“டிவி சீரியலில் வருவது போல, கைரேகையை வைத்து குற்றவாளியைக் கண்டுபிடிக்கணும்… கம்ப்யூட்டரை ஹேக் பண்ணிக் கள்ளனைப் பிடிக்கணும்…” என்ற கனவோடு இருக்கும் இளைஞரா நீங்கள்?
உங்கள் கனவை நனவாக்க, நம் சென்னையிலேயே ஒரு மத்திய அரசுப் பல்கலைக்கழகம் செயல்பட்டு வருகிறது என்பது பலருக்குத் தெரியாது. தேசிய தடயவியல் அறிவியல் பல்கலைக்கழகத்தில் (National Forensic Sciences University – NFSU) 2026ஆம் ஆண்டிற்கான மாணவர் சேர்க்கை பற்றிய அறிவிப்புகள் வெளியாகியுள்ளன.
சென்னையில் என்ன படிக்கலாம்? குஜராத்தைத் தலைமையிடமாகக் கொண்ட இந்த மத்தியப் பல்கலைக்கழகத்தின் கிளை, சென்னையில் செயல்பட்டு வருகிறது.
இங்கு வழங்கப்படும் படிப்புகள் இதோ:
இளங்கலை (UG):
- B.Sc. Criminology and Forensic Science (3 ஆண்டுகள்).
முதுகலை (PG):
- M.Sc. Cyber Security (2 ஆண்டுகள்).
- M.Sc. Forensic Science (2 ஆண்டுகள்).
டிப்ளமோ:
- Diploma in Crime Scene Management (6 மாதங்கள்).
யாருக்கெல்லாம் சீட் கிடைக்கும்?
- பி.எஸ்சி (B.Sc): 12ஆம் வகுப்பில் அறிவியல் குரூப் (Physics, Chemistry, Biology/Maths) படித்து, 55% மதிப்பெண்கள் பெற்றிருக்க வேண்டும். (SC/ST பிரிவினருக்கு 50% போதும்).
- எம்.எஸ்சி சைபர் செக்யூரிட்டி: பி.இ/பி.டெக் (CSE, IT, ECE) அல்லது பிசிஏ (BCA) முடித்தவர்கள் விண்ணப்பிக்கலாம்.
- எம்.எஸ்சி பாரன்சிக் சயின்ஸ்: அறிவியல், மருத்துவம், பொறியியல் அல்லது பார்மசி துறையில் டிகிரி முடித்திருக்க வேண்டும்.
எக்ஸாம் முறையில் பெரிய மாற்றம்! இதுதான் மிக முக்கியமான விஷயம். கடந்த ஆண்டு வரை ‘NFAT’ என்ற தனி நுழைவுத் தேர்வு நடத்தப்பட்டது. ஆனால், 2026-27 கல்வி ஆண்டில் முறை மாற்றப்பட்டுள்ளது.
- எப்படிச் சேர்வது?: இனி CUET (Common University Entrance Test) மதிப்பெண் அடிப்படையில் தான் சீட் ஒதுக்கப்படும்.
- பி.எஸ்சி சேர CUET UG 2026 எழுத வேண்டும்.
- எம்.எஸ்சி சேர CUET PG 2026 எழுதியிருக்க வேண்டும்.
கட்டணம் எவ்வளவு? மத்திய அரசுப் பல்கலைக்கழகம் என்பதால் கட்டணம் நியாயமாகவே இருக்கும்.
- பி.எஸ்சி & எம்.எஸ்சி (Forensic): செமஸ்டருக்கு ரூ.65,000.
- எம்.எஸ்சி (Cyber Security): செமஸ்டருக்கு ரூ.90,000.
- டிப்ளமோ: ரூ.35,000.
சிஐடி வேலை மட்டும் இல்ல… கார்ப்பரேட் கம்பெனியிலும் செம டிமாண்ட்!
- எக்ஸாம் மிஸ் பண்ணிடாதீங்க: NFSU தனியாக எக்ஸாம் வைப்பார்கள் என்று காத்திருக்க வேண்டாம். உடனே CUET தேர்வுக்கு விண்ணப்பித்துப் படிக்க ஆரம்பியுங்கள். அதுதான் என்ட்ரி டிக்கெட்!
- சைபர் செக்யூரிட்டி மவுசு: இன்று வங்கிகள் முதல் ஐடி கம்பெனிகள் வரை எல்லோரும் தேடுவது ‘சைபர் செக்யூரிட்டி’ ஆட்களைத்தான். இதில் எம்.எஸ்சி முடித்தால் லட்சங்களில் சம்பளம் நிச்சயம்.
- சென்ட்ரல் கவர்மெண்ட் வேலை: இங்குப் படித்தால் சிபிஐ (CBI), ஐபி (IB) மற்றும் மாநிலக் காவல்துறை ஆய்வகங்களில் வேலை கிடைக்க அதிக வாய்ப்புள்ளது.
மேலும் விவரங்களுக்கு nfsu.ac.in/admission அல்லது chennai.nfsu.ac.in இணையதளத்தைப் பாருங்கள்.