விராட் கோலியின் சதம் – குல்தீப் யாதவின் சுழல் – போராடி வென்றது இந்தியா

தென்னாப்பிரிக்க கிரிக்கெட் அணிக்கு எதிரான முதல் ஒருநாள் போட்டியில் இந்திய அணி 17 ரன்கள் வித்தியாசத்தில் வெற்றி பெற்றது.

இந்தியா வந்துள்ள தென்னாப்பிரிக்க கிரிக்கெட் அணி டெஸ்ட் தொடரை 2-0 என்ற கணக்கில் வென்று இந்தியாவுக்கு அதிர்ச்சி கொடுத்தது. அதிலிருந்து மீண்டு தக்க பதிலடி கொடுக்கும் வகையில் இந்திய கிரிக்கெட் அணி ஒருநாள் தொடரில் சிறப்பாக விளையாட ஆயத்தமானது. அதன்படி, இவ்விரு அணிகளுக்கு இடையேயான முதல் ஒருநாள் கிரிக்கெட் போட்டி ராஞ்சியில் நேற்று (நவம்பர் 30) நடைபெற்றது.

டாஸ் வென்ற தென்னாப்பிரிக்க அணியின் கேப்டன் எய்டன் மார்க்ரம் பந்துவீச்சைத் தேர்வு செய்தார். அதன்படி, இந்திய அணியின் துவக்க ஆட்டக்காரர்களாக ரோஹித் ஷர்மாவும் யஷஸ்வி ஜெய்ஸ்வாலும் களமிறங்கினர். இப்போட்டியில் ரோஹித் ஷர்மா மீதும் விராட் கோலி மீதும் ரசிகர்களுக்கு அதிக எதிர்பார்ப்பு இருந்தது. அதன்படியே ரோஹித் ஷர்மா சிறப்பாக விளையாடினார். மற்றொரு துவக்க ஆட்டக்காரரான ஜெய்ஸ்வால் 18 ரன்களுக்கு ஆட்டமிழந்தார்.

அதன் பின்னர் ரோஹித் ஷர்மாவுடன் ஜோடி சேர்ந்த விராட் கோலி அதிரடியாக விளையாடினார். இந்த ஜோடி இரண்டாவது விக்கெட்டுக்கு 136 ரன்கள் சேர்த்தது. அரைசதம் கடந்த ரோஹித் ஷர்மா 57 ரன்களுக்கு மார்கோ யன்சென் பந்தில் ஆட்டமிழந்தார். இப்போட்டியில் 3 சிக்ஸர்களை விளாசிய ரோஹித் சர்மா ஒருநாள் கிரிக்கெட் போட்டிகளில் அதிக சிக்ஸர்களை விளாசிய ஷாஹித் அப்ரிடியின் சாதனையை சமன் செய்தார்.

மறுபுறம் நிலைத்து இன்று ஆடி அவ்வப்போது அதிரடி காட்டிய விராட் கோலி சதத்தை நிறைவு செய்தார். அவர்களுடைய ரசிகர்களுக்கு அவரது அதிரடி பெரிய விருந்தாக அமைந்தது. விராட் கோலி 120 பந்துகளில் 135 ரன்கள் குவித்தார். இதில் 11 பவுண்டரிகளும் 7 சிக்ஸர்களும் அடங்கும். மற்ற வீரர்கள் சொற்ப ரன்களில் ஆட்டமிழக்க கேப்டன் லோகேஷ் ராகுல் மட்டும் நிதானமாக ஆடி ரன்கள் சேர்த்தார். அவர் 60 ரன்கள் சேர்த்து ஆட்டமிழந்தார். கடைசியில் இந்திய அணி 50 ஓவர்கள் முடிவில் 8 விக்கெட் இழப்புக்கு 349 ரன்கள் குவித்தது.

இமாலய இலக்கைத் துரத்திச் சென்ற தென்னாப்பிரிக்க அணி ஆரம்பத்திலேயே தடுமாறியது. ரியான் ரிக்கில்டன் மற்றும் குயிண்டன் டிகாக் ஆகிய இருவரும் டக் அவுட் ஆகி வெளியேறினர். இவர்களை ஹர்ஷித் ரானா வெளியேற்றினார். சிறிது நேரம் களத்தில் நின்ற கேப்டன் மார்க்ரமும் 7 ரன்களுக்கு அர்ஷ்தீப் பந்தில் வெளியேறினார். அதன் பின்னர் மேத்யூ பிரீட்ஸ்கியும் டோனி டி ஜோர்ஷியும் பொறுப்புடன் ஆடினர். டி ஷோர்ஷி வெளியேறினாலும் அடுத்து வந்த டெவால்ட் பிரேவிஸும் மார்கோ யன்செனும் அதிரடி காட்டினர்.

ஒரு பக்கம் பிரீஸ்கி பொறுப்புடன் நிதானமாக ஆட மறுபுறம் மார்கோ யன்சென் ருத்ர தாண்டவம் ஆடினார். இவர்களைப் பிரிக்க முடியாமல் இந்திய பந்துவீச்சாளர்கள் திணறினர். குல்தீப் யாதவ் அதிக ரன்களைக் கொடுத்தாலும் அவ்வப்போது விக்கெட் வீழ்த்தி நம்பிக்கை கொடுதார். அவர் மொத்தம் 4 விக்கெட்களை வீழ்த்தினார். ஹர்ஷித் ரானாவும் தன் பங்குக்கு 3 விக்கெட் வீழ்த்த அர்ஷ்தீப் சிங்குக்கு 2 விக்கெட் கிடைத்தது. கடைசி ஓவர் வரை போராடிய தென்னாப்பிரிக்க அணி வெற்றி இலக்கை எட்ட முடியாமல் தோல்வியடைந்தது.

கடைசி வரை அதிரடி காட்டி இந்திய அணிக்கு தலைவலியாக இருந்த ஆல்ரவுண்டர் கார்பின் போஸ்ச் 67 ரன்களுக்கு அவுட் ஆனார். இவரை பிரசித் கிருஷ்ணா வெளியேற்றினார். இந்திய அணி 17 ரன்கள் வித்தியாசத்தில் வெற்றி பெற்றது. சிறப்பாக விளையாடி சதம் அடித்த விராட் கோலிக்கு ஆட்ட நாயகன் விருது வழங்கப்பட்டது.