திமுக கூட்டணியில் மமக கட்சிக்கு 2 தொகுதிகள் ஒதுக்கப்பட்டுள்ளது.
இதுதொடர்பாக சென்னை அண்ணா அறிவாலயத்தில் அக்கட்சியின் தலைவர் ஜவாஹிருல்லா இன்றிரவு (பிப்ரவரி 28) செய்தியாளர்களுக்கு பேட்டியளித்துள்ளார்.
அதில், “வரும் தேர்தலில் திமுக கூட்டணியில் மனிதநேய மக்கள் கட்சி 2 தொகுதியில் உதயசூரியன் சின்னத்தில் போட்டியிடும். முதலமைச்சர் மு.க.ஸ்டாலின் முன்னிலையில் ஒப்பந்தம் கையெழுத்தானது. இந்த 2 தொகுதிகளில் மட்டுமல்ல திமுக கூட்டணியின் வெற்றிக்கு 234 தொகுதிகளிலும் மமக தொண்டர்கள் அரும்பாடுபடுவார்கள். இன்று தொகுதிகளின் எண்ணிக்கை மட்டும் தான் முடிவுசெய்யப்பட்டது. அடுத்தக்கட்ட பேச்சுவார்த்தையில் எந்த தொகுதிகளில் போட்டியிடுவது என்பது முடிவெடுக்கப்படும் ” என்று தெரிவித்தார்.
திமுக கூட்டணியில் இந்திய யூனியன் முஸ்லிம் கட்சிக்கு 2 தொகுதிகள் ஒதுக்கீடு செய்யப்பட்டுள்ளது.
இதுகுறித்து இந்திய யூனியன் முஸ்லிம் லீக் தலைவர் காதர் மொய்தீன் செய்தியாளர்களிடம் கூறுகையில், “11 கட்சிகள் கூட்டணியில் இருப்பதால் எல்லோருக்கும் பிரித்துக் கொடுக்க வேண்டும் என்ற அடிப்படையில் 2 தொகுதிகள் எங்களுக்கு ஒதுக்கப்பட்டுள்ளது. மூன்று தொகுதிகள் கேட்ட நிலையில் 2 தொகுதிகள் கொடுக்கப்பட்டுள்ளது. இதனால் புதுச்சேரியில் 1 தொகுதி ஒதுக்குமாறு கேட்டுள்ளோம். எந்த தொகுதிகள் என அடுத்தக்கட்ட பேச்சுவார்த்தையில் முடிவு செய்யப்படும். நாங்கள் அகில இந்திய கட்சி என்பதால் ஏணி சின்னத்தில் போட்டியிடுவோம்” என்றார்.