மாலை நேரம் வந்தாலே குழந்தைகளுக்கு “ஸ்நாக்ஸ் வேணும்” என்ற பசி வந்துவிடும். வழக்கமாக நாம் கடையில் விற்கும் சிப்ஸ் அல்லது எண்ணெயில் பொரித்த பிரெஞ்சு ஃப்ரைஸ் (French Fries) வாங்கிக் கொடுப்போம். ஆனால், அதிகம் எண்ணெய் இருப்பதால் அது உடல்நலத்திற்குத் தீங்கு.
அதற்கு மாற்றாக, இப்போது இன்ஸ்டாகிராம் மற்றும் யூடியூபில் வைரலாகி வரும் ஒரு புதுவிதமான சிற்றுண்டி தான் ‘ஸ்மாஷ்ட் பொட்டேட்டோ’ (Smashed Potatoes).
அது என்ன ‘ஸ்மாஷ்ட் பொட்டேட்டோ’? பெயரே வித்தியாசமாக இருக்கிறதா? ‘Smash’ என்றால் நசுக்குவது என்று பொருள். உருளைக்கிழங்கை வேகவைத்து, அதைத் தட்டையாக நசுக்கி, மொறுமொறுவென வாட்டி எடுப்பதுதான் இந்த டிஷ்.
- வெளியே நல்ல மொறுமொறுப்பாகவும் (Crispy), உள்ளே பஞ்சு போல மென்மையாகவும் இருப்பதுதான் இதன் ஸ்பெஷல்.
- முக்கியமாக, இதைச் செய்ய அதிக எண்ணெய் தேவையில்லை.
தேவையான பொருட்கள்:
- குட்டி உருளைக்கிழங்குகள் (Baby Potatoes) – 1/2 கிலோ
- ஆலிவ் ஆயில் அல்லது சமையல் எண்ணெய் – 3 ஸ்பூன்
- பூண்டு (பொடியாக நறுக்கியது)
- மிளகுத் தூள், உப்பு
- கொத்தமல்லி அல்லது புதினா.
செய்முறை:
- வேகவைத்தல்: குட்டி உருளைக்கிழங்குகளைத் தோலுடனேயே நன்கு கழுவி, உப்பு சேர்த்து குக்கரில் வேகவைத்துக் கொள்ளுங்கள். (குழைந்துவிடக் கூடாது, முக்கால் பதம் வெந்தால் போதும்).
- நசுக்குதல் (The Smash): வெந்த உருளைக்கிழங்கை ஒரு தட்டில் வையுங்கள். ஒரு தட்டையான டம்ளர் அல்லது கிண்ணத்தின் அடிப்பகுதியைக் கொண்டு, ஒவ்வொரு உருளைக்கிழங்கின் மீதும் மெதுவாக அழுத்துங்கள். அது தட்டையாக வடை போல மாறும். உடையாமல் பார்த்துக்கொள்ளுங்கள்.
- மசாலா தடவுதல்: ஒரு கிண்ணத்தில் எண்ணெய், நறுக்கிய பூண்டு, மிளகுத் தூள் மற்றும் உப்பு சேர்த்துக் கலக்குங்கள். இந்தக் கலவையைத் தட்டையாக இருக்கும் உருளைக்கிழங்கின் மீது பிரஷ் (Brush) செய்யுங்கள்.
- வாட்டுதல் (Bake/Roast): உங்களிடம் அவன் (Oven) அல்லது ஏர் ஃப்ரையர் (Air Fryer) இருந்தால், அதில் வைத்து 20 நிமிடங்கள் சிவக்க விடுங்கள். இல்லையென்றால், தோசைக் கல்லில் எண்ணெய் விட்டு, இரண்டு பக்கமும் பொன்னிறமாக, மொறுமொறுவென ஆகும் வரை வறுத்து எடுங்கள்.
சர்விங் டிப்ஸ்: சுடச்சுட இருக்கும் இந்த ஸ்மாஷ்ட் பொட்டேட்டோவுடன், மயோனைஸ் (Mayonnaise) அல்லது தக்காளி சாஸ் தொட்டுச் சாப்பிட்டால் சுவை அள்ளும். பிரெஞ்சு ஃப்ரைஸை விட இது ஆரோக்கியமானது மற்றும் சுவையானது.
இன்றைய ஈவ்னிங் ஸ்நாக்ஸ் ரெடி! ட்ரை பண்ணிப் பாருங்க!