கடந்த சில நாட்களாக வாட்ஸ்அப் மற்றும் சமூக வலைத்தளங்களில் ஆண்களை, குறிப்பாகக் கணவன்மார்களைக் கதிகலங்க வைக்கும் ஒரு செய்தி பரவி வருகிறது. “புதிய சட்டப்படி (BNS), இனி கணவன் மது அருந்த வேண்டுமென்றால் மனைவியிடம் அனுமதி வாங்க வேண்டும். இல்லையென்றால் 3 வருடம் ஜெயில்!” என்பதுதான் அந்தத் தகவல்.
இது உண்மையா? அல்லது வழக்கம் போல ஒரு இணைய வதந்தியா? பாரதிய நியாய சன்ஹிதா (BNS) சட்டப்பிரிவு 85 உண்மையில் என்ன சொல்கிறது?
வதந்தியும் உண்மையும்: நேரடியாகச் சொன்னால், “மனைவியிடம் எழுத்துப்பூர்வ அனுமதி வாங்க வேண்டும்” என்று சட்டத்தில் எங்கும் குறிப்பிடப்படவில்லை. ஆனால், மறைமுகமாக ஆண்களுக்கு ஒரு பெரிய ‘செக்போஸ்ட்’ வைக்கப்பட்டுள்ளது உண்மைதான்.
பழைய ஐபிசி சட்டத்தில் 498A (கணவன் மற்றும் உறவினர்களால் கொடுமைப்படுத்துதல்) என்று இருந்த பிரிவுதான், இப்போது புதிய BNS சட்டத்தில் பிரிவு 85 ஆக மாற்றப்பட்டுள்ளது.
பிரிவு 85 சொல்வது என்ன? “ஒரு பெண்ணின் கணவனோ அல்லது கணவனின் உறவினரோ அப்பெண்ணைக் கொடுமைப்படுத்தினால், அவர்களுக்கு 3 ஆண்டுகள் வரை சிறைத் தண்டனையும், அபராதமும் விதிக்கப்படும்” என்கிறது இந்தப் பிரிவு.
இங்கு “கொடுமை” (Cruelty) என்பதற்கு வரையறை விரிவுபடுத்தப்பட்டுள்ளது:
- பெண்ணின் உடலுக்கோ அல்லது மனதுக்கோ ஊறு விளைவித்தல் (Mental or Physical harm).
- தற்கொலைக்குத் தூண்டும் வகையில் நடந்துகொள்ளுதல்.
- வரதட்சணை கேட்டுத் துன்புறுத்துதல்.
குடிப்பழக்கம் எப்படி இதில் சிக்கும்? இங்குதான் “மது” உள்ளே வருகிறது. ஒரு கணவன் மது அருந்திவிட்டு வந்து, மனைவியை அடித்தாலோ அல்லது தகாத வார்த்தைகளில் திட்டினாலோ, அது “பெண்ணின் மனநலத்தைப் பாதிக்கும் செயல்” (Mental Cruelty) ஆகக் கருதப்படும்.
மனைவிக்கு விருப்பம் இல்லாத நிலையில், தொடர்ந்து குடித்துவிட்டு வந்து ரகளை செய்தால், மனைவி காவல் நிலையத்தில் பிரிவு 85-ன் கீழ் புகார் அளிக்கலாம். “என் கணவரின் குடிப்பழக்கத்தால் எனக்கு மன உளைச்சல் ஏற்படுகிறது, என் உயிருக்கு ஆபத்து உள்ளது” என்று அவர் வாக்குமூலம் கொடுத்தால் போதும், அது ஜாமீனில் வெளிவர முடியாத குற்றமாக (Non-Bailable Offence) மாற வாய்ப்புள்ளது.
ஆபத்து எங்கே? இதற்கு முன்பு வரை உடல்ரீதியான தாக்குதல் இருந்தால் மட்டுமே போலீஸ் கேஸ் என்ற நிலை இருந்தது. ஆனால், புதிய சட்டத்தில் “மன ஆரோக்கியம்” (Mental Health) முக்கியத்துவம் பெறுவதால், குடித்துவிட்டுப் புலம்புவது, சண்டை போடுவது கூடச் சிறை தண்டனைக்கு வழிவகுக்கலாம்.
“பர்மிஷன் ஸ்லிப்” வாங்கத் தேவையில்லைதான். ஆனால், உங்கள் குடிப்பழக்கம் உங்கள் மனைவியின் நிம்மதியைக் கெடுத்தால், சட்டம் உங்கள் மீது பாயத் தயாராக இருக்கிறது. குடும்பத்தில் மகிழ்ச்சியும், மரியாதையும் இருந்தால் சட்டத்தைப் பற்றிக் கவலைப்படத் தேவையில்லை. ஆனால், வரம்பு மீறினால்… கம்பி எண்ண நேரிடும்!