மின்சார இரு சக்கர வாகன உற்பத்தி நிறுவனமான ஓலா எலக்ட்ரிக்கின் (Ola Electric) பங்குகள் மோசமான நிலையில் உள்ளன. ஒரு கட்டத்தில் நிறுவனத்தின் பங்குகளின் விலை ரூ.157 ஐ எட்டியிருந்தது. ஆனால் இது இப்போது ரூ.25 ஆக உள்ளது. 2024ஆம் ஆண்டில், ஓலா எலக்ட்ரிக் பங்குகள் உள்நாட்டு பங்குச் சந்தையில் ரூ.76 வெளியீட்டு விலையில் அறிமுகமானது. தற்போது அந்த நிறுவனத்தின் பங்குகளின் இந்த வீழ்ச்சியால் (Share Falls) முதலீட்டாளர்கள் சுமார் ரூ.57,000 கோடியை இழந்தனர். ஓலா எலக்ட்ரிக் பங்குகள் வீழ்ச்சியடைந்ததற்கு பல முக்கிய காரணங்கள் உள்ளன.
ஓலாவின் சந்தை மூலதனம்:
ஓலா எலக்ட்ரிக் பங்குகள் வெள்ளிக்கிழமை பிஎஸ்இயில் ரூ.25.39 ஆக வர்த்தகம் செய்யப்பட்டன. இது கிட்டத்தட்ட 1 சதவீதம் அதிகரித்தது. நேற்றைய வர்த்தகத்தின் போது, நிறுவனத்தின் பங்குகள் இன்ட்ராடே அதிகபட்சமாக ரூ.25.49 முதல் இன்ட்ராடே குறைந்தபட்சமாக ரூ.24.79 வரை இருந்தன. பிஎஸ்இ தரவுகளின்படி, ஓலா எலக்ட்ரிக்கின் தற்போதைய சந்தை மூலதனம் ரூ.11,199.10 கோடியாகும்.
சரிவுக்கு முக்கிய காரணங்கள்:
ஓலா எலக்ட்ரிக் ஒரு வருடத்திற்கு முன்பு மின்சார இரு சக்கர வாகன சந்தையில் சுமார் 26% சந்தைப் பங்கைக் கொண்டிருந்தது. இப்போது அது வெறும் 4.2% ஆகக் குறைந்துள்ளது. நிறுவனத்தின் மின்சார ஸ்கூட்டர்கள் குறித்து அடிக்கடி வரும் வாடிக்கையாளர் புகார்கள் மற்றும் மோசமான சேவை நிறுவனத்தின் நற்பெயருக்கு களங்கம் விளைவிப்பது மட்டுமல்லாமல், வாடிக்கையாளர் நம்பிக்கையையும் இழக்க வழிவகுத்தது. மோசமான தயாரிப்புகள் மற்றும் மோசமான சேவையே மக்கள் ஓலா எலக்ட்ரிக் ஸ்கூட்டர்களை வாங்குவதைத் தவிர்ப்பதற்கான காரணங்கள் ஆகும்.
கடைகள் மூடல்கள்:
ஓலா நிறுவனம் முன்னதாக நாடு முழுவதும் 4,000 கடைகளைத் திறக்க இலக்கு நிர்ணயித்திருந்தது. ஆனால் சந்தைப் பங்கில் குறிப்பிடத்தக்க சரிவு மற்றும் பல காரணங்களால், நிறுவனம் இப்போது அதன் கடைகளை வெறும் 550 ஆகக் குறைத்து வருகிறது. முன்னணி உலகளாவிய தரகு நிறுவனமான கோல்ட்மேன் சாக்ஸ், ஓலா எலக்ட்ரிக்கின் இலக்கு விலையை ரூ.52 லிருந்து ரூ.26 ஆகக் குறைத்துள்ளது. ஒரு வாரத்திற்கு முன்புதான், சிட்டி நிறுவனம் ஓலா எலக்ட்ரிக்கை “வாங்க” என்ற மதிப்பீட்டிலிருந்து “விற்க” என்ற மதிப்பீட்டிற்குக் குறைத்து. அதன் இலக்கு விலையை ரூ.55 இலிருந்து ரூ.27 ஆக 51% குறைத்தது குறிப்பிடத்தக்கது.