கோவையில் வீடுகளில் கொள்ளையடித்ததாக போலீசாரால் சுட்டுப் பிடிக்கப்பட்ட உ.பி. கொள்ளையர்களில் ஒருவர் உயிரிழந்துள்ளார்.
கோவை கவுண்டம்பாளையத்தில் வீட்டு வசதி வாரிய அடுக்குமாடி குடியிருப்பு உள்ளது. 14 தளங்களுடன் பிரம்மாண்டமாக கட்டப்பட்டு இருக்கும் இந்த வளாகத்தில் 1800 குடியிருப்புகள் இருக்கின்றன. இக் குடியிருப்பு வளாகத்திற்குள் சில நாட்களுக்கு முன் நுழைந்த கொள்ளை கும்பல் ஒன்று 13 வீடுகளில் கொள்ளை சம்பவத்தில் ஈடுபட்டது. 56 சவரன் தங்க நகை மற்றும் 3 லட்ச ரூபாய் வரை கொள்ளை போனது.
இது தொடர்பாக கவுண்டம்பாளையம் போலீசார் வழக்குப்பதிவு செய்து விசாரணை நடத்தினர். அந்த
குடியிருப்பு வளாகத்தில் இருந்த சிசிடிவி காட்சிகளைக் கொண்டு கொள்ளை சம்பவத்தில் ஈடுபட்ட நபர்கள் குறித்து போலீசார் விசாரணை நடத்தினர்.
இந்நிலையில் கொள்ளை சம்பவத்தில் ஈடுபட்ட நபர்கள் வடமாநிலத்தைச் சேர்ந்த நபர்கள் என்பதும், அவர்கள் குனியமுத்தூர் அருகே குளத்துப்பாளையம் பகுதியில் தலைமறைவாக இருப்பதும் போலீசாருக்கு தெரியவந்தது.
இதனை தொடர்ந்து தனிப்படை போலீசார் அங்கு சென்று கொள்ளையர்களை பிடிக்க முயன்ற பொழுது அவர்கள் கத்தியால் தாக்கியதாக கூறப்படுகிறது. இதில் பார்த்திபன் என்ற தலைமை காவலருக்கு கையில் காயம் ஏற்பட்ட நிலையில் 3 வட மாநில கொள்ளையர்களையும் போலீசார் துப்பாக்கியால் சுட்டுபிடித்தனர். இதில் மூன்று வட மாநில கொள்ளையர்களுக்கும் காலில் காயம் ஏற்பட்டது.
இதனையடுத்து காயம் அடைந்த மூன்று வட மாநில கொள்ளையர்களும் கோவை அரசு மருத்துவமனையில் சிகிச்சைக்காக சேர்க்கப்பட்டனர். போலீஸ் விசாரணையில்
துப்பாக்கியால் சுடப்பட்ட மூன்று பேரும் உத்தரப்பிரதேச மாநிலம் மஜீத்புரா மாவட்டத்தை சேர்ந்தவர்கள் என்பதும், அவர்களின் பெயர் ஆசிக்(45) ,கல்லூர் (60), இர்ஃபான் (48)என்பதும் முதல்கட்ட போலீஸ் விசாரணையில் தெரியவந்தது.
இந்த மூன்று பேரிடமும் போலீசார் தொடர்ந்து விசாரணை நடத்தி வந்த நிலையில் ஆசிக் இன்று சிகிச்சை பலனின்றி உயிரிழந்தார்.