சர்க்கரை நோய் உள்ளவர்களுக்கு சிக்கன், மட்டன் இவற்றில் எது பாதுகாப்பானது என்பது குறித்து பார்க்கலாம்.
சர்க்கரை நோய் என்பது இந்தியாவில் லட்சக்கணக்கான மக்களை பாதிக்கும் பொதுவான நோய்களில் ஒன்றாக உள்ளது. சர்க்கரை நோய் வருவதற்கு முன்பு நாம் இஷ்டத்திற்கு சாப்பிட்டிருப்போம். ஆனால், சர்க்கரை அதிகமான பிறகு உணவுக் கட்டுப்பாடு மிகவும் அவசியமாக உள்ளது. அதிக கலோரிகள் உள்ள உணவை சாப்பிடும்போது நமது ரத்தத்தில் சர்க்கரை அளவு அதிகரிக்கிறது.
ஆகவே, உணவுகளை முறைப்படுத்தி உண்ண வேண்டியதோடு சில உணவுகளை தவிர்க்க வேண்டிய கட்டாயமும் நமக்கு ஏற்படுகிறது. சர்க்கரை அதிகரித்தால் காலப் போக்கில் அது இதய, சிறுநீரக பிரச்னைக்கு வழிவகுக்கும் என்பதால் உணவுக் கட்டுப்பாடு அவசியமாகிறது.
சர்க்கரை நோயை முழுமையாக குணப்படுத்த முடியாது. ஆனால், சரியான வாழ்க்கை முறை மற்றும் உணவுப் பழக்கவழக்கங்கள் மூலம் அதை நன்கு நிர்வகிக்க முடியும். உடல் போதுமான இன்சுலின் உற்பத்தி செய்யாதபோது அல்லது இன்சுலின் திறம்பட செயல்படாதபோது இரத்த சர்க்கரை அளவு உயரும். அதனால்தான் நீங்கள் என்ன சாப்பிடுகிறீர்கள் என்பதை அறிந்து கொள்வது மிகவும் முக்கியம்.
நீரிழிவு நோயாளிகள் கார்போஹைட்ரேட்டுகள், கொழுப்புகள் மற்றும் சர்க்கரையை கட்டுப்படுத்த வேண்டும். ஆனால் புரதம் எப்படி சாப்பிடுவது என்பதும் முக்கியம். அசைவ உணவுகள், குறிப்பாக சிக்கன் மற்றும் ஆட்டிறைச்சி இரண்டில் எது சாப்பிடுவது? எது பாதுகாப்பானது? என்ற குழப்பம் சர்க்கரை நோயாளர்கள் இடையே உள்ளது.
மட்டன் ஒரு சிவப்பு இறைச்சி (Red Meat) வகையைச் சேர்ந்தது. மட்டனில் இரும்புச்சத்து, துத்தநாகம் மற்றும் வைட்டமின் பி12 நிறைந்திருந்தாலும், இதில் அதிக அளவு நிறைவுற்ற கொழுப்பும் உள்ளது. அதிகமாக சிவப்பு இறைச்சி சாப்பிடுவது இன்சுலின் எதிர்ப்பை அதிகரிக்கும், வகை 2 சர்க்கரை நோய் மற்றும் இதய நோய் அபாயத்தை அதிகரிக்கும். நீரிழிவு நோயாளிகள் மட்டனை முற்றிலுமாக தவிர்க்க வேண்டிய அவசியமில்லை. ஆனால் மிதமாக மட்டுமே சாப்பிட வேண்டியது அவசியமாகும்.
சர்க்கரை நோயாளர்களுக்கு கோழி இறைச்சி பொதுவாக பாதுகாப்பான அசைவ உணவாக கருதப்படுகிறது. இதில் புரதம் அதிகமாகவும், கொழுப்பு குறைவாகவும் உள்ளது. மேலும் மிகக் குறைந்த கிளைசெமிக் குறியீட்டைக் கொண்டுள்ளது. அதாவது, இது திடீரென இரத்த சர்க்கரை அளவை அதிகரிக்காது. நீரிழிவு நோயாளிகள் பயமின்றி தங்கள் உணவில் கோழி இறைச்சியைச் சேர்க்கலாம் என்று மருத்துவ நிபுணர்கள் பரிந்துரைக்கிறார்கள்.
அதே சமயம் சமையல் எப்படி செய்வது என்பதும் முக்கியமானது. எண்ணெய், நெய், அல்லது வெண்ணெய் சேர்த்து வறுத்த கோழி இறைச்சி ஆரோக்கியமற்றவை. வேகவைத்த, கிரில் செய்யப்பட்ட அல்லது லேசாக சமைத்த கோழி உணவுகள் இரத்த சர்க்கரையை கட்டுப்படுத்த சிறந்த வழிகளாக உள்ளன.
சர்க்கரை நோயாளிகளுக்கு, ஆட்டிறைச்சியை விட கோழி இறைச்சி சிறந்த உணவாகும். ஆட்டிறைச்சியை அவ்வப்போது மட்டுமே கொஞ்சமாக சாப்பிட வேண்டும். அதே நேரத்தில் ஆரோக்கியமாக சமைத்தால் கோழி இறைச்சியை தொடர்ந்து சாப்பிடலாம். மிதமான உணவுதான் நல்ல ஆரோக்கியத்திற்கான உண்மையான ரகசியம் என்பதை நினைவில் கொள்ளுங்கள்.