நகராட்சி நிர்வாகத் துறை பணி முறைகேடு தொடர்பாக நடவடிக்கை எடுக்க கோரிய மனுவை சென்னை உயர் நீதிமன்றத்திற்கு மாற்றி உயர் நீதிமன்ற மதுரை கிளை உத்தரவிட்டுள்ளது.
நகராட்சி நிர்வாக துறையின் பணி நியமனத்தில் 800 கோடி ரூபாய் அளவுக்கு முறைகேடு நடந்திருப்பதாக அமலாக்கத் துறை குற்றம்சாட்டி தமிழக டிஜிபிக்கு கடிதம் அனுப்பியது.
அதில் சம்பந்தப்பட்டவர்கள் மீது வழக்குப்பதிவு செய்து நடவடிக்கை எடுக்க வேண்டுமென கேட்டுக்கொள்ளப்பட்டிருந்தது.
இந்த குற்றச்சாட்டுக்கு துறை அமைச்சரான கே என் நேரு மறுப்பு தெரிவித்தார்.
இந்த சூழலில் மதுரை கள்ளிக்குடியைச் சேர்ந்த மருது சேனைத்தலைவர் ஆதிநாராயணன் சென்னை உயர்நீதிமன்ற மதுரை கிளையில் மனு ஒன்று தாக்கல் செய்திருந்தார்.
அதில், நகராட்சி நிர்வாகம் மற்றும் குடிநீர் வழங்கல் துறையில் 2,538 பணியிடங்கள் நிரப்பப்பட்டன.
இந்த நியமனத்தின் போது ஒவ்வொரு பணியிடத்துக்கும் 25 லட்சம் ரூபாய் முதல் 35 லட்சம் வரை லஞ்சம் பெறப்பட்டுள்ளது.
இந்தத் துறை அமைச்சரான கே என் நேருவின் சகோதரர் ரவிச்சந்திரன் வீடுகளில் சமீபத்தில் அமலாக்க துறையினர் வங்கி மோசடி வழக்கு தொடர்பாக சோதனை செய்தனர்.
அப்போது கிடைத்த ஆவணங்களின் அடிப்படையில் இந்த துறையில் முறைகேடு நடந்தது தெரியவந்துள்ளது. இது தொடர்பாக வழக்குப் பதிவு செய்து விசாரிக்குமாறு தமிழக டிஜிபிக்கு அமலாக்கத் துறை அக்டோபர் 27ஆம் தேதி கடிதம் எழுதியது.
இருப்பினும் டிஜிபி எந்த நடவடிக்கையும் எடுக்கவில்லை. எனவே அமலாக்கத்துறை கடிதத்தின் பேரில் உள்துறைச் செயலாளரிடம் ஒப்புதல் பெற்று வழக்குப் பதிவு செய்து நடவடிக்கை எடுக்க உத்தரவிட வேண்டும்” என்று கேட்டுக் கொண்டிருந்தார்.
இந்த மனு நீதிபதிகள் அனிதா சுமந்த் மற்றும் குமரப்பன் அமர்வில் விசாரணைக்கு வந்தது.
அப்போது, ‘நகராட்சி நிர்வாக துறை பணி நியமனத்தில் முறைகேடு நடந்ததாக கடிதம் எழுதியது யார்? யாருக்கு கடிதம் எழுதப்பட்டது? நீதிமன்றத்தில் தாக்கல் செய்துள்ள கடிதத்தில் இறுதியில் யாருடைய கையொப்பமும் இல்லையே? இந்த ரகசிய அறிக்கை மனுதாரருக்கு எப்படி கிடைத்தது? என்று நீதிபதிகள் கேள்வி எழுப்பினர்.
அப்போது அமலாக்கத்துறை டிஜிபிக்கு எழுதிய கடிதம் சமூக வலைதளங்களில் பகிரப்பட்டு வருகிறது என்று மனுதாரர் சார்பில் தெரிவிக்கப்பட்டது.
இதற்கு நீதிபதிகள் முழு அறிக்கையும் சமூக வலைதளங்களில் பகிரப்பட்டதா என்பதை குறிப்பிடவில்லையே என்று கேள்வி எழுப்பினர்.
இந்நிலையில் தமிழக அரசு சார்பில், இந்த மனுவை தாக்கல் செய்த மனுதாரர் சரித்திர பதிவேடு குற்றவாளி. மூன்று கொலை முயற்சி வழக்குகள் உட்பட 27 குற்ற வழக்குகள் இவர் மீது உள்ளன.
இவரது கையில் அமலாக்கத் துறை கடிதம் எவ்வாறு கிடைத்தது என்பது குறித்து விசாரணை நடத்த வேண்டும். சரித்திர பதிவேடு குற்றவாளி தாக்கல் செய்த பொதுநல வழக்கை விசாரணைக்கு ஏற்றுக் கொள்ளக் கூடாது.
இதே கோரிக்கையுடன் சென்னையில் தலைமை நீதிபதி அமர்வில் மனு தாக்கல் செய்யப்பட்டுள்ளது. இந்த மனுவில் டிசம்பர் 8ம் தேதி அறிக்கை தாக்கல் செய்ய உத்திரவிடப்பட்டுள்ளது. எனவே இந்த மனுவையும் சென்னை அமர்வுக்கு மாற்ற வேண்டும். இந்த மனு விசாரணைக்கு உகந்ததல்ல” என்று வாதிடப்பட்டது.
அரசின் வாதத்தை ஏற்று இந்த மனுவை சென்னை உயர் நீதிமன்றத்திற்கு மாற்றி நீதிபதிகள் உத்தரவு பிறப்பித்தனர்.