தஞ்சாவூர் அருகே பள்ளிக்கு சென்ற ஆசிரியை அவரது காதலன் வழிமறித்து கத்தியால் குத்தி கொலை செய்த சம்பவம் அதிர்ச்சியை ஏற்படுத்தி உள்ளது.
தஞ்சாவூர் மாவட்டம் மாரியம்மன் கோயில் அருகே மேல களக்கூடிய சேர்ந்தவர் புண்ணியமூர்த்தி. இவரது மகள் காவியா (26) இவர் ஆலங்குடி அரசு தொடக்கப் பள்ளியில் தற்காலிக ஆசிரியராக பணிபுரிந்து வந்தார்.
அதே ஊரை சேர்ந்த கருணாநிதியின் மகன் அஜித்குமார். (29). அஜித்குமாரும் காவியாவும் கடத்த சில ஆண்டுகளாக காதலித்து வந்ததாக கூறப்படுகிறது.
இந்த நிலையில் காவியாவின் பெற்றோர் கட்டாயத்தின் பெயரில் அவரது உறவினருக்கு காவியாவை திருமணம் செய்து வைக்க கடந்த சில நாட்களுக்கு முன்பு நிச்சயதார்த்தம் செய்துள்ளனர்.
இந்த விபரத்தை காவியா, அஜித்குமாருக்கு தெரிவிக்காமல் அவருடன் தொடர்ந்து பேசி வந்ததாகக கூறப்படுகிறது. நேற்று இரவு 8 மணிக்கு இருவரும் செல்போனில் பேசிக் கொண்டிருந்தபோது தனக்கு நிச்சயதார்த்தம் செய்யப்பட்ட தகவலையும், அதற்கான போட்டோக்களையும் அஜித்குமாருக்கு காவியா காட்டியுள்ளார்.
இதனால் அஜித் குமார் கடும் ஆத்திரத்தில் இருந்துள்ளார். இந்நிலையில் இன்று (நவம்பர் 27) காலை காவியா வழக்கம்போல் பள்ளிக்கு இருசக்கர வாகனத்தில் சென்றுள்ளார்.
மாரியம்மன் கோவில் பகுதியில் ராமகிருஷ்ண மடம் அருகே சென்றபோது அவரை அஜித்குமார் வழி மறித்துள்ளார். பின்னர் காவியாவிடம் சண்டையிட்ட அஜித்குமார் மறைத்து வைத்திருந்த கத்தியால் காவியா மீது குத்தி கொலை செய்தார்.
இதில் பலத்த காயமடைந்த காவியா அதே இடத்தில் உயிரிழந்தார். இச்சம்பவம் குறித்து தகவல் அறிந்ததும் அம்மாபேட்டை போலீஸார் சம்பவ இடத்துக்கு விரைந்தனர்.
காவியாவின் சடலத்தை கைப்பற்றி தஞ்சாவூர் மருத்துவ கல்லூரி மருத்துவமனைக்கு அனுப்பி வைத்தனர். இந்த கொலை வழக்கு தொடர்பாக பாபநாசம் காவல்துறை துணை கண்காணிப்பாளர் தலைமையில் விசாரணை நடைபெற்று வருகிறது.
கொலை குற்றத்தில் தொடர்புடைய அஜித்குமார் கைது செய்யப்பட்டுள்ளார். பட்டப்பகலில் ஆள் நடமாட்டம் அதிகம் உள்ள பகுதியில் இளம் பெண் தனது காதலனால் கொலை செய்யப்பட்டுள்ள சம்பவம் அப்பகுதியில் பெரும் பரபரப்பை ஏற்படுத்தி உள்ளது.