“என்னதான் படிச்சாலும் பேங்க் வேலைங்கறது எட்டாக் கனியாவே இருக்கே… ஐபிபிஎஸ் (IBPS) கட்-ஆஃப் வேற எகிறிக்கிட்டே போகுது!” என்று புலம்பும் பட்டதாரிகளுக்கு… இதோ ஒரு ஆறுதலான, அதே சமயம் நம்பிக்கையான செய்தி!
இந்தியாவின் முன்னணி பொதுத்துறை வங்கிகளில் ஒன்றான பேங்க் ஆஃப் இந்தியா (Bank of India), நாடு முழுவதும் உள்ள தனது கிளைகளில் காலியாக உள்ள பணியிடங்களை நிரப்பப் புதிய அறிவிப்பை வெளியிட்டுள்ளது. இது நேரடி நிரந்தரப் பணி இல்லையென்றாலும், வங்கித்துறையில் நுழையத் துடிக்கும் இளைஞர்களுக்கு இது ஒரு மிகச்சிறந்த நுழைவுவாயில்!
வேலை என்ன?
வங்கியின் பல்வேறு கிளைகளில் ‘அப்ரண்டிஸ்’ (Apprentice) எனப்படும் தொழிற்பயிற்சியாளர் பணியிடங்கள் நிரப்பப்பட உள்ளன. இது ஓராண்டு காலப் பயிற்சிப் பணியாகும். வங்கி நடைமுறைகள், வாடிக்கையாளர் சேவை போன்றவற்றை நேரடியாகக் கற்றுக்கொள்ள இது ஒரு அரிய வாய்ப்பு.
யாரெல்லாம் விண்ணப்பிக்கலாம்?
இந்த வேலைக்கு விண்ணப்பிக்கப் பெரிய முன் அனுபவம் எதுவும் தேவையில்லை.
- கல்வித் தகுதி: அங்கீகரிக்கப்பட்ட பல்கலைக்கழகத்தில் ஏதேனும் ஒரு பட்டப்படிப்பு (Any Degree – BA, BSc, BCom, BTech, etc.) முடித்திருக்க வேண்டும்.
- வயது வரம்பு: விண்ணப்பதாரர்கள் 20 வயது முதல் 28 வயதுக்கு உட்பட்டவராக இருக்க வேண்டும். (இடஒதுக்கீட்டுப் பிரிவினருக்கு அரசு விதிகளின்படி 3 முதல் 5 ஆண்டுகள் வரை வயது வரம்பில் தளர்வு உண்டு).
- மொழி அறிவு: எந்த மாநிலத்திற்கு விண்ணப்பிக்கிறீர்களோ, அந்த மாநிலத்தின் உள்ளூர் மொழி (Local Language) எழுதவும், படிக்கவும், பேசவும் தெரிந்திருக்க வேண்டும். தமிழ்நாட்டில் விண்ணப்பிப்பவர்களுக்குத் தமிழ் தெரிந்திருப்பது கட்டாயம்.
சம்பளம் (Stipend) எவ்வளவு?
தேர்வு செய்யப்படும் அப்ரண்டிஸ்களுக்கு, மாதந்தோறும் ஊக்கத்தொகையாக (Stipend) ரூ.15,000 வழங்கப்படும். இதுபோகப் பயணப்படி போன்ற இதர சலுகைகளும் கிடைக்க வாய்ப்புள்ளது.
தேர்வு முறை:
- ஆன்லைன் எழுத்துத் தேர்வு: பொது அறிவு (General Awareness), ஆங்கிலம், ரீசனிங் (Reasoning) மற்றும் கணினி அறிவு சார்ந்த கேள்விகள் கேட்கப்படும்.
- உள்ளூர் மொழித் தேர்வு: எழுத்துத் தேர்வில் தேர்ச்சி பெற்றவர்களுக்கு உள்ளூர் மொழித் தேர்வு நடத்தப்படும்.
விண்ணப்பிப்பது எப்படி?
விருப்பமும் தகுதியும் உள்ளவர்கள் பேங்க் ஆஃப் இந்தியாவின் அதிகாரப்பூர்வ இணையதளமான bankofindia.co.in மூலம் ஆன்லைனில் மட்டுமே விண்ணப்பிக்க வேண்டும்.
நிறைய பேர் ‘அப்ரண்டிஸ் தானே, இது பர்மனன்ட் வேலை இல்லையே’னு யோசிப்பீங்க. ஆனா, சும்மா வீட்ல இருக்கறதுக்கு, ஒரு நேஷனலைஸ்டு பேங்க்ல (Nationalised Bank) வேலை பார்க்குறது எவ்வளவோ மேல்!
சர்டிபிகேட் வேல்யூ: இந்த ஓராண்டு பயிற்சியை முடிச்சா, உங்களுக்கு ‘National Apprenticeship Certificate’ கிடைக்கும். இது எதிர்காலத்துல வேற பேங்க் வேலைக்கோ அல்லது தனியார் நிறுவன வேலைக்கோ போகும்போது உங்க சிவி-க்கு (CV) பெரிய வெயிட் கொடுக்கும்.
படிக்க டைம் கிடைக்கும்: வேலை பளு ரொம்ப அதிகமா இருக்காது. அதனால, பேங்க்ல வேலை பார்த்துக்கிட்டே, அடுத்த ஐபிபிஎஸ் அல்லது டிஎன்பிஎஸ்சி தேர்வுகளுக்குப் படிக்கலாம். கைச்செலவுக்கு மாசம் 15,000 ரூபாயும் ஆச்சு, படிச்ச மாதிரியும் ஆச்சு!
லோக்கல் போஸ்டிங்: பெரும்பாலும் சொந்த மாவட்டத்துல அல்லது பக்கத்து மாவட்டத்துல போஸ்டிங் கிடைக்க வாய்ப்பு அதிகம். அதனால, உடனே அப்ளை பண்ணுங்க!