“மத்திய அரசு எனது அமர்வை தவிர்க்கிறது” : தலைமை நீதிபதி கவாய் பகீர் குற்றச்சாட்டு!

“மத்திய அரசு எனது அமர்வை தவிர்க்க முயற்சிப்பதாக தெரிகிறது” என்று தலைமை நீதிபதி பி.ஆர். கவாய் கூறியுள்ளார்.

பல்வேறு தீர்ப்பாயங்களின் தலைவர்கள் மற்றும் உறுப்பினர்களுக்கு சீரான சேவை நிபந்தனைகளை வகுத்துள்ள தீர்ப்பாய சீர்திருத்தச் சட்டத்தின் அரசியலமைப்பு செல்லுபடியை எதிர்த்து உச்ச நீதிமன்றத்தில் வழக்குத் தொடரப்பட்டது.

இந்த வழக்கை ஐந்து நீதிபதிகள் கொண்ட அமர்வு விசாரிக்குமாறு மத்திய அரசு கோரிக்கை விடுத்தது. இந்த கோரிக்கையை உச்ச நீதிமன்றம் நேற்று நிராகரித்தது.

அப்போது, சர்வதேச நடுவர் மன்றத்தில் பங்கேற்க அனுமதிக்குமாறு அட்டர்னி ஜெனரல் ஆர். வெங்கடரமணி விடுத்த கோரிக்கையை ஏற்று வழக்கு ஒத்து வைக்கப்பட்டது.

இந்தசூழலில் தலைமை நீதிபதி கவாய், இத்தகைய தந்திரோபாயங்களில் மத்திய அரசு ஈடுபடும் என்று நான் எதிர்பார்க்கவில்லை என்று கடுமையாக விமர்சித்தார்.

தனது ஓய்வு காலம் நெருங்குவதால் தனது அமர்வைத் தவிர்க்கும் முயற்சியாகவே இக்கோரிக்கை முன்வைக்கப்பட்டதாக கருதுகிறேன் என்று தெரிவித்த தலைமை நீதிபதி,

அரசுக்கு எதிரான வழக்கை என் தலைமையிலான அமர்வு விசாரிப்பதை மத்திய அரசு விரும்பவில்லை.

மத்திய அரசு திட்டமிடப்பட்ட விசாரணைக்கு முன்னதாக நள்ளிரவில் ஒரு மனுவை தாக்கல் செய்வதன் மூலம் இதுபோன்ற செயல்களில் ஈடுபடும் என்று எதிர்பார்க்கவில்லை” என்று கூறியுள்ளார்.

தலைமை நீதிபதியின் கருத்து நாடு முழுவதும் கவனத்தை பெற்றுள்ளது.

நீதிபதி கவாயின் பதவிக்காலம் 2025 நவம்பர் 23 ஆம் தேதி முடிவடைய உள்ளது. 

இந்த குறுகிய காலத்தில் அவர் பல சவால்களையும், முக்கிய நிகழ்வுகளையும் சந்தித்துள்ளார்.

கடந்த அக்டோபர் 6, 2025 அன்று, உச்ச நீதிமன்றத்தில் ஒரு வழக்கறிஞர் நீதிபதி பி.ஆர். கவாய் மீது காலணி வீச முயன்ற சம்பவம் தேசிய அளவில் அதிர்ச்சியை ஏற்படுத்தியது. காஜுராஹோவில் உள்ள விஷ்ணு சிலை தொடர்பான வழக்கில் அவர் ஒரு கருத்தைத் தெரிவித்ததை அடுத்து இந்த சம்பவம் நிகழ்ந்தது.

இத்தகைய தாக்குதல் முயற்சிக்குப் பிறகும், நீதிபதி கவாய் அமைதியாக இருந்து, இதுபோன்ற சம்பவங்கள் தன்னை பாதிக்காது என்று குறிப்பிட்டது அவரது மன உறுதியை வெளிப்படுத்தியது.

மேலும், நவம்பர் 3, 2025 அன்று, நீதிபதி பி.ஆர். கவாய் மற்றும் நீதிபதி கே. வினோத் சந்திரன் அடங்கிய அமர்வு, தன்னை உயர் நீதிமன்ற நீதிபதியாக நியமிக்கக் கோரி ஒரு வழக்கறிஞர் தாக்கல் செய்த மனுவை “கேலி” என்று கடுமையாக விமர்சித்தது. இத்தகைய மனுக்களைத் தாக்கல் செய்ததற்காக வழக்கறிஞரின் சட்டப் பயிற்சி உரிமத்தை ரத்து செய்ய வேண்டும் என்றும் நீதிபதி கவாய் கூறினார். இது நீதிமன்றத்தின் நேரத்தை வீணடிப்பதை தடுக்கும் நோக்கில் எடுக்கப்பட்ட ஒரு கடுமையான கருத்தாகப் பார்க்கப்படுகிறது.

தீர்ப்புகளும், பங்களிப்புகளும்

நீதிபதி பி.ஆர். கவாய், இந்தியாவின் 52வது தலைமை நீதிபதியாக மே 14, 2025 அன்று பதவியேற்றார். இவர் பட்டியல் சமூகத்தைச் சேர்ந்த இரண்டாவது தலைமை நீதிபதி ஆவார். தனது ஆறு மாத கால பதவிக்காலத்திலும், உச்ச நீதிமன்ற நீதிபதியாக அவர் பணியாற்றிய காலத்திலும் பல முக்கியத் தீர்ப்புகளை வழங்கியுள்ளார்.

• சரத்து 370 ரத்து: ஜம்மு காஷ்மீருக்கு சிறப்பு அந்தஸ்து வழங்கிய சரத்து 370-ஐ ரத்து செய்ததை உறுதி செய்த ஐந்து நீதிபதிகள் கொண்ட அரசியலமைப்பு பெஞ்சில் இவரும் ஒரு உறுப்பினராக இருந்தார்.
• தேர்தல் பத்திரத் திட்டம்: தேர்தல் பத்திரத் திட்டத்தை ஒருமனதாக ரத்து செய்த அரசியலமைப்பு பெஞ்சில் இவர் இடம்பெற்றிருந்தார். இது குடிமக்களின் தகவல் அறியும் உரிமையை மீறுவதாகக் கருதப்பட்டது.
• ராகுல் காந்தியின் தண்டனைக்கு தடை: 2023 ஆம் ஆண்டில், கிரிமினல் அவதூறு வழக்கில் ராகுல் காந்தியின் தண்டனைக்கு தடை விதித்த பெஞ்சில் நீதிபதி கவாய் இடம்பெற்றிருந்தார்.
• பட்டியல் சாதியினரிடையே துணைப் பிரிவுகள்: இட ஒதுக்கீட்டுப் பலன்கள் மிகவும் பின்தங்கியவர்களைச் சென்றடைவதை உறுதி செய்ய, பட்டியல் சாதியினரிடையே துணைப் பிரிவுகளை அனுமதிப்பது சட்டப்பூர்வமானது என்று தீர்ப்பளித்த ஏழு நீதிபதிகள் கொண்ட அரசியலமைப்பு பெஞ்சில் இவரும் இடம்பெற்றிருந்தார்.
• பணமதிப்பழிப்பு நீக்கத் தீர்ப்பு (2023): 2016 ஆம் ஆண்டு மத்திய அரசின் பணமதிப்பழிப்பு நீக்கத் திட்டத்தை உறுதி செய்த பெரும்பான்மை கருத்தை அவர் எழுதினார்.

தலைமை நீதிபதியின் ஓய்வு நெருங்கும் இந்த வேளையில், அவரது தீர்ப்புகளும், செயல்பாடுகளும் தொடர்ந்து கூர்ந்து கவனிக்கப்படுகின்றன.