வங்க கடலில் உருவாகி இந்தியா நோக்கி நகர்ந்து கொண்டிருக்கும் டிட்வா புயல் பாதிப்பால் இலங்கையில் 132 பேர் பலியாகி உள்ளனர். மேலும் 176 பேரின் கதி என்ன என்பது தெரியவில்லை.
இலங்கை கிழக்கு மாகாணத்தின் கடல் பகுதியில் டிட்வா புயல் உருவானது. மட்டக்களப்பு, திருகோணமலை கடற்பரப்பைக் கடந்து வடக்கு மாகாண நிலப்பரப்புக்குள் டிட்வா புயல் நுழைந்தது.
பின்னர் வடமாகாணம் யாழ்ப்பாணம் பகுதியில் டிட்வா புயல், நிலப்பரப்பை விட்டு விலகி கடலுக்குள் பயணித்தது. நிலப்பரப்பில் பயணிக்கும் போது சற்று வலு குறைந்திருந்த டிட்வா புயல், கடலுக்குள் பயணிக்கும் போது வலுவடைந்த நிலையில் உள்ளது.
தற்போதைய நிலையில் வட தமிழ்நாட்டை நோக்கி டிட்வா புயல் நகர்ந்து வருகிறது. இலங்கையில் டிட்வா புயல், வரலாறு காணாத பேரழிவை ஏற்படுத்தி உள்ளது. இதனால் இலங்கை முழுவதும் பொது அவசரநிலை பிரகடனம் செய்யப்பட்டு மீட்பு பணிகள் மேற்கொள்ளப்பட்டு வருகின்றன.
இலங்கையில் புயல் மழை வெள்ளம் மற்றும் நிலச்சரிவில் சிக்கி இதுவரை 132 பேர் பலியாகி உள்ளனர். மேலும் 176 பேரின் கதி என்ன என்பது தெரியவில்லை. இப்புயலால் சுமார் 2,00,000 குடும்பங்கள் பாதிக்கப்பட்டுள்ளன.
இலங்கையின் ஆறுகள், அணைகள் அனைத்தும் வெள்ளக்காடாக காட்சி தருகின்றன. மலையக மாவட்டங்களில் பல இடங்களில் நிலச்சரிவு ஏற்பட்டுள்ளது. நிலச்சரிவில் சிக்கியவர்களை மீட்கும் பணியும் தொடர்ந்து நடைபெற்று வருகிறது.
இலங்கையில் வெள்ளத்தில் சிக்கியவர்களை மீட்கும் பணியில் முப்படையினரும் ஈடுபடுத்தப்பட்டுள்ளனர். இலங்கை அனுராதபுரம் சிறைக்குள் மழை வெள்ளம் பெருக்கெடுத்து ஓடுவதால் அங்கிருந்து கைதிகள் அனைவரும் பாதுகாப்பாக வேறு இடங்களுக்கு அழைத்துச் செல்லப்பட்டனர். இந்தியாவின் நிவாரணப் பொருட்களுடன் கடற்படை கப்பல், விமானங்கள் இலங்கை சென்றுள்ளன.