வைஃபை ஆன் செய்ததும், ”நினைப்பதெல்லாம் நடந்துவிட்டால்.. ” என பாடியபடியே டைப் செய்ய தொடங்கியது வாட்ஸ் அப்.
என்னய்யா.. பரபரப்பு இன்னும் ஓயவில்லையா?
ஆமாப்பா.. அதான் நடந்துருச்சே.. விஜய்யை செங்கோட்டையன் சந்திச்சு என்ன பேசுனாராம்?
நிறையவே பேசியிருக்காரய்யா.. விஜய்யை சந்திச்சுட்டு வீட்டுக்குப் போன செங்கோட்டையனிடம் அவரது ஆதரவாளர்கள் ரொம்பவே ஆர்வமா என்ன பேசுனீங்க அண்ணே? விஜய் என்ன சொன்னாருண்ணே? என கேட்டாங்க..
அப்போ செங்கோட்டையன் சொன்னதை விலாவாரியாக சொல்றேன்.. கவனமா கேளுமய்யா..
“விஜய்கிட்ட ஒன் டூ ஒன் தனியா பேசனும்னு சொல்லி இருந்தேன்.. விஜய்யும் சரின்னு சொல்லி இருந்தாரு..
என்கிட்ட பேசிகிட்டு இருந்த புஸ்ஸி ஆனந்த், ஆதவ் அர்ஜூனா, விஷ்ணு ரெட்டி, ஜான் ஆரோக்கியசாமின்னு யாருமே நாங்க பேசும்போது கூட இல்லை.. நாங்க ரெண்டு பேரும் மட்டும்தான் பேசினோம்..
நான் பேசுறப்ப, ”உங்களுக்கு நல்ல மக்கள் செல்வாக்கு இருக்கு.. மக்கள் உங்களை முதல்வராகவே பார்க்குறாங்க.. திமுக மேல மக்களுக்கு அதிருப்தி அதிகமா இருக்கு.. அதிமுகவையும் மக்கள் ஏத்துக்கலை.. அதனால நம்மை எதிர்பார்க்கிறாங்க..
உங்களை தலைவர் (எம்ஜிஆர்), அம்மா (ஜெயலலிதா) மாதிரிதான் மக்களும் பார்க்கிறாங்க.. கட்சியை இன்னும் கொஞ்சம் ஸ்டிராங்கா கொண்டு போகனும்”னு சொன்னேன்..
அப்ப விஜய் குறுக்கிட்டு, “திமுக- பாஜகவுல இருந்து உங்களை இங்க வரவேண்டாம்னு தடுத்தாங்களாமே?”ன்னு
கேட்டாரு..
நானும் ”ஆமாம்.. திமுகவுல சேகர்பாபு வந்து பேசுனாரு.. திமுகவுல நல்ல பதவி தருவோம்னு தலைவர் (ஸ்டாலின்) சொல்ல சொன்னதாக சொன்னாரு சேகர்பாபு.. ஆனா நான், ‘முடிவு பண்ணிட்டேன்னு’ தெளிவா சொல்லி அனுப்பிட்டேன்.
பாஜகவுல இருந்தும் கூட பேசுனாங்க.. அவங்களுக்கும் அதுதான் பதிலா சொன்னேன்..
அதிமுகவுல இருக்கிற என் நண்பர்கள் பலரும் பேசினாங்க.. அவங்களும் என் கூட இங்க வர்றாதா சொன்னாங்க.. இதை கேள்விபட்டு எடப்பாடி அவங்க கூப்பிட்டு பேசியிருக்காரு.. ஆனாலும்
அவங்க எல்லாம் இங்க வர்ற ரெடியாகவே இருக்காங்க”ன்னு சொன்னேன்..
கட்சியில என்ன பொறுப்புன்னு பேசும் போது, ”அதிமுகவுல பொதுச்செயலாளரா எடப்பாடி இருக்கிறாரு.. அதே மாதிரி போஸ்ட் இங்க எனக்கு இருந்தாதான் நல்லா இருக்கும்”னு சொன்னேன்..
அப்ப, தலைவர் (எம்ஜிஆர்)- அம்மா (ஜெயலலிதா) கூட இருந்த காலங்களையும் அமைச்சராக இருந்தப்ப நடந்த பல சம்பவங்களையும் விஜய்கிட்ட ஷேர் பண்ணினேன்.
நான் பேசி முடிக்கிற வரைக்கும் விஜய் எந்த இடத்திலும் கிராஸ் பண்ணாம ரொம்பவே கவனமாக கேட்டுகிட்டே இருந்தாரு..
கடைசியா, ”நாளைக்கு பனையூர் கட்சி ஆபீசுக்கு ஆதரவாளர்களுடன் வந்துருங்க.. எல்லோரும் கட்சியில சேர்ந்த பிறகு, என்ன பொறுப்புகள்னு முடிவு செஞ்சுக்கலாம்னு விஜய் சொன்னாரு” என மூச்சுவிடாமல் சொல்லி முடித்தார் செங்கோட்டையன்..
”அண்ணன் எங்ககிட்ட இப்படி பேசும் போதே, தவெகவுல இருந்து புஸ்ஸி ஆனந்த், ஆதவ் அர்ஜூனா, விஷ்ணு ரெட்டி, ஜான் ஆரோக்கியசாமின்னு வரிசையாக போனடிச்சு, ‘தளபதி என்ன சொன்னாரு’? ‘சார் என்ன சொன்னாரு’ன்னு கேட்டுகிட்டே இருந்தாங்க.. ஆனாலும் அண்ணன் எங்க கிட்ட பேசுனதை கூட அவங்க கிட்ட சொல்லாமல் தவிர்த்துட்டாரு” என செங்ஸ் ஆதரவாளர்கள் சொன்ன தகவலை டைப் செய்தபடியே சென்ட் பட்டனை தட்டிவிட்டு ஆப் லைனுக்கு போனது வாட்ஸ் அப்.