பீகாரிகள் தமிழக வாக்காளர்களாக முடியுமா? மன்மோகன்சிங் வழக்கின் தீர்ப்பை மீறும் தேர்தல் ஆணையம்?

-வி. அருண்

2026-ம் ஆண்டு ஏப்ரல் முதல் மே மாதத்திற்குள் தமிழ்நாடு சட்டமன்ற பொதுத் தேர்தல் நடைபெற இருக்கிறது. இந்த சூழலில் தேர்தல் ஆணையம் 27.10.2025 ஒரு ஆணையை வெளியிட்டது. அதில், தமிழ்நாடு உட்பட 12 மாநிலங்களின் வாக்காளர்கள் பட்டியலில் சிறப்பு தீவிர சீர்த்திருத்தம் SIR மேற்கொள்ளப்படும் என தெரிவிக்கப்பட்டிருந்தது. இந்த நடவடிக்கையானது, 04.11.2025 முதல் 04.12.2025-க்குள் முடிக்கப்பட வேண்டும் என்றும் தேர்தல் ஆணையத்தின் அறிவிப்பில் தெரிவிக்கப்பட்டுள்ளது.

அதாவது, 4.11 2025 அன்று வாக்காளர் பட்டியல் தீவிர சீர்திருத்தம் தமிழ்நாட்டில் மேற்கொள்ளப்படும் என்று தேர்தல் ஆணையம் 27.10 2025ல் அறிவித்த போதிலும், தமிழ்நாட்டில் உள்ள 6 கோடியே 41 லட்சத்து வாக்காளர்களுக்கு, ஒரு வாக்காளருக்கு இரண்டு படிவங்கள் என்ற வகையில் நான்கு பக்கங்கள் கொண்ட கணக்கீட்டு படிவம் (Enumeration,Form) கொடுக்க வேண்டும். ஆனால் 4. 11.2025 தேதியில், எந்த முன்னேற்பாடும் இல்லாமல், முறையாக BLO-க்களுக்கு தேவையான அளவுக்கு பயிற்சி கொடுக்காமல், அவசரகதியிலும் இதை நடைமுறைப்படுத்த ஆணையிட்டது

இதே போன்ற வாக்காளர் சிறப்பு தீவிர சீர்த்திருத்தத்தை அண்மையில் நடந்து முடிந்த பீகார் மாநில சட்டமன்ற பொதுத் தேர்தலில் தேர்தல் ஆணையம் வெற்றிகரமாக நடத்தியதாக கூறிக் கொள்கிறது. வாக்காளர் பட்டியலை தூய்மைப்படுத்துவதன் இதன் நோக்கம் என்றும் தேர்தல் ஆணையம் கூறுகிறது.

பீகார் சட்டமன்ற பொது தேர்தலுக்கு முன்பாக 24.6.2005 அன்று தேர்தல் ஆணையம் வாக்காளர்கள் பட்டியல் சிறப்பு தீவிர சீர்திருத்தம் கொண்டுவதற்கு ஆணையிட்டது. பின்னர் இதில் உள்ள குறைகளையும் அது லட்சக்கணக்கான வாக்காளர்களின் வாக்குரிமையை பறிக்கும் செயலாக இருப்பதையும் சுட்டிக்காட்டி எதிர்க்கட்சிகள் வழக்கு தொடர்ந்தன. தேர்தல் ஆணையம் சுமார் 65 லட்சம் வாக்காளர்களை நீக்கி இருந்தது. இருப்பினும் உச்ச நீதிமன்றம் பல்வேறு நிபந்தனைகளை தேர்தல் ஆணையத்திற்கு விதித்து , சிறப்பு தீவிர சீர்திருத்தத்தை தொடர்ந்து செயல்படுத்த அனுமதி வழங்கியது. இதன்பிறகு நடந்து முடிந்த சட்டமன்ற தேர்தல் முடிவவுகள் நாம் அனைவரும் அறிந்ததே.

தற்போது, தமிழ் நாட்டில் நடத்தப்படும் வாக்காளர் பட்டியல் சிறப்பு தீவிர சீர்திருத்தம் மேற்கொள்ளப்பட்டு வருகிறது. இது தொடர்பாக தேர்தல் ஆணையம் வெளியிட்ட அறிவிப்பில், “01.07.2025 அன்று வெளியிடப்பட்ட பீகார் சிறப்பு தீவிர சீர்திருத்த வாக்காளர் பட்டியலில் உள்ளவர்களும், தமிழ்நாட்டின் சிறப்பு தீவிர சீர்திருத்த வாக்காளர் பட்டியலில் தங்களை இணைத்துக் கொள்ளலாம்” என தெரிவிக்கப்பட்டுள்ளது.

இயல்பாக சொந்த மாநிலத்தில் வசிக்கும் ஒருவர் 5 ஆண்டுகளுக்கு ஒரு முறை சட்டமன்றத் தேர்தலிலும், 5 ஆண்டுகளுக்கு ஒருமுறை நாடாளுமன்றத் தேர்தலிலும், வாக்களிக்கும் உரிமை பெற்றவர் ஆவார்.

சுமார் 20 லட்சத்துக்கும் மேற்பட்ட புலம்பெயர்ந்த தொழிலாளர்கள்- பீகாரில் இருந்து தமிழ்நாட்டுக்கு வந்து தற்காலிகமாக வசித்து வருகின்றனர்.

பீகார் மாநிலத்தில் வாக்களித்த ஒருவர், தமிழ்நாட்டில் வாக்காளர் பட்டியல் சிறப்பு தீவிர சீர்திருத்தத்தில் படிவம் 8-ன் அடிப்படையில் தன்னை சேர்த்துக்கொள்ள விண்ணப்பம் கொடுத்தால், அவரை தமிழ்நாடு வாக்காளர் பட்டியலிலும் சேர்க்க வேண்டும்.. இதுதான் தேர்தல் ஆணையம் வெளியிட்ட அறிவிப்பு. இதற்காக 01.07.2025-ல் பீகார் வாக்காளர் பட்டியலில் உள்ள அவரது விவரம் மட்டுமே போதுமானது என்றும் தேர்தல் ஆணையம் கூறியுள்ளது.

மக்கள் பிரதிநிதித்துவ சட்டத்தின் படி, தேர்தல் ஆணையத்தின் நடவடிக்கை சரிதானா?

முதலில் மக்கள் பிரதிநிதித்துவச் சட்டம்-1950 என்ன கூறுகிறது என பாருங்கள்…

“18 வயது பூர்த்தியடைந்து அந்த தொகுதியில் சாதாரணமாக குடியிருப்பாளராக வசித்துவரும் எவர் ஒருவரும், அந்த தொகுதியின் வாக்காளர்களாக பதிவு செய்ய உரிமையுள்ளது” என்கிறது.

அத்துடன், தன்னை புதிய வாக்காளராக பதிவு செய்ய அல்லது இட மாற்றம் காரணமாக தற்சமயம் வசிக்கும் தொகுதியின் வாக்காளராக சேர்க்க மனு அளிக்கும் போது தரும் தகவல்கள்

• பொய்யானதாகவோ தவறானதாகவோ இருப்பது கண்டுபிடிக்கப்பட்டால்
• ஓராண்டு வரை சிறை தண்டனையோ அல்லது
• அபராதமோ அல்லது
• இரண்டுமோ விதிக்கப்படக்கூடிய அளவில் குற்றம்.

இந்த சட்டத்தின்படி, பீகார் மாநில அரசின் நலத்திட்டங்களின் பயன்களை பெற்றும், அங்கு நிரந்தர குடிமகனாக இருக்கும் சூழலில், பீகார் புலம் பெயர்ந்து தமிழ்நாட்டுக்கு வந்துவிட்ட காரணத்தாலேயே ஒருவர் தமிழ் நாட்டின் வாக்காளராகக் கூடிய சாதாரண குடியிருப்பாளர் ஆகிவிடுவாரா?

மேற்படி சட்டத்தின்படி வாக்காளராகக் கூடிய சாதாரண குடியிருப்பாளராக முடியாதுதான்.. ஆனால் இந்திய தேர்தல் ஆணையத்தின் அறிவிப்பின் படி, பீகார் மாநிலத்தின் வாக்காளர் பட்டியலில் தமது பெயரை நீக்க விண்ணப்பிக்காமலேயே தமிழ்நாட்டிலும் வாக்காளராக முடியும். தேர்தல் ஆணையம் பீகாரிகளுக்கு மட்டும் இந்த சலுகையை வழங்கி இருக்கிறது. அதாவது இரண்டு வாக்குரிமையைப் பெற்றவர்களாக பீகாரிகள் தமிழ்நாட்டில் வலம் வர முடியும்.

அப்படி இரண்டு வாக்குரிமையைப் பெற்றுக் கொள்ள முடியுமா? மக்கள் பிரதிநிதித்துவ சட்டம் அனுமதிக்கிறதா?

மக்கள் பிரதிநிதித்துவச் சட்டம்-1950, “ஒரு குடிமகன், சாதாரணமாக குடியிருப்பாளராக தான் வசிக்கும் தொகுதியில் ஒரே ஒரு வாக்கு மட்டுமே வைத்துக்கொள்ள முடியும்; ஒரு வாக்குக்கு மேல் வைத்திருக்கக் கூடாது” என்கிறது.

பீகார் வாக்காளர் பட்டியலின் அடிப்படையில் அங்குள்ள ஒரு வாக்காளர், தன்னை வாக்காளர் பட்டியலிருந்து நீக்காமலேயே தமிழ்நாட்டிலும் வாக்காளராக பதிவு பெறக்கூடிய சூழல் உள்ளது; ஆகையால் சிறப்பு தீவிர சீர்திருத்தம் என்பதே வாக்காளர் பட்டியலைத் தூய்மைப்படுத்துவதற்குதான் என்கிற தேர்தல் ஆணையத்தின் வாதம் அடிபட்டுப் போகிறது; அர்த்தமற்றதாகிவிடுகிறது.

“தற்போதைய நிலையில் பீகார் மாநில வாக்காளர்கள் தமிழ்நாட்டில் வாக்காளராக இருக்கும் ஆபத்து உள்ளது” என்பதுதான் யதார்த்தம்.

மக்கள் பிரதிநிதித்துவச் சட்டம் மற்றும் தேர்தல் ஆணையத்தின் படிவம் 8 ஆகியவை “சாதாரண குடியிருப்பாளர்தான்” வாக்காளராக முடியும். தேர்தல் ஆணையமோ, “அசாதரண” நிலையை ஏற்படுத்தி உள்ளது.

இப்படியான சிக்கலான சூழ்நிலைக்கு என்னதான் தீர்வு? இதற்குதான் மன்மோகன்சிங் வழக்கை நாம் கவனிக்க வேண்டும்.

நாட்டின் முன்னாள் பிரதமர் மன்மோகன்சிங், 1991-ல் புதுடெல்லி நாடாளுமன்ற தொகுதி வாக்காளராக இருந்தார். அப்போது நரசிம்மராவ் பிரதமராக இருந்தார். மன்மோகன் சிங்குக்கு நிதி அமைச்சர் பதவி வழங்கப்பட்டது.

ஆனால் அப்போது, டாக்டர் மன்மோகன் சிங்- மக்களவைத் தேர்தலில் போட்டியிட்டு நாடாளுமன்ற உறுப்பினராகவில்லை. நாடாளுமன்ற மக்களவை, மாநிலங்களவை உறுப்பினராக இருந்தால்தான் மத்திய அமைச்சராக இருக்க முடியும் என்பது நிலை.

அந்த தருணத்தில் அஸ்ஸாம் மாநிலத்தில் மாநிலங்களவைத் தேர்தல் நடைபெற்றது. இதனால் அஸ்ஸாமின் திஸ்பூர் சட்டமன்றத் தொகுதியில் தன்னை ஒரு வாக்காளராக பதிவு செய்து கொண்டார் மன்மோகன் சிங். பின்னர் மாநிலங்களவைத் தேர்தலில் தேர்ந்தெடுக்கப்பட்டு மத்திய அமைச்சராக நீடித்தார்.

அப்போது இந்திய தேர்தல் ஆணையம் ஒரு நடவடிக்கையை மேற்கொண்டது. 1992-ம் ஆண்டு தேர்தல் ஆணையர், “மன்மோகன் சிங் தம்மை அஸ்ஸாம் மாநில திஸ்பூர் தொகுதியின் சாதாரண குடியிருப்பாளராக, வாக்காளராக எப்படி பதிவு செய்து கொள்ளலாம்?” என விளக்கம் கேட்டார்.

தேர்தல் ஆணையத்தின் இந்த நடவடிக்கைக்கு எதிராக அஸ்ஸாம் மாநில உயர் நீதிமன்றத்தில் வழக்கு தொடர்ந்தார் மன்மோகன்சிங். இந்த வழக்கில் , “ஒரு தொகுதியின் சாதாரண வாக்காளர் யார்? “ என்பதற்கான தெளிவைப் பெற்று அஸ்ஸாம் மாநிலம் திஸ்பூர் சட்டமன்றத் தொகுதியின் வாக்காளராகவே நீடித்தார் மன்மோகன்சிங்.

ஒரு தொகுதியின் சாதாரண குடியிருப்பாளர்- வாக்காளர் யார் என்ற விரிவான விவரம், மக்கள் பிரதிநிதித்துவ சட்டத்தில் தெளிவாக இல்லை; அதனால அஸ்ஸாம் உயர்நீதிமன்றமானது, சாதாரண குடியிருப்பாளர்- வாக்காளர் யார் என தெளிவுபடுத்தியது.

அதாவது,

• சாதாரண குடியிருப்பாளர் என்பவர், ஒருவர் அத்தொகுதியில் நிரந்தரமாக குடியிருப்பதற்கான ஏற்பாடுகள் செய்திருக்க வேண்டும்
• அந்த தொகுதியில் நீண்ட காலம் வாழ்பவராகவும் இருக்க வேண்டும்.
• அப்பகுதி மக்களும் அவரை ஒரு குடியிருப்பாளர் என ஏற்றுக் கொள்ள வேண்டும்.. அப்போதுதான் அவர் சாதாரண குடியிருப்பாளர் அல்லது வாக்காளராக முடியும்.
• நீண்டகாலம் வசித்தாலும் ‘நிரந்தரமாக குடியிருக்க’ நடவடிக்கை மேற்கொள்ளாமல் இருந்தால் சாதாரண குடியிருப்பாளர் அல்லது வாக்காளராக முடியாது என விளக்கம் தந்தது அஸ்ஸாம் உயர்நீதிமன்றம்.

அஸ்ஸாம் உயர்நீதிமன்றத்தின் இந்த வழிகாட்டுதலை உச்சநீதிமன்றமும் உறுதி செய்தது.

இதனால் மன்மோகன் சிங், அஸ்ஸாம் மாநில சாதாரண குடிமகனாக 1991 முதல் 2019 வரை இருந்தார்.

அஸ்ஸாம் உயர்நீதிமன்றத்தின் உத்தரவு; அதை உறுதி செய்த உச்சநீதிமன்றம் என நீதிமன்ற வழிகாட்டுதல்கள் இருந்தாலும் தேர்தல் ஆணையம் இதனை கருத்தில் கொள்ளவில்லை.

அதனால்தான், தேர்தல் ஆணையமானது, பீகார் மாநிலத்தின் 01.07.2025 அன்றைய வாக்காளர் பட்டியலில் உள்ளவர்களையும் தமிழ் நாட்டில் வாக்களராக பதிவு செய்ய அனுமதிக்கிறது. இந்திய தேர்தல் ஆணையத்தின் இந்த நடவடிக்கை, மக்கள் பிரதிநிதித்துவ சட்டம் மற்றும் அரசியல் சாசனம் மற்றும் நீதிமன்ற உத்தரவுகளுக்கு எதிரான ‘அப்பட்டமான’ சட்ட மீறல் நடவடிக்கையாகும்.

கட்டுரையாளர் குறிப்பு:

வி. அருண்,
முன்னாள் அடிஷனல் அட்வகேட் ஜெனரல், சென்னை உயர்நீதிமன்றம்.