வங்க கடலில் நகர்ந்து வரும் டிட்வா புயல் தற்போது காரைக்காலுக்கு 80 கி.மீ தொலைவில் கடலிலேயே வலுவிழந்துவிட்டதாகவும் மேகக் கூட்டங்கள் ஏதுமின்றி வெறும் சுழலாகத்தான் இருக்கிறது என்றும் தனியார் வானிலை ஆய்வாளர் பிரதீப் ஜான் தெரிவித்துள்ளார்.
இது தொடர்பாக வானிலை ஆய்வாளர் பிரதீப் ஜான் கூறியதாவது: டிட்வா புயலை காணவில்லை என்றுதான் கூற வேண்டும். வெறும் காற்று சுழலாகத்தான் வலுவிழந்த நிலையில் இருக்கிறது டிட்வா புயல்.
டிட்வா புயலால் மயிலாடுதுறை பகுதியில் 14 முதல் 22 செ.மீ. வரை மழை கொட்டி இருக்கிறது.
காவிரி டெல்டாவின் தஞ்சாவூர், திருவாரூரிலும் நல்ல மழை பெய்துள்ளது. இதேபோல சிவகங்கை, ராமநாதபுரத்திலும் கனமழை பெய்துள்ளது.
தற்போதும் டிட்வா புயல், வெறும் சுழலாக வலம் வருகிறது; மேக கூட்டங்கள் எதுவும் இல்லை. இந்த காற்று சுழல் இன்று இரவு சென்னையை நெருங்கி வரக் கூடும். இவ்வாறு பிரதீப் ஜான் கூறியுள்ளார்.