டிஜிட்டல் திண்ணை: ‘அழைத்தார்’ ஸ்டாலின்.. ‘அணைக்கும்’ விஜய்.. முடிவுக்கு வரும் செங்கோட்டையன் கதை!

வைஃபை ஆன் செய்ததும் ‘கிளி பறந்துடுச்சே’ என்றபடியே டைப் செய்ய தொடங்கியது வாட்ஸ் அப்.

செங்கோட்டையன் தகவல் நிறைய இருக்கு போல..

ஆமாய்யா.. எல்லா கட்சியிலும் செங்கோட்டையன் விவகாரம்தான் பரபரப்பாக பேசப்படுது..

நாம சொன்னபடியே எம்.எல்.ஏ. பதவியை இன்று ராஜினாமா செஞ்சுட்டாரு செங்ஸ். அத்துடன் ஆதரவாளர்களுடன் விஜய் முன்னிலையில் நாளைக்கு தவெக ஜோதியில் ஐக்கியமாகிறார்.

செங்கோட்டையன் கூட யாரெல்லாம் தவெகவில் சேரப் போறாங்களாம்?

கோபிசெட்டிபாளையத்தில் இருந்து பஸ்களில் தமது ஆதரவாளர்களை வர சொல்லி இருக்கிறார் செங்கோட்டையன்..

அவங்க எல்லாமே அதிமுகவில இருந்து நீக்கப்பட்டவங்கதான்..

அதனால அதிமுகவில் இருந்து ஒதுங்கி இருக்கிற முன்னாள் எம்.எல்.ஏ., எம்.பிக்கள், நிர்வாகிகள் பலரிடமும் செங்கோட்டையன் தரப்புல பேசிகிட்டு இருக்காங்க…

இதை தெரிஞ்சு எடப்பாடி தரப்பும் அவங்களை தொடர்பு கொண்டு பேசி ‘கேட்’ போட்டுகிட்டு இருக்காங்க..

ஓஹோ.. செங்கோட்டையன் முடிவு பத்தி ரியாக்சன் நிறைய வந்திருக்குமே?

ஆமாய்யா.. அதிமுகவுல எடப்பாடிக்கு நெருக்கமானவங்ககிட்ட பேசினோம். அப்ப, “தவெகவுக்கு செங்கோட்டையன் போறாருன்னு பொதுச்செயலாளருக்கு (இபிஎஸ்) சொன்னோம்.. ஆமா எனக்கும் தகவல் வந்துச்சுன்னு சொல்லிட்டு, அவரு திமுகவுக்குதான் போவாருன்னு பார்த்தேன்.. இப்ப விஜய்கிட்ட சேரப் போறாரு.. விஜய்க்கு என்ன செல்வாக்கு இருக்குன்னு இவரு அங்க போறாருன்னும் தெரியலை.. எலக்‌ஷன்ல விஜய் கட்சியே காலியாகப் போகுது.. இவரும் அவங்க கூடப் போய் காலியாகத்தான் போறாருன்னு சொன்னார்” என்கின்றனர்.

சரி பாஜககிட்டதானே செங்கோட்டையன் பேசிகிட்டு இருந்தாரு இப்ப அவங்க என்ன நினைக்கிறாங்க?

தவெகவுக்கு செங்கோட்டையன் போகப் போறாருன்னு தெரிஞ்ச உடனேயே அவரை தொடர்பு கொண்டு சில பாஜக தலைவர்கள் பேசுனாங்க..

”செங்கோட்டையனோ, டெல்லி தலைவர்கள் மீது அதிருப்தியாக இருந்தாரு.. இதனால அமித்ஷாகிட்டேயும் சொன்னோம்..

செங்கோட்டையன்கிட்ட டெல்லியில் இருந்து பேசுவாங்கன்னும் எதிர்பார்த்தோம்.. அப்படியும் நடக்கலை..

அப்புறம்தான் அமித்ஷாஜி என்னவோ பெருசா செங்கோட்டையன் விவகாரத்துல ஆர்வம் காட்டலைன்னு தெரிஞ்சது” என்கின்றனர் தமிழக பாஜக சீனியர்கள்.

செங்கோட்டையனுடன் திமுகவும் பேசி இருக்கே..

ஆமாம்பா.. திமுக மூத்த அமைச்சர்களிடம் நாம் பேசுனப்ப, “விஜய்க்கு பலம் கூடக்கூடாதுன்னுதான் சிஎம் எப்பவும் நினைப்பாரு..

ஏன்னா சில சர்வே ரிப்போர்ட்ஸ் விஜய்க்கு 20% வாக்குகள் இப்பவே கிடைக்குது.. இது இன்னமும் அதிகமாகிட்டுதான் போகுதுன்னு சொல்லி இருந்தது..

அதனால விஜய் பக்கம் யாரு மூவ் செஞ்சாலும் அவங்களை ஆஃப் செஞ்சுகிட்டே இருந்தோம்.. ஓபிஎஸ் மகன் ரவீந்தரநாத், விஜய் தரப்புல பேசினாரு.. ஓபிஎஸ்ஸையே தவெகவுல சேர்க்கிற வரை அந்த பேச்சு போனது..

அப்பதான் சிஎம்மை சந்திக்க நேரம் கேட்டுகிட்டே இருந்த ஓபிஎஸ்ஸை உடனே வர சொல்லி சந்திச்சாரு..

இப்பவும் செங்கோட்டையன் தவெகவுக்கு போவாருன்னு சிஎம்-க்கு முன்னாடியே தகவல் கிடைச்சது.. ஆனா ஏதோ ஒரு காரணத்துல சிஎம் முதல்ல பெருசா பேசலை..

அப்புறமா நீண்ட டிஸ்கஷனுக்கு பிறகுதான் சிஎம், ”சரி அழைச்சுட்டு வாங்க..”ன்னு சொன்னார்..

அப்ப, செங்கோட்டையன்கிட்ட யாரு பேசுறதுன்னு ஒரு பேச்சு வந்தது.. அமைச்சர் முத்துசாமி பேரு முதலில் வந்தாலும் செங்கோட்டையனை சேர்க்கிறதுல அவரு விருப்பம் இல்லாமதான் இருந்தாரு..

அதனாலதான் சேகர்பாபுவை கூப்பிட்டு செங்கோட்டையன்கிட்ட பேசி அழைச்சுட்டு வர சொன்னாரு சிஎம்..

நேற்று இரவே செங்கோட்டையன்கிட்ட அமைச்சர் சேகர்பாபு பேசினாரு.. இன்னைக்கு எம்.எல்.ஏ. பதவியை ராஜினாமா செய்ய போன செங்கோட்டையன்கிட்ட, சபாநாயகர் அலுவலகத்துலயும் சந்திச்சு ரொம்ப நேரம் பேசினாரு.. அவரோட வீட்டுலயும் போய் பேசுனாரு சேகர்பாபு..

செங்கோட்டையனைப் பொறுத்தவரைக்கும் தவெகவுக்குதான் போவேன்னு திட்டவட்டமாக இருக்காரு.. திமுகவுல சேருவதற்கு கொஞ்சமும் விருப்பமே காட்ட மறுத்துட்டாரு” என்றனர்.

ஏன் திமுக சாய்ஸ் வேணாம்னு நினைக்கிறாராம் செங்ஸ்?

செங்கோட்டையனுக்கு நெருக்கமானவங்ககிட்ட நாம பேசுனப்ப, ”அண்ணனுக்கு திமுகவுல சேரனும்னு எப்பவுமே எண்ணம் இல்லை.. ஏன்னா 50 வருஷமா எம்ஜிஆர், அம்மா (ஜெயலலிதா)ன்னு அடையாளமாகிட்டு திமுகவுக்கு போறது சரியா வராதுன்னு நினைக்கிறாரு..

அதோட திமுகவுல அமைச்சர் முத்துசாமி ஏற்கனவே மா.செ.வாக இருக்கிறாரு.. அவரோட சேர்ந்து வேலை செய்யறது கஷ்டம்.. அதைவிட அவரு அண்ணனுக்கு முக்கியத்துவம் தராம பார்த்துப்பாரு.. அது அவரோட அரசியல்.. அண்ணனுக்கு செட் ஆகாது..

இப்படி எல்லாம் யோசிச்சுட்டுதான் தவெகவுல சேரலாம்னு முடிவெடுத்தாரு” என்கின்றனர்.

தவெகவில் ஒரே உற்சாகமாக இருக்காங்களா?

பின்ன இருக்காதா.. விஜய்க்கு நெருக்கமான சர்க்கிளில் பேசுறப்ப, ”செங்கோட்டையன் கிட்ட தவெக பொதுச்செயலாளர் புஸ்ஸி ஆனந்த், ஆதவ் அர்ஜூனா, விஷ்ணு ரெட்டி, ஜான் ஆரோக்கியசாமி என எல்லோருமே 20 நாட்களாகவே பேசிகிட்டு இருந்தாங்க.. செங்கோட்டையனும் இவங்க கிட்ட தொடர்பில் இருந்தாரு…

செங்கோட்டையன் பேசுன சந்தோசத்துல எல்லோரும் போய் தளபதிகிட்ட சொன்னாங்க..

தளபதியோ, ”அப்படியா வரட்டும்” என ஆர்வம் அதிகமாக காட்டிக்காம இருந்தாரு..

அப்புறமா, ”கொங்கு ;பெல்ட்டுல எல்லோருக்கும் தெரிஞ்சவர் செங்கோட்டையன்.. பொலிட்டிக்கலா ரொம்ப சீனியர்.. அதனால நம்ம கட்சிக்கு குறிப்பா கொங்கு பெல்ட்டில் ரொம்பவே பூஸ்ட்டா இருக்கும்..

இதே பார்முலாவில ஒவ்வொரு மண்டலமாக பார்த்து முக்கியமான பிரமுகர்களையும் சேர்க்க ஆரம்பிச்சுடலாம்” என சொல்ல, தளபதியும் ஓகே சொல்லி இருந்தார்..

செங்கோட்டையன் விஷயத்துல தொடக்கம் முதலே தளபதி கொஞ்சம் தள்ளி நின்று ஆர்வமில்லாமல்தான் பார்த்தாரு..

திமுக, பாஜக எல்லாம் கோதாவுல குதிச்சு செங்கோட்டையனை தவெகவுல சேர விடாம தடுக்கிறாங்க.. பேச்சுவார்த்தை நடத்துறாங்கன்னு அவருகிட்ட சொன்னப்பதான் தளபதியும், “சரி.. செங்கோட்டையனை கட்சியில சீக்கிரம் சேர்த்துருவோம்னு” சொன்னார்.. அதனாலதான நாளைக்கு கட்சியில ஆதரவாளர்களுடன் செங்கோட்டையன் சேருகிறாரு” என சொல்வதாக தகவலை ஷேர் செய்தபடியே சென்ட் பட்டனை தட்டிவிட்டு ஆப் லைனுக்கு போனது வாட்ஸ் அப்.