சில வருடங்களுக்கு முன்பு வரை, கோடைக்காலம் வந்தால் நம் பாட்டிகள் ஊறவைத்த ஒரு வழவழப்பான பொருளைக் குடிக்கக் கொடுப்பார்கள். “இது உடம்புக்கு குளிர்ச்சி” என்று சொல்லித் தருவார்கள். ஆனால், நாம் அதை “என்ன இது ஜெல்லி மாதிரி?” என்று முகத்தைச் சுளித்திருப்போம்.
ஆனால், இன்று இன்ஸ்டாகிராம் மற்றும் டிக்டாக்கில் (TikTok) எங்கு திரும்பினாலும் அதே பொருள்தான் ட்ரெண்டிங். அதுதான் ‘கோந்து கத்தீரா’ (Gond Katira). இன்றைய ஜென்-ஜி (Gen Z) இளைஞர்கள் இதை “இயற்கையின் கொலாஜன்” (Nature’s Collagen) என்று கொண்டாடித் தீர்க்கிறார்கள்.
அது என்ன கோந்து கத்தீரா? இது ஒரு மரத்திலிருந்து வடியும் பிசின் வகை (Tragacanth Gum). பார்க்கக் கல் உப்பு போல இருக்கும். ஆனால், இதைத் தண்ணீரில் ஊறவைத்தால், ஊறிப் பெருத்து, கண்ணாடி போன்ற ஜெல்லியாக மாறும். (குறிப்பு: லட்டு செய்யப் பயன்படுத்தும் ‘கோந்து’ வேறு; அது தண்ணீரில் கரைந்துவிடும். இது கரையாது, ஜெல்லியாக மாறும்).
ஏன் திடீரென இவ்வளவு மவுசு? அழகிப் போட்டிகளில் கலந்துகொள்ளும் மாடல்கள் முதல் இன்ஃப்ளூயன்ஸர்கள் வரை அனைவரும் இதைக் கையில் வைத்திருக்கக் காரணம் – ‘சருமப் பராமரிப்பு’ (Skincare).
- இயற்கை கொலாஜன்: வயதாகும்போது நம் சருமத்தில் உள்ள ‘கொலாஜன்’ குறைவதால் தோல் சுருங்கும். கோந்து கத்தீரா, தாவர வகை கொலாஜன் நிறைந்தது. இதைச் சாப்பிட்டால் சருமம் இருக்கமாகவும், பளபளப்பாகவும் (Glowing Skin) மாறும் என்று நம்பப்படுகிறது. விலையுயர்ந்த கொலாஜன் பவுடர்களுக்கு இது மலிவான மாற்று!
- முகப்பருக்களுக்குத் தீர்வு: இது உடலிலிருந்து நச்சுகளை வெளியேற்றி, உடல் சூட்டைத் தணிப்பதால், முகப்பருக்கள் மற்றும் தோல் வறட்சியைப் போக்குகிறது.
உண்பது எப்படி?
- இரவே இரண்டு அல்லது மூன்று துண்டுகளைத் தண்ணீரில் ஊறவைக்க வேண்டும்.
- காலையில் அது ஒரு கிண்ணம் நிறைய ஜெல்லியாக வந்திருக்கும்.
- இதை எலுமிச்சை ஜூஸ், மோர், ரோஸ் மில்க் அல்லது ஸ்மூத்திகளில் (Smoothies) கலந்து குடிக்கலாம். சுவை ஏதும் இருக்காது என்பதால் எதிலுடனும் சேர்த்துக்கொள்ளலாம்.
கவனிக்க வேண்டியவை:
- தண்ணீர் அவசியம்: இது தண்ணீரை அதிகளவில் உறிஞ்சும் தன்மை கொண்டது. எனவே, இதைச் சாப்பிடும் நாட்களில் நிறையத் தண்ணீர் குடிக்க வேண்டும். இல்லையென்றால் மலச்சிக்கல் அல்லது மூச்சுத்திணறல் ஏற்படலாம்.
- பச்சையாக சாப்பிடக்கூடாது: இதை ஊறவைக்காமல் அப்படியே சாப்பிட்டால், தொண்டையில் அடைத்துக்கொள்ளும் அபாயம் உள்ளது.
நம் முன்னோர்கள் இதை வெறும் ‘குளிர்ச்சி’ என்று மட்டும் சொன்னார்கள். ஆனால், இன்றைய அறிவியல் இதை ‘சூப்பர் ஃபுட்’ (Superfood) என்கிறது. வெயில் காலம் தொடங்கும் முன், இந்த ‘பியூட்டி சீக்ரெட்டை’ நீங்களும் ட்ரை பண்ணுங்க!