கோடையில் தர்பூசணி சாப்பிடுங்க.. இவ்வளவு நன்மைகள் இருக்கா?..

தர்பூசணியில் உள்ள ஊட்டச்சத்துக்கள், கோடைக்காலத்தில் அதனை சாப்பிடுவதால் ஏற்படும் நன்மைகள் (Watermelon Benefits) குறித்துப் பார்க்கலாம்.

கோடை காலத்தில் தர்பூசணி பழங்கள் அளவுக்கு அதிகமாகவே சந்தைகளில் கிடைக்கின்றன. இது சுட்டெரிக்கும் வெயிலில் நீர்ச்சத்து குறைவதைத் தடுக்க உதவுகிறது. இனிப்பு மற்றும் லேசான சுவையுடைய தர்பூசணி, எளிதில் செரிமானம் ஆவதுடன், செரிமான மண்டலத்தையும் வலுப்படுத்துகிறது. இதில் உள்ள நார்ச்சத்து மற்றும் நீர்ச்சத்து மலச்சிக்கலைத் தடுக்கிறது. தர்பூசணி சாப்பிடுவதால் கிடைக்கும் நன்மைகள் மற்றும் அதன் ஊட்டச்சத்துக்கள் பற்றி காணலாம்.

தர்பூசணியில் உள்ள ஊட்டச்சத்துக்கள்

தர்பூசணி அதிகளவில் நீர்ச்சத்து கொண்ட பழமாகும். இதில் கார்போஹைட்ரேட்டுகள், நார்ச்சத்து, வைட்டமின்கள் ஏ, சி, பி6, மெக்னீசியம், தயாமின், பொட்டாசியம், பாஸ்பரஸ் மற்றும் ஆன்டிஆக்ஸிடன்ட்கள் உள்ளன. அதுமட்டுமின்றி, இதில் புரதம், கொழுப்பு மற்றும் கலோரிகள் குறைவாக உள்ளன.

Watermelon Benefits: தர்பூசணி சாப்பிடுவதால் ஏற்படும் நன்மைகள்?

கோடைக்காலத்தில் நம் உடலைக் குளிர்ச்சியூட்டி தாகத்தைத் தணித்து, நீர்ச்சத்து வறட்சியை தர்பூசணி தடுக்கிறது. கோடையில் நீங்கள் தர்பூசணியை தாராளமாக சாப்பிடலாம், ஏனெனில் அதில் சுமார் 91 முதல் 95 சதவீதம் வரை நீர் உள்ளது. தர்பூசணி உடலை நீரேற்றமாக வைத்திருப்பது மட்டுமல்லாமல், உடல் எடை அதிகரிப்பதைத் தடுக்கவும் உதவுகிறது.

இதில் கலோரிகள் மிகக் குறைவாகவும், நீர்ச்சத்து அதிகமாகவும் உள்ளது. எனவே, தர்பூசணி சாப்பிடுவது உங்களை நீண்ட நேரம் வயிறு நிறைந்ததாக உணர வைக்கும். இதன் மூலம், நீங்கள் வழக்கத்திற்கு மாறான நேரங்களில் பசி எடுப்பதையும், அளவுக்கு அதிகமாகச் சாப்பிடுவதையும் தவிர்க்கலாம்.

நோய் எதிர்ப்பு சக்தியை அதிகரிக்கிறது

தர்பூசணியில் வைட்டமின் சி மற்றும் வைட்டமின் ஏ நிறைந்துள்ளன, இவை முகம் மற்றும் கூந்தல் ஆரோக்கியத்திற்கு நன்மை பயக்கும். வைட்டமின் சி நோய் எதிர்ப்பு சக்தியை அதிகரிக்கிறது. இது கோடைக்கால வயிற்றுப்போக்கு, குமட்டல், நோய்த்தொற்றுகளில் இருந்து பாதுகாக்க உதவுகிறது. தர்பூசணிப் பழத்தில் உள்ள ஆன்டிஆக்ஸிடன்ட்கள்  தசைகளை மீட்க உதவுகின்றன. தர்பூசணியில் உள்ள பொட்டாசியம் ரத்த அழுத்த அளவைப் பராமரித்து, இதய நோய்களைத் தடுக்கிறது.

தர்பூசணி சாப்பிட சரியான நேரம்

கோடைக்காலத்தில் தர்பூசணியை மதிய வேளையில் சாப்பிடுவது உகந்தது. காலையிலும் கூட சாப்பிடலாம். ஆனால் இரவில் சாப்பிடுவதைத் தவிர்க்க வேண்டும். முடிந்தால், அதைத் துண்டுகளாக நறுக்கிச் சாப்பிடுங்கள். நீங்கள் அதை சாலட்களாகவும் மாற்றி சாப்பிடலாம். பெரியவர்கள் ஒரு நாளைக்கு 100 – 300 கிராம் தர்பூசணி சாப்பிடலாம். இது உடலில் சரியான நீரேற்றத்தைப் பராமரித்து, செரிமானப் பிரச்சனைகளைத் தடுக்கும். இருப்பினும், உங்களுக்கு சர்க்கரை நோய் இருந்தால் தர்பூசணியை மிதமாக மட்டும் சாப்பிடுங்கள்.