வரலாறு திரும்புகிறது – செங்கோட்டையனை வரவேற்ற ஆதவ் அர்ஜூனா

அதிமுகவில் இருந்து நீக்கப்பட்ட செங்கோட்டையன் இன்று (நவம்பர் 27) அவரது ஆதரவாளர்களுடன் தமிழக வெற்றிக் கழகத்தில் விஜய் முன்னிலையில் இணைந்தார்.

இதைத்தொடர்ந்து தவெகவின் தேர்தல் பிரசார மேலாண்மைப் பொதுச் செயலாளர் ஆதவ் அர்ஜூனா தவெகவில் உள்ள இளைஞர்களின் வேகத்தோடு, செங்கோட்டையனின் அனுபவம் இணையும் போது 2026 இல் ஒரு பெரிய வரலாற்றை உருவாக்குவோம் என தெரிவித்தார்.

செய்தியாளர்களிடம் பேசிய ஆதவ் அர்ஜூனா, ” வரலாறு திரும்புகிறது. மீண்டும் சொல்கிறோம்.. வரலாறு திரும்புகிறது. செங்கோட்டையன் தன்னுடைய 22 வயதில் ஒரு முடிவு எடுத்தார். 1972ல் கட்சியில் சேர்ந்து 1976 எம்எல்ஏ ஆனார்.

அண்ணனின் வாழ்க்கையில் அவர் எடுத்த இரண்டு மிகப்பெரிய முடிவுகள் மிகப்பெரிய சரித்திரத்தை உருவாக்கி இருக்கிறது. அதில் ஒன்று 72 இல் புரட்சித் தலைவருடன் இணைந்து 76 எம்எல்ஏவாகி 77ல் ஒரு மிகப்பெரிய வரலாற்றை தீய சக்திக்கு எதிராக புரட்சி தலைவர் உருவாக்கினார்.

1989இல் மீண்டும் ஒரு குழப்பங்கள் தமிழகத்தில் உருவானபோது அப்போதும் அண்ணன் எடுத்த முடிவுதான் ஒரு புதிய வரலாற்றை உருவாக்கியது.

அன்றைக்கு புரட்சித்தலைவி அம்மாவுடன் இருந்தார். மூன்றாவது முறையாக வாழ்க்கையில் 2025 இல் ஒரு புதிய வரலாற்றை உருவாக்க தமிழக வெற்றிக் கழகத்தில் இணைந்துள்ளார். 2026 இல் தமிழக வெற்றிக் கழகத்தின் தலைவர் விஜயை முதல்வராக்கி அடுத்த ஒரு வரலாற்றை உருவாக்க இன்றைய தினம் ஒரு முடிவு எடுக்கப்பட்டுள்ளது.

அண்ணனைப் பற்றி தமிழகம் முழுவதும் இந்தியா முழுவதும் எல்லோருக்கும் தெரியும். அதனால் தான் நேற்றிலிருந்து தேசியக் கட்சிகள் முதல் ஆளும் கட்சிகள் வரை அண்ணனின் பின் இருந்தனர். ஆனால் 1977ம் 89ல் தீர்க்கமாக இருந்தது போல் 2026 இல் ஒரு முதலமைச்சரை உருவாக்க தமிழகத்தின் ஊழல் இல்லாத, நேர்மையான ஒரு புதிய நிர்வாகத்தை உருவாக்க இன்றைக்கு எங்களோடு இணைந்து இருக்கிறார்.

55 ஆண்டுகள் உண்மையாகவும், நேர்மையாகவும் ஒரு கட்சியிலிருந்து வெற்றியிலும், தோல்வியிலும், இழப்புகளிலும் அந்த தலைமையுடன் அண்ணன் கடமையுணர்வோடு அங்கிருந்தார்.

அவருக்கு மிகப்பெரிய அனுபவம் உள்ளது.தமிழக வெற்றிக்கழக இளைஞர்களான எங்களுக்கு மிகப்பெரிய வேகம் இருக்கிறது. இப்போது அனுபவம் உள்ள அண்ணன் வந்திருக்கிறார். இதனால் வேகத்தோடு, இந்த அனுபவம் இணையும் போது 2026 இல் ஒரு பெரிய வரலாற்றை உருவாக்குவோம். அதற்கு அண்ணனின் அனைத்து ஆலோசனைகளையும் ஏற்று அவருடன் இணைந்து ஒரு முக்கியத்துவம் உருவாக்குவோம்” என்று தெரிவித்துள்ளார்.