இந்திய ஆட்டோமொபைல் சந்தையிலிருந்து வெளியேறிய ஃபோர்டு (Ford) நிறுவனம், நான்கு ஆண்டுகளுக்குப் பிறகு மீண்டும் தமிழ்நாட்டில் தனது உற்பத்தியைத் தொடங்குகிறது. மறைமலைநகரில் உள்ள ஃபோர்டின் ஆலையை நவீனமயமாக்கி, அடுத்த தலைமுறை இன்ஜின்களை தயாரிப்பதற்காக தமிழ்நாடு அரசுடன் ₹3,250 கோடி மதிப்பிலான புரிந்துணர்வு ஒப்பந்தத்தில் (MoU) இன்று (அக்டோபர் 31, 2025) கையெழுத்திட்டது. முதல்வர் மு.க. ஸ்டாலின் மற்றும் தொழில்துறை அமைச்சர் டி.ஆர்.பி. ராஜா ஆகியோர் முன்னிலையில் இந்த முக்கிய ஒப்பந்தம் கையெழுத்தானது.
இந்த மாபெரும் முதலீட்டின் மூலம், ஃபோர்டு நிறுவனம் தனது மறைமலைநகர் ஆலையில் ஆண்டுக்கு 2 லட்சத்திற்கும் அதிகமான அதிநவீன இன்ஜின்களை உற்பத்தி செய்ய திட்டமிட்டுள்ளது. இவை பெரும்பாலும் உலகளாவிய சந்தைகளுக்கு ஏற்றுமதி செய்யப்படும். அமெரிக்காவிற்கு அனுப்பப்பட வாய்ப்பில்லை என்றாலும், பிற சர்வதேச சந்தைகள் இலக்காக இருக்கும்.
2021 செப்டம்பரில் இந்தியாவில் இருந்து வெளியேறிய ஃபோர்டு, மறைமலைநகர் ஆலையை 2022-ல் மூடியது. இதனால் சுமார் 2,500 பேர் வேலை இழந்தனர். ஃபோர்டின் இந்த வெளியேற்றம் ஆட்டோமொபைல் துறையில் ஒரு பெரிய பேசுபொருளானது. எனினும், தமிழக முதல்வர் மு.க. ஸ்டாலின், மாநிலத்திற்கு முதலீடுகளை ஈர்க்கும் நோக்கில் கடந்த செப்டம்பர் 10, 2024 அன்று அமெரிக்கா சென்றிருந்தபோது, சிகாகோவில் ஃபோர்டு மோட்டார் நிறுவன அதிகாரிகளைச் சந்தித்துப் பேசினார். “உலகிற்காக தமிழ்நாட்டில் உற்பத்தி செய்வோம்” என்ற முழக்கத்துடன், ஃபோர்டின் 30 ஆண்டுகால காலப் பங்களிப்பை புதுப்பித்து, மீண்டும் வாகன உற்பத்தியைத் தொடங்கவும், சென்னையில் உள்ள அதன் உலகளாவிய தொழில்நுட்ப மையத்தை விரிவாக்கவும் ஸ்டாலின் வலியுறுத்தினார். முதல்வரின் இந்த தொடர் முயற்சிகளுக்கு கிடைத்த வெற்றியாகவே இந்த ஒப்பந்தம் பார்க்கப்படுகிறது.
வேலைவாய்ப்பு மற்றும் தமிழகத்தின் நிலை:
ஃபோர்டின் இந்த மறுபிரவேசம் தமிழ்நாட்டிற்கு ஒரு புதிய உத்வேகத்தை அளித்துள்ளது. இந்த திட்டத்தின் மூலம், சென்னையில் சுமார் 600 புதிய நேரடி வேலைவாய்ப்புகள் உருவாக்கப்படும் என எதிர்பார்க்கப்படுகிறது. இது மறைமுக வேலைவாய்ப்புகளையும் கணிசமாக அதிகரிக்கும். ஏற்கெனவே ஹூண்டாய், பிஎம்டபிள்யூ போன்ற பல சர்வதேச கார் நிறுவனங்களுக்கு புகலிடமாக இருக்கும் தமிழ்நாடு, ஃபோர்டின் இந்த முடிவுடன் இந்தியாவின் முக்கிய ஆட்டோமொபைல் உற்பத்தி மையமாக தனது நிலையை மேலும் உறுதிப்படுத்தியுள்ளது. புதிய இன்ஜின் உற்பத்தி 2029 இல் தொடங்கும் என்று எதிர்பார்க்கப்படுகிறது.
ஃபோர்டு தனது ஆலை மூடப்பட்ட பின்னரும், இந்தியாவில் தனது உலகளாவிய வணிக நடவடிக்கைகளில் 12,000 ஊழியர்களுடன் தொடர்ந்து இயங்கி வருகிறது. மேலும், அடுத்த மூன்று ஆண்டுகளில் இந்த எண்ணிக்கையை 2,500 முதல் 3,000 வரை உயர்த்தவும் திட்டமிட்டுள்ளது.
பின்னணி என்ன?
ஆட்டோமொபைல் துறையில் ஒரு முக்கிய அறிவிப்பாக, ஃபோர்டு மோட்டார் நிறுவனம் சென்னையில் உள்ள தனது உற்பத்தி ஆலையில் மீண்டும் செயல்பாடுகளைத் தொடங்க ஆயத்தமாகி வருகிறது. 2025 ஆம் ஆண்டின் இரண்டாம் பாதியில் இந்த மறுதுவக்கம் நிகழும் என்று எதிர்பார்க்கப்படும் நிலையில், இது தமிழ்நாட்டின் பொருளாதாரத்திற்கும், வேலைவாய்ப்புக்கும் ஒரு புதிய உத்வேகத்தை அளிக்கும் என்று தொழில்துறை வட்டாரங்கள் தெரிவிக்கின்றன.
செப்டம்பர் 2021 இல் இந்திய வாகன உற்பத்தியில் இருந்து வெளியேறிய ஃபோர்டு, தற்போது தனது சென்னை ஆலையை ஏற்றுமதிக்கான இன்ஜின்கள் மற்றும் உதிரி பாகங்கள் தயாரிப்பு மையமாக மாற்ற திட்டமிட்டுள்ளது. ஆரம்பத்தில் முழு வாகன உற்பத்தியை மேற்கொள்வதில் கவனம் செலுத்தப்படும் என்று கூறப்பட்டாலும், தற்போதைய தகவல்கள், மின்சார வாகனங்களுக்கான உதிரிபாகங்கள் உட்பட, இன்ஜின் மற்றும் பாகங்கள் உற்பத்திக்கு முன்னுரிமை அளிக்கலாம் என்பதைக் காட்டுகிறது.
இந்த மறுபிரவேசத்திற்கான அடித்தளம் கடந்த ஆண்டு செப்டம்பரில் நாட்டப்பட்டது. தமிழ்நாடு முதலமைச்சர் மு.க. ஸ்டாலின் அமெரிக்காவிற்குப் பயணம் மேற்கொண்டபோது ஃபோர்டு நிறுவன அதிகாரிகளுடன் நடத்திய பேச்சுவார்த்தைகளின் விளைவாக, ஃபோர்டு தனது சென்னை ஆலையைப் பயன்படுத்துவதற்கான விருப்பக் கடிதத்தைச் சமர்ப்பித்தது. அமெரிக்காவில் ஏற்பட்ட அரசியல் மாற்றங்கள் மற்றும் வர்த்தகக் கொள்கைகளின் தாக்கம் போன்ற சில தாமதங்கள் ஏற்பட்ட போதிலும், தற்போது ஆயத்தப் பணிகள் முழுவீச்சில் நடைபெற்று வருகின்றன.
ஃபோர்டு நிறுவனம் இந்தியாவை விட்டு வெளியேறிய பிறகும், ஒரு மில்லியனுக்கும் அதிகமான இந்திய வாடிக்கையாளர்களுக்கு சேவை, உதிரி பாகங்கள் மற்றும் வாரண்டி ஆதரவை தொடர்ந்து வழங்கி வருகிறது. இந்த மறுசீரமைப்புடன், ஃபோர்டு நிறுவனம் சென்னையில் உள்ள தனது ஊழியர் எண்ணிக்கையை அதிகரிக்கவும் திட்டமிட்டுள்ளது.
முன்னதாக, ஃபோர்டு தனது சென்னை ஆலையை ஜே.எஸ்.டபிள்யூ குழுமம், வின்ஃபாஸ்ட் மற்றும் மஹிந்திரா போன்ற நிறுவனங்களுக்கு விற்க பரிசீலித்தது. ஜே.எஸ்.டபிள்யூ குழுமத்துடனான 100 மில்லியன் டாலர் ஒப்பந்தம் 2023 டிசம்பரில் முடிவாகவிருந்த நிலையில், அது பின்னர் ரத்து செய்யப்பட்டது. இப்போது, சொந்தமாகவே ஆலையை மீண்டும் இயக்க ஃபோர்டு முன்வந்திருப்பது, இந்தியாவின் உற்பத்தித் திறனில் அந்நிறுவனத்திற்கு உள்ள நம்பிக்கையை வெளிப்படுத்துகிறது.
மேலும், புகழ்பெற்ற எவரெஸ்ட் எஸ்யூவி (இந்தியாவில் எண்டெவர் என அறியப்படும்) மாடலை, அதிக இறக்குமதி வரிகளைத் தவிர்ப்பதற்காக, உள்நாட்டில் அசெம்பிள் செய்வதற்கான சாத்தியக்கூறுகள் குறித்தும் பேச்சுவார்த்தைகள் நடந்து வருகின்றன. இது இந்திய வாகன சந்தையில் ஃபோர்டின் எதிர்கால இருப்பை மேலும் வலுப்படுத்தும். இந்த ஆலைக்கான செயல்பாட்டு உரிமத்தை தமிழ்நாடு மாசுக் கட்டுப்பாட்டு வாரியம் மார்ச் 31, 2028 வரை புதுப்பித்துள்ளது என்பதும் குறிப்பிடத்தக்கது. ஒட்டுமொத்தமாக, ஃபோர்டின் இந்த மறுபிரவேசம், தமிழ்நாட்டின் தொழில்துறை வளர்ச்சிக்கு ஒரு புதிய அத்தியாயத்தைத் தொடங்கி வைக்கும் என எதிர்பார்க்கப்படுகிறது.
பிற முதலீடுகள்:
ஃபோர்டு மட்டுமன்றி, தமிழக அரசு அண்மைக் காலங்களில் பல முக்கிய நிறுவனங்களுடன் புரிந்துணர்வு ஒப்பந்தங்களை மேற்கொண்டுள்ளது. கடந்த அக்டோபர் 2025 இல், ஜப்பான் நாட்டின் ஹிட்டாச்சி எனர்ஜி டெக்னாலஜி சர்வீசஸ் பிரைவேட் லிமிடெட் நிறுவனத்துடன் ₹2,000 கோடி முதலீட்டில் 3,000 பேருக்கு வேலைவாய்ப்பு உருவாக்கும் திட்டத்திற்கான ஒப்பந்தம் கையெழுத்தானது. மேலும், செப்டம்பர் 2025 இல் ஒசூரில் நடைபெற்ற முதலீட்டாளர்கள் மாநாட்டில் ₹24,307 கோடி முதலீட்டில் 92 புரிந்துணர்வு ஒப்பந்தங்கள் கையெழுத்தாகின. இவை 49,353 நபர்களுக்கு வேலைவாய்ப்புகளை உருவாக்கும். முதல்வர் ஸ்டாலினின் ஜெர்மனி பயணத்தின்போதும் ₹7,020 கோடி மதிப்பிலான 26 ஒப்பந்தங்கள் கையெழுத்தாகின என்பது குறிப்பிடத்தக்கது. தமிழக அரசின் தொடர் முயற்சிகள் மூலம், மாநிலத்திற்கு வந்து குவியும் இந்த புதிய முதலீடுகள், பொருளாதார வளர்ச்சிக்கும், வேலைவாய்ப்பு பெருக்கத்திற்கும் பெரிதும் உதவும் என எதிர்பார்க்கப்படுகிறது.