கோவை தொண்டாமுத்தூர் அருகே விவசாய பயிர்களை சேதப்படுத்தியதால் பிடிக்கப்பட்டு ஆனைமலை வனப்பகுதியில் விடப்பட்ட ரோலக்ஸ் யானை நேற்று மேய்ச்சலில் இருந்த போது வழுக்கி விழுந்து உயிரிழந்ததாக ஆனைமலை புலிகள் காப்பக கள இயக்குநர் வெங்கடேஷ் தெரிவித்துள்ளார்.
கோவை மாவட்டம் தொண்டாமுத்தூர் அருகே கெம்பனூர் பகுதியில் விவசாய பயிர்களை ரோலக்ஸ் என்ற காட்டு யானை சேதப்படுத்துவதாக அப்பகுதி மக்கள் தொடர்ந்து குற்றம் சாட்டி வந்தனர். இதையடுத்து கடந்த அக்டோபர் 17ம் தேதி கும்கி யானை உதவியுடன் மயக்க மருந்து செலுத்தி வனத்துறையினர் ரோலக்ஸ் யானை பிடித்தனர். பின்னர் டாப்சிலிப்பில் உள்ள வரகளியாறு முகாமிற்கு அனுப்பப்பட்ட ரோலக்ஸ் யானை அங்கிருந்த மரக்கூண்டில் ஒரு மாதம் வரை அடைத்து வைக்கப்பட்டது.
ஒரு மாதத்திற்கு பின்னர் கடந்த நவம்பர் 12ம் தேதி ரோலக்ஸ் யானையை வனத்துறையினர் விடுவித்தனர். தொடர்ச்சியாக யானையின் நடமாட்டத்தை வனத்துறையினர் கண்காணித்து வந்தனர். மந்திரி மட்டம் பகுதியில் ரோலக்ஸ் யானை இறந்த நிலையில் கிடப்பதாக செய்திகள் வெளியானது.
இதுகுறித்து செய்தியாளர்களிடம் பேசிய ஆனைமலை புலிகள் காப்பக கள இயக்குநர் வெங்கடேஷ், “ரோலக்ஸ் காட்டு யானையை ரேடியோ சிக்னல் வைத்து, தினமும் நேரில் பார்த்து வனத்துறை ஊழியர்கள் கண்காணித்து வந்தனர். நேற்று காலை 11.45 மணிக்கு ரேடியோ சிக்னல் கிடைத்த நிலையில் , யானை இருக்கும் பகுதியை வனத்துறை ஊழியர்கள் கண்காணித்து வந்தனர்.
பிற்பகல் 2 மணி வரை யானை வனத்துறை ஊழியர்களின் கண்காணிப்பில் இருந்தது. 2 மணி அளவில் அங்கிருந்த ஓடையின் அருகில் தண்ணீர் குடிக்க சென்ற போது வழுக்கி விழுந்தது. இதை பார்த்த வன ஊழியர்கள் உடனடியாக அங்கு செல்ல முடியாத நிலையில், அரை மணி நேரத்திற்கு பின்பு ரோலக்ஸ் யானையின் அருகில் சென்று பார்த்த போது யானை இறந்து இருப்பது தெரியவந்தது . யானையின் மரணம் குறித்து விசாரிக்க தனிக்குழுவை தலைமை வனப்பாதுகாவலர் அமைத்துள்ளார் என தெரிவித்தார்.
இடமாற்றம் செய்யப்பட்ட யானைகளில் எத்தனை யானைகள் பிழைத்திருக்கிறது என்ற செய்தியாளர்களிக்கு கேள்விக்கு, இதுவரை இடமாற்றம் செய்யப்பட்ட யானைகளில் 10 சதவீதம் மட்டுமே மாற்று இடங்களில் தங்கி இருக்கின்றது. மற்ற யானைகளை மீண்டும் மீண்டும் பிடிக்கும் சூழல் இருந்துள்ளது என தெரிவித்தார்.