக்கு (எ.கா: டிகிரி முடித்தவர்களுக்கு ‘ஒருங்கிணைந்த பட்டதாரி நிலைத் தேர்வு’ – CGL) ஒரே தேர்வாக இது நடத்தப்படும். இதனால் பணமும் நேரமும் மிச்சம்!

புதுச்சேரி தேர்வர்களே… இனிமேல் எஸ்.எஸ்.சி (SSC) சிலபஸை கொஞ்சம் புரட்டிப் பாருங்க. வெறும் மனப்பாடம் இனி கை கொடுக்காது. மேக்ஸ் (Maths) மற்றும் ரீசனிங் (Reasoning) பகுதியில் யார் ஸ்ட்ராங்கா இருக்காங்களோ, அவங்கதான் இனி கிங். முதல் ரவுண்டுல ‘பாஸ்’ பண்ணா போதும், இரண்டாவது ரவுண்டுல ‘மாஸ்’ காட்டலாம். தயாராகுங்கள்!