டிஜிட்டல் திண்ணை: ’கை கழுவும்’ பாஜக? ஓபிஎஸ்-ன் புது கட்சி! சாய்ஸ் திமுகவா? தவெகவா?

வைஃபை ஆன் செய்ததும், ”இப்ப போட்டியே புயல்களுக்கும் கட்சிகளுக்கும்தான்” போல என்றபடியே டைப் செய்ய தொடங்கியது வாட்ஸ் அப்.

புயலுக்கும் கட்சிக்கும் என்னய்யா தொடர்பு?

வங்க கடலில் ஒரு புயல் போனதுன்னா அடுத்த புயல் சட்டுன்னு வருதுல்ல.. அது மாதிரி அரசியலிலும் ஒவ்வொரு நாளும் ஒவ்வொரு நாடகமய்யா..

அதான் செங்கோட்டையன் தவெகவுக்கு போயிட்டாரே..

செங்கோட்டையன் போயிட்டாருதான்.. செங்கோட்டையனுடன் ஒரே காரில் பயணம் செய்து, பசும்பொன்னில் ரோடு ஷோ நடத்திய ஓபிஎஸ்ஸை பற்றிதான் சொல்றேன்..

ஓ.. ஓபிஎஸ்-ன் புது கட்சி மேட்டரா?

ஆமா.. இது பற்றி ஓபிஎஸ்-க்கு நெருக்கமானவர்களிடம் விசாரிச்சோம். அப்ப, “போன வருஷமே அண்ணன்கிட்ட (ஓபிஎஸ் கிட்ட) பண்ருட்டியார் (பண்ருட்டி ராமச்சந்திரன்) பேசும்போது, டெல்லியை நாம நம்பி பிரயோஜனமே இல்லை… அன்னைக்கு காங்கிரஸும் சரி.. இன்னைக்கு பாஜகவும் சரி.. நம்பி போனவங்களுக்கு எதுவும் செஞ்சதா சரித்திரமே இல்லை..

அவங்களை நம்பிகிட்டே இருக்காம, நாம தனிவழியை பார்த்துகிட்டாதான் சர்வைவ் பண்ண முடியும்.

அதனால தனிக்கட்சியை தொடங்குறதுதான் சரியா இருக்கும்னு அழுத்தமாகவே சொன்னாரு..

அண்ணனும் கூட சரி ஆரம்பிச்சுடலாம்னு சொன்னாரு.. அப்பதான் காஞ்சிபுரத்துல, ‘அம்மா எம்ஜிஆர் திமுக’ என்ற பெயரில் ஒருத்தரு கட்சியை பதிவு செஞ்சிருந்தாருன்னு தெரிஞ்சது.. அதனால அவருகிட்டயும் பேசினோம்.. அதுக்கு அப்புறமா அண்ணன் அதுல ஆர்வம் காட்டாமலேயே இருந்துட்டாரு..

அண்ணன் தனிக்கட்சி தொடங்குறதுக்கு தயங்குனத்துக்கு காரணமே, செலவுதான்.. தனி ஆபீஸ் போடனும்.. அதுக்குன்னு ரெகுலரா செலவு செய்யனும்.. இதை எல்லாம் கூட்டி கழிச்சு பார்த்துதான் தனிக்கட்சி திட்டத்தை கொஞ்சம் கிடப்பில் போட்டு வெச்சிருந்தாரு..

பாஜக ஏதாவது செஞ்சு அதிமுகவுல மீண்டும் சேர வைக்கும்னுதான் ரொம்பவே நம்பிக்கையா இருந்தாரு அண்ணன்.. ஆனால் பாஜக சைடுல இருந்து எந்த ‘பிடி கொடுக்கிற மாதிரி’ பதிலும் வரலை..

இப்படியே இருக்க முடியாதுன்னுதான் அண்ணன்கிட்ட சொல்லிட்டே மனோஜ் பாண்டியன், திமுகவுக்கு போயிட்டாரு.. அவரு போன உடனே பண்ருட்டியாரும், “எவ்வளவோ சொல்லி பார்த்தேன்.. நீங்க தனிக்கட்சி தொடங்குற மாதிரி இல்லை.. நானும் கூட பொதுவாழ்க்கையில் இருந்தே விலகிக்கலாம்னு நினைக்கிறேன்னு”சொன்னாரு.. இதுக்கு அப்புறம்தான் சென்னையில மீட்டிங் போட்டு தனிக்கட்சியை பத்தி அண்ணன் சொல்லி இருக்கிறாரு” என்றனர்.

ஓஹோ.. இப்ப புரிஞ்சுருச்சுய்யா..

“எங்க அண்ணன் (ஓபிஎஸ்) இப்பவும் பாஜகவை நம்புறாரு.. டிசம்பர் 10-ந் தேதி அதிமுக பொதுக்குழுவை எடப்பாடி பழனிசாமி கூட்டியிருக்கிறாரு.. பாஜக மேலிடம் ஏதாவது நெருக்கடி கொடுத்து எங்களை எல்லாம் கட்சியில மீண்டும் சேர்க்கிறது பற்றி அன்னைக்கு பொதுக்குழுவுல முடிவு எடுத்தாலும் எடுப்பாங்கன்னு நம்புறாரு” என்ற தகவலையும் ஷேர் செய்தனர் ஓபிஎஸ்-க்கு நெருக்கமானவர்கள்.

அப்படி அதிமுக பொதுக்குழுவில் எந்த முடிவும் எடுக்கலைன்னா?

இதே கேள்வியைத்தான் நாமும் ஓபிஎஸ் சோர்ஸ்களிடம் கேட்டோம். அதுக்கு, “மீண்டும் அதிமுகவுல சேர வாய்ப்பே இல்லை.. எந்த கதவுமே திறக்கலைன்னு முடிவு செஞ்சுட்டாருன்னா உடனே தனிக்கட்சியை அறிவிச்சுடுவாரு.. அதுக்குதான் டிசம்பர் 15-ந் தேதியை பிக்ஸ் பண்ணியிருக்காரு.

அப்படி தனிக்கட்சியே தொடங்குனாலும் அண்ணனோட முதல் சாய்ஸ் பாஜக கூட்டணிதான்.. எங்க கட்சி பாஜகவோட கூட்டணி வைக்கும்; பாஜக, அதிமுகவோட கூட்டணி வைக்கும்.. அதுல எங்களுக்கு பிரச்சனை இல்லை..

போன பீகார் தேர்தலில் இப்படிதான் சிராக் பாஸ்வான் கட்சியோட பாஜக கூட்டணி வெச்சது; இன்னொரு பக்கம், சிராக் பாஸ்வானை எதிர்க்கிற நிதிஷ்குமாருடன் கூட்டணி அமைச்சது பாஜக..

இது ஒர்க் அவுட் ஆகிடும்னு நினைக்கிறோம்..

அங்க அதிமுக ரொம்பவே எதிர்ப்பு தெரிவிச்சு
பாஜக கூட்டணியில சேர முடியாம போனால் அடுத்து திமுக கூட்டணியா? தவெக கூட்டணியான்னு அப்ப முடிவெடுக்கலாம்னு இருக்கிறோம்” என்று சொல்வதாக டைப் செய்தபடியே சென்ட் பட்டனை தட்டிவிட்டு ஆப் லைனுக்கு போனது வாட்ஸ் அப்.