மாநிலங்களின் சட்டமன்றங்களில் நிறைவேற்றப்படும் மசோதாக்களுக்கு ஆளுநர்கள் மற்றும் குடியரசுத் தலைவர் ஒப்புதல் அளிக்க காலக்கெடு விதித்தது உச்சநீதிமன்றம். இந்த தீர்ப்பு மீது குடியரசுத் தலைவர் திரவுபதி முர்மு 14 கேள்விகளை எழுப்பி மனுத் தாக்கல் செய்திருந்தார். இந்த மனு மீது உச்சநீதிமன்ற தலைமை நீதிபதி பிஆர் கவாய் தலைமையிலான பெஞ்ச் இன்று தீர்ப்பளிக்க உள்ளது.
தமிழ்நாடு சட்டப்பேரவையில் நிறைவேற்றப்பட்ட மசோதாக்களை ஆளுநர் ஆர்.என்.ரவி நிறுத்தி வைத்திருந்தார். இதற்கு எதிராக்க தமிழ்நாடு அரசு தொடர்ந்த வழக்கில்தான் உச்சநீதிமன்றம் வரலாற்றுச் சிறப்புமிக்க தீர்ப்பளித்தது.
மாநில சட்டமன்றங்களில் நிறைவேற்றப்படும் மசோதாக்கள் மீது ஆளுநர்கள் 1 மாதத்துக்குள்ளும் குடியரசுத் தலைவர் 3 மாதத்துக்குள்ளும் முடிவு எடுக்க வேண்டும் என்பது உச்சநீதிமன்றத்தின் தீர்ப்பு.
இத்தீர்ப்பு மீது குடியரசுத் தலைவர் திரவுபதி முர்மு 14 கேள்விகளை எழுப்பி உச்சநீதிமன்றத்தில் மனுத் தாக்கல் செய்தார்.
குடியரசுத் தலைவரின் 14 கேள்விகள்:
- 200வது பிரிவின் கீழ் ஒரு மசோதா ஒப்புதலுக்காக ஆளுநரிடம் சமர்ப்பிக்கப்படும்போது, அவருக்கு முன் உள்ள அரசியலமைப்பு விருப்பங்கள் என்ன?
- மாநில அமைச்சரவையின் ஆலோசனைகளுக்கு ஆளுநர் கட்டுப்படுகிறாரா?
- அரசியலமைப்புச் சட்டத்தின் 200வது பிரிவின் கீழ் ஆளுநர் தனது விருப்பத்தைப் பயன்படுத்துவது நியாயமானதா?
- அரசியலமைப்பின் பிரிவுகள் 361, 200 இன் கீழ் ஆளுநரின் நடவடிக்கைகளை நீதித்துறை மறுஆய்வுக்கு உட்படுத்த முடியுமா?
- அரசியலமைப்பு ரீதியாக நிர்ணயிக்கப்பட்ட கால அவகாசம் அல்லது ஆளுநர் அதிகாரங்களைப் பயன்படுத்தும் முறை எதுவும் இல்லாத நிலையில், நீதிமன்ற உத்தரவுகள் மூலம் கால அவகாசம் விதிக்கப்பட்டு அதிகாரங்களைப் பயன்படுத்தும் முறை பரிந்துரைக்கப்படுமா?
- அரசியலமைப்புச் சட்டத்தின் 201வது பிரிவின் கீழ் (ஆளுநர் பரிசீலனைக்காக ஒதுக்கப்பட்ட மசோதாக்களைக் கையாள்வது) குடியரசுத் தலைவர் அரசியலமைப்பு விருப்புரிமையைப் பயன்படுத்துவது நியாயமானதா?
- பிரிவு 201 இன் கீழ், குடியரசு தலைவர் அதிகாரங்களைப் பயன்படுத்தும் காலக்கெடுவை நீதித்துறை உத்தரவுகள் விதிக்க முடியுமா?
- ஒரு மசோதாவை ஆளுநர் குடியரசுத் தலைவரின் ஒப்புதலுக்காக அனுப்பும்போது, குடியரசுத் தலைவர் உச்ச நீதிமன்றத்தின் ஆலோசனையைப் பெற வேண்டுமா?
- ஒரு மசோதா சட்டமாக மாறுவதற்கு முன்பு, முறையே பிரிவுகள் 200 மற்றும் 201 இன் கீழ் ஆளுநர் மற்றும் குடியரசு தலைவரின் முடிவுகள் நியாயப்படுத்தப்படுமா? மேலும், அந்த சட்டத்தின் உள்ளடக்கங்கள் குறித்து நீதித்துறை தீர்ப்பை மேற்கொள்ள அனுமதிக்கப்படுகிறதா?
- குடியரசு தலைவர் அல்லது ஆளுநர்களின் அரசியலமைப்பு அதிகாரங்களை, பிரிவு 142-ஐப் பயன்படுத்தும் நீதித்துறை உத்தரவின் மூலம் மாற்ற முடியுமா?
- மாநில சட்டமன்றத்தால் இயற்றப்பட்ட சட்டம், ஆளுநரின் ஒப்புதல் இல்லாமல் நடைமுறையில் உள்ள சட்டமா?
- அரசியலமைப்புச் சட்டத்தின் விளக்கம் தொடர்பாக உச்ச நீதிமன்ற அமர்வு ஆராய்ந்து, பிரிவு 145(3) இன் கீழ் குறைந்தபட்சம் ஐந்து நீதிபதிகள் கொண்ட அமர்வுக்கு இந்த வழக்கை பரிந்துரைக்க வேண்டியது கட்டாயமல்லவா?
- பிரிவு 142 அரசியலமைப்பின் தற்போதைய அடிப்படை அல்லது நடைமுறை விதிகளுக்கு முரணானதா?
- பிரிவு 131-ன் கீழ் அசல் வழக்குத் தாக்கல் செய்வதைத் தவிர, மத்திய அரசுக்கும் மாநில அரசுகளுக்கும் இடையே முடிவெடுப்பதற்கு உச்ச நீதிமன்றத்திற்கு ஏதேனும் தடை உள்ளதா?
குடியரசுத் தலைவரின் இந்த கேள்விகள் அடங்கிய மனு மீது தலைமை நீதிபதி பிஆர் கவாய் தலைமையிலான பெஞ்ச் இன்று தீர்ப்பளிக்க உள்ளது.