பஞ்சாப் மாநில அரசின் ஆசிர்வாத் யோஜனா திட்டம் ஏழைப் பெண்களுக்கு திருமண உதவித்தொகை வழங்குகிறது. முன்பு ஷகுன் யோஜனா என்று அழைக்கப்பட்ட இந்தத் திட்டம், 1997இல் தொடங்கப்பட்டது. அப்போது ரூ.5,100 வழங்கப்பட்டது. தற்போது ரூ.51,000 ஆக உயர்ந்துள்ளது. இந்த திட்டத்தின் முக்கிய நோக்கம், பொருளாதாரச் சிக்கல்களால் எந்தப் பெண்ணின் திருமணமும் தடைபடக்கூடாது என்பதுதான். பெண்களின் திருமணத்திற்காக உதவும் ஒரு முக்கியத் திட்டம் தான் இந்த ஆசிர்வாத் யோஜனா திட்டம்.
ஆரம்பத்தில், இந்தத் திட்டத்தின் பலன்கள் குறிப்பிட்ட சில பிரிவினருக்கு மட்டுமே கிடைத்தன. பின்னர், வறுமைக் கோட்டிற்குக் கீழ் உள்ள குடும்பங்களும் சேர்க்கப்பட்டனர். 2004ஆம் ஆண்டில், ஏழை கிறிஸ்தவக் குடும்பங்களுக்கும் இந்தத் திட்டத்தின் கீழ் உதவித்தொகை வழங்கப்பட்டது. ரூ.5,100 ஆக இருந்த உதவித்தொகை, 2004இல் ரூ.6,100 ஆகவும், 2006இல் ரூ.15,000 ஆகவும், 2017இல் ரூ.21,000 ஆகவும், இறுதியாக 2021இல் ரூ.51,000 ஆகவும் உயர்த்தப்பட்டது.
இந்தத் திட்டத்தின் பயன்களைப் பெற நீங்கள் பஞ்சாபின் நிரந்தரக் குடிமகனாக இருக்க வேண்டும். உங்கள் குடும்பத்தின் ஆண்டு வருமானம் ரூ.32,790 க்கு மிகாமல் இருக்க வேண்டும். மணப்பெண்ணுக்குக் குறைந்தபட்சம் 18 வயது நிரம்பியிருக்க வேண்டும். திருமணத் தேதி நிச்சயிக்கப்பட்ட பிறகு அல்லது திருமணத்திற்கு முன்பே குறிப்பிட்ட காலக்கெடுவிற்குள் விண்ணப்பிக்கலாம். பட்டியல் இனத்தவர், பொருளாதாரத்தில் பின்தங்கிய பிரிவினர், விதவைகள், விவாகரத்து பெற்ற பெண்கள் மற்றும் பிற்படுத்தப்பட்ட வகுப்பினர் இந்தப் பிரிவில் வருவார்கள்.
இந்தத் திட்டத்திற்கு விண்ணப்பிக்க நிரந்தர வசிப்பிடச் சான்றிதழ், ஆதார் அட்டை, வருமானச் சான்றிதழ், பிறப்புச் சான்றிதழ் மற்றும் சாதிச் சான்றிதழ் போன்ற ஆவணங்கள் தேவைப்படும். ஆசிர்வாத் யோஜனா திட்டத்திற்கு விண்ணப்பிக்க முதலில் பஞ்சாப் அரசின் அதிகாரப்பூர்வ இணையதளத்திற்குச் செல்ல வேண்டும். அங்குள்ள பதிவு செய்யும் (registration) விருப்பத்தை கிளிக் செய்து விண்ணப்ப செயல்முறையைத் தொடங்கலாம். பதிவுப் பக்கத்தில் தேவையான அனைத்து விவரங்களையும் சரியாக நிரப்ப வேண்டும். அதன் பிறகு, விண்ணப்பப் படிவத்தைச் சமர்ப்பிக்க வேண்டும்.
இந்தத் திட்டம் தங்கள் மகளின் திருமணச் செலவுகளைச் சமாளிக்க சிரமப்படும் குடும்பங்களுக்கு ஒரு பெரிய நிவாரணமாக அமைந்துள்ளது. நீங்கள் தகுதியானவராக இருந்தால் சரியான நேரத்தில் விண்ணப்பித்து இந்த உதவியைப் பயன்படுத்திக் கொள்ளலாம்.