பிகார் தேர்தலில் பாஜகவின் செயல்பாடு – அடங்காத அரக்கனும் ஊடகங்களின் உறக்கமும்!

பாமீலா பிலிப்போஸ்

பிகார் தேர்தல்கள் முடிந்துவிட்டன. தீர்ப்பு வெளிவந்துவிட்டது. தீவிரமான அலசல்கள் நடத்தப்பட்டுவிட்டன. பிகாரைப் பற்றி இனி ஊடகங்கள் கண்டுகொள்ளாது. பாலங்கள் விழுவது அல்லது படகுகள் கவிழ்வது போன்ற செய்திகள் வந்தால் மட்டுமே ஊடகங்கள் விழித்துக்கொள்ளும். தேர்தல்கள் இல்லாதபோது, பிகார் பெரும்பாலும் அதன் துயரங்களின் காரணமாகவே தேசியச் செய்திகளில் இடம்பிடிக்கிறது.

ஆனால், இந்தியா எங்கு செல்கிறது என்று அக்கறை கொள்ளும் ஒரு ஊடகவியலாளர், பிகார் முடிவுகளுக்குப் பிறகு வேறு விஷயங்களில் கவனம் செலுத்தினால் போதும் என்று முடிவெடுக்க முடியாது. ஊடகத்தின் கவனம் தேவைப்படும் முற்றுப்பெறாத பல விஷயங்கள் இன்னும் உள்ளன. பிகார் தேர்தல்களுக்குப் பிறகு பிகாரைப் பற்றிச் சொல்வதற்கு வேறு எதுவும் இல்லை என்று வேறு வேலையைப் பார்க்கச் சென்றுவிடுவது நாட்டிற்குச் செய்யப்படும் பெரிய தீங்காக இருக்கும்.

ஊடகங்களின் பாராமுகம் இந்தத் தேர்தலின் இயல்புக்கு மாறான தன்மையை அங்கீகரிக்கத் தவறியதைக் குறிக்கும். “தேர்தல் களம் சமமாக இல்லை; மேற்பார்வை நிறுவனங்கள் வளைக்கப்பட்டுள்ளன; நிர்வாக அதிகாரம் உண்மையான கட்டுப்பாடு இல்லாமல் செயல்படுகிறது,” என்று ஆனந்த் டெல்டும்டே தி வயர் இணையதளத்தில் எழுதினார்.

இரண்டாவதாக, இந்த தேர்தல் நடந்த போக்கைக் கண்டுகொள்ளாமல் இருந்துவிட்டால், ஆளுங்கட்சியின் அசுர வலிமை கொண்ட புல்டோசர் போன்ற தேர்தல் இயந்திரம், தேர்தல் ஆணையத்தின் நிறுவன ரீதியான ஆதரவுடன், அடுத்த ஆண்டு அசாம், வங்காளம், புதுச்சேரி, தமிழ்நாடு, கேரளா ஆகிய மாநிலங்களில் நடைபெறவிருக்கும் தேர்தல்களின் களத்தில் ஆதிக்கம் செலுத்துவதற்கான துணிச்சலைப் பெற்றுவிடும்.

பாஜகவின் தேர்தல் இயந்திரத்தின் உருமாற்றம்

ஒருகாலத்தில் பாஜகவின் இந்தத் தேர்தல் இயந்திரம் அரசியல் ஆய்வாளர்களிடமிருந்து பெரும் பாராட்டுகளைப் பெற்றிருந்தது. அதன் நிர்வாகத் திறமையையும் விவரங்கள் சார்ந்த துல்லியமான அறிவையும் பாராட்டி எண்ணற்ற செய்தித்தாள் கட்டுரைகள் வெளிவந்தன. 2017இல், பிரசாந்த் ஜாவின் “How the BJP Wins: Inside India’s Greatest Election Machine” என்ற புத்தகம், அமித் ஷா கட்சியின் உறுப்பினர் பிரச்சாரத்தை வடிவமைத்த விதம்; “பயிற்சி ஊழியர்கள், அமைப்புத் தேர்தல்கள், அமைப்பில் சமூகத்தின் பன்முகத்தன்மையை உறுதி செய்வதற்கான தேவையை” வலியுறுத்தியது; “தேர்தல் சம்பந்தப்பட்ட பிரச்சினைகள் குறித்த சுதந்திரமான கருத்துக்களைப் பெற்று, அதைச் சுற்றி பிரச்சாரங்களையும் மக்கள் தொடர்புகளையும்” அமித் ஷா செதுக்கியது போன்ற பலவற்றைக் குறிப்பிட்டது.

தேர்தல்களில் வெற்றி பெறுவதுதான் பாஜகவின் தீவிர அதிகார வேட்கையின் மையக் கொள்கை என்பது இந்தப் பதிவுகளில் தெளிவாக வெளிப்பட்டது. ஆனால் அந்த கட்டத்தில், அதன் தேர்தல் இயந்திரம் நிர்ணயிக்கப்பட்ட தேர்தல் விதிமுறைகளால் கட்டுப்படுத்தப்பட்டிருந்தது என்றும் ஊடகங்கள் கூறின. காலப்போக்கில், முடிவற்ற பணப்புழக்கத்தால் அதன் தோல் தடித்துவிட்டது. அதீதமான அதிகாரம் என்னும் உரத்தால் அசுர பலம் பெற்ற இந்த இயந்திரம், ஒழுக்கத்தின் எல்லைகளை மீறத் தொடங்கியது. இப்போது பாஜக கட்சியின் தேர்தல் இயந்திரம் மட்டுமல்ல, நாட்டின் தேர்தல் செயல்முறையை மேற்பார்வையிட்டு ஒழுங்குபடுத்தும் இந்தியத் தேர்தல் ஆணையம், பிரதான ஊடகங்கள் உட்பட அனைத்து நிறுவனங்களும் பாஜகவின் செயல்திட்டத்திற்கு இணக்கமாகச் செயல்படவைப்பதற்கான முயற்சி நடக்கிறது.

கட்சியின் அதிகாரம் சார்ந்த லட்சியத்திற்கும் கேட்பாரற்ற தன்மையின் எல்லைகளுக்கும் இடையில் இருந்த எதையும் பாஜக தேர்தல் இயந்திரம் என்னும் புல்டோசர் விட்டுவைக்கவில்லை. 2024 பொதுத் தேர்தல் இந்த முயற்சிக்கு ஒரு தடையாக இருந்திருக்கலாம். ஆனால் அதில் வெளியான முடிவுகள் எந்தச் சூழ்நிலையிலும், எந்த விலை கொடுத்தேனும் வெற்றியைப் பெறுவதற்கான பாஜகவின் உறுதியை வலுப்படுத்தின. ஹரியானா, மகாராஷ்டிரா, டெல்லி, பிகார் ஆகிய மாநிலங்களில் கிடைத்த முடிவுகள் இந்த இலக்கை அடைவதில் அதன் வெற்றியை உறுதிப்படுத்துகின்றன.

வலிமை வளர்ந்த விதம்

பாஜக தேர்தல் இயந்திரத்தைச் சுற்றி வளர்ந்த சொல்லாடல்கள் இரண்டு முக்கிய தாக்கங்களைக் கொண்டிருந்தது. ஒன்று, இது பாஜகவின் வெல்ல முடியாத தன்மையைப் பிற கட்சிகளுக்கான கவர்ச்சிகரமான வாய்ப்பாக மாற்றியது. இதனால் சிறிய கட்சிகள் பாஜகவுடன் இணைவதற்கு வழி தேடின, இது என்டிஏ கூட்டணியின் வலிமையைப் பெருக்கியது. உதாரணமாக, கடந்த முறை சிராஜ் பாஸ்வானின் லோக் ஜனசக்தி கட்சி தனித்து போட்டியிட்டது. இந்த முறை அது பாஜக தலைமையிலான கூட்டணியுடன் இணைவதே புத்திசாலித்தனம் என்ற முடிவுக்கு வந்தது. தங்கள் கட்சிகளைக் கைவிட்டு பாஜகவில் சேர துடிக்கும் சந்தர்ப்பவாதத் தலைவர்களுக்கும் இது பொருந்தும்.

பாஜகவின் வெற்றி முன்கூட்டியே கணிக்கப்பட்டு, சாதாரணமாக எடுத்துக்கொள்ளப்படுவதால், சந்தேகத்திற்குரிய தேர்தல் நடைமுறைகளுக்கான பாதுகாப்புக் கவசத்தை இது வழங்குகிறது. விழிப்புடனும் சுதந்திரமாகவும் இருக்கும் ஊடகங்கள் பாஜகவின் நுணுக்கமான தந்திரங்களின் அடுக்குகளை ஊடுருவி, வாக்காளர்களுக்கு விழிப்புணர்வு ஊட்டியிருக்கலாம். ஆனால் அது நடக்கவில்லை.

இந்த ஏமாற்றத்தின் நெடுஞ்சாலையில் ஊடக அலட்சியமும் மந்தநிலையும் இந்திய வாக்காளர்களைக் கைவிட்டுவிட்டன. இந்தியத் தேர்தல் ஆணையத்திற்கான தேர்வுக் குழுவில் பிரதமர், மத்திய உள்துறை அமைச்சர் ஆகியோர் மூன்று உறுப்பினர்களில் இரண்டு பேராக இருந்தபோது தேர்தல் ஆணையம் மறுசீரமைக்கப்பட்டது. இவ்வாறுதான், பணிவுள்ள, தந்திரமான, அதிகார மையத்துக்குச் சலாம் போடும் ஒருவர் தலைமைத் தேர்தல் ஆணையராக நியமிக்கப்பட்டார். அவருடன் நியமனம் பெற்ற இருவரும் எதற்கும் வாயைத் திறப்பதில்லை.

அதிர்ச்சிக்குரிய மௌனம்

பிகாரில் தேர்தல் வேகம் பெற்றுக் கொண்டிருந்தபோது மற்றொரு கொடூரமான செயல் நடந்தது. நடத்தை விதிகள் நடைமுறைக்கு வந்தபோதிலும், “முதலமைச்சர் நிதீஷ் குமார்” என்ற பெயரில் பெண்களுக்கு ரூ. 10,000 போனஸ் வழங்கப்பட்டது. இது அவர்கள் தேஜகூவிற்கு வாக்களிப்பதை உறுதிசெய்தது. செய்தித்தாள்களில் இதுகுறித்துச் சில விமர்சனங்கள் வந்தபோதிலும், பணப்புழக்கத்தை நிறுத்தும் அளவிற்கான கோபம் வெளிப்படவில்லை. கடைசிக் கட்டத்தில் நடந்ததால் ஒன்றும் செய்ய முடியவில்லை என்னும் சாக்கு எடுபடாது. முதல் கட்ட வாக்கெடுப்புக்கு நான்கு நாட்களுக்கு முன்பு பிரசாந்த் பூஷண் இது குறித்து ட்வீட் செய்தார் என்றால் ஊடகங்களால் ஏன் இதைப் பற்றிப் பேச முடியாது?

தேர்தல் ஆணையத்தின் சலாம் போடும் அதிகாரியும் அவருக்குத் துணையாக இருக்கும் இரண்டு பேசாமடந்தைகளும் அந்தப் பணம் தடையின்றி அந்தப் பெண்களின் வங்கிக் கணக்குகளில் சென்றபோது வாயைத் திறக்கவில்லை.

வாக்காளர் பட்டியல்களின் சிறப்புத் தீவிரத் திருத்தம் (Special Intensive Revision – SIR) குறித்து ஊடகங்களில் ஆங்காங்கே கோபம் வெளிப்பட்டது. ஆனால் பெரும்பாலும் அச்சு மற்றும் டிஜிட்டல் ஊடகங்களில் மட்டுமே அது காணப்பட்டது. இந்த நடவடிக்கை இந்தியா முழுமைக்குமாக நகரும்போது ஊடகங்கள் தூங்கிக்கொண்டிருக்காது என்று நம்புவோமாக. SIR பிகாரில் வாக்கெடுப்பு முடிவுகளை எவ்வாறு மாற்றியிருக்கலாம் என்பது குறித்த சுவாரஸ்யமான தரவுகள் வெளிவந்துகொண்டிருக்கின்றன.

நவம்பர் 20 அன்று, தி டைம்ஸ் ஆஃப் இந்தியா, தி இந்தியன் எக்ஸ்பிரஸ் ஆகிய இரண்டும் இது குறித்து முக்கியமான கட்டுரைகளை வெளியிட்டன. SIRஇன் ஒரு பகுதியாக அதிகபட்ச நீக்கங்களைப் பதிவுசெய்த இடங்களில் மட்டுமல்லாமல் அதிகபட்ச புதிய வாக்காளர்களைச் சேர்த்த இடங்களிலும் தேஜகூ எப்படி “ஆதிக்கம் செலுத்தும் சக்தியாக” இருந்தது என்பதைப் பற்றி தி இந்தியன் எக்ஸ்பிரஸ் எழுதியது. மிகவும் முக்கியமான இந்தக் கட்டுரைகள் முதல் பக்கத்தில் வந்திருக்க வேண்டும். ஏன் பின் பக்கத்தில் புதைக்கப்பட்டன?

இவை அனைத்தும் பாஜகவின் தேர்தல் பிரச்சார இயந்திரம் என்னும் ராட்சசனின் வலிமை வளர்ந்துவருவதற்கும் ஊடகங்களின் நெடுதுயிலுக்கும் சான்றாக உள்ளன.

பாமீலா பிலிப்போஸ், தி வயர் இணைய இதழின் வாசகர் தரப்பு ஆசிரியர் (Ombudsperson)

நன்றி: தி வயர் இணைய இதழ்