இந்தியாவில் கால் பதிக்கும் எலான் மஸ்க்… இணைய கட்டணங்கள் பல மடங்கு எகிற வாய்ப்பு?

தொழில்நுட்ப உலகில் மிகப்பெரிய முன்னேற்றமாக, அமெரிக்காவின் தொழிலதிபரான எலான் மஸ்கின் ஸ்பேஸ்‌ எக்ஸ் (Space X) நிறுவனம் தொடங்கியுள்ள “ஸ்டார்லிங்க்” (Star Link) செயற்கைக்கோள் இணைய சேவைக்கு, இந்திய அரசு அதிகாரப்பூர்வமாக அனுமதி வழங்கியுள்ளது.

தொலைதூர கிராமங்கள் மற்றும் இணைய வசதி இல்லாத பகுதிகளுக்கு தரமான இணைய சேவையை வழங்கும் நோக்கத்துடன், இந்தியாவில் இச்சேவை விரைவில் தொடங்கப்பட உள்ளது.

இந்திய தொலைத்தொடர்பு அமைச்சகம் (DoT) “Global Mobile Personal Communication by Satellite (GMPCS)” எனப்படும் உரிமத்தை ஸ்டார்லிங்கிற்கு வழங்கியுள்ளது.

இதன் மூலம், இந்தியாவில் செயற்கைக்கோள் இணைய சேவையை ஸ்டார்லிங்க் வழங்கும் வழி திறக்கப்பட்டுள்ளது. Central Government approved Spacex licence

இதற்கு முந்தைய காலத்தில் ஜியோ-SES மற்றும் இயூட்டல்சாட்-வன்வெப் ஆகிய நிறுவனங்களுக்கும் இதே அனுமதி வழங்கப்பட்டிருந்தது.

மத்திய அரசு, ஸ்டார்லிங்கின் சேவைகள் நாட்டின் பாதுகாப்பு விதிமுறைகளுக்கு ஏற்ப உள்ளதா என்பதை உறுதிப்படுத்த விரும்பியது. இதன் காரணமாக, ஸ்டார்லிங்கிற்கு கீழ்க்கண்ட நிபந்தனைகள் விதிக்கப்பட்டன:

உள்ளூர் தரவுத்தளம்(Local Database):

பயனர் தரவுகள் இந்தியாவில் சேமிக்கப்பட வேண்டும்.

பயனர் தகவல்கள் வெளிநாடுகளில் சேமிக்கப்படுமானால், அவை எதிர்பாராத முறையில் சர்வதேச நிறுவனங்களால் அணுகப்பட வாய்ப்பு உண்டு.

இது உளவுத்துறை, ராணுவம், எல்லைப் பாதுகாப்பு போன்ற முக்கிய பிரிவுகளுக்கே அபாயத்தை ஏற்படுத்தலாம்.

உதாரணமாக ஒரு இராணுவ அதிகாரியின் இணைய பயன்பாடு விபரங்கள் வெளியேறினால், அதை வழிநடத்தி அவரிடம் தேவையற்ற அழுத்தம் செலுத்தலாம்.

இந்தியாவில் சேமிக்கப்பட்ட தரவுகள் இந்திய தகவல் தொழில்நுட்ப சட்டங்களுக்கு உட்பட்டிருக்கும்.

வெளிநாடுகளில் சேமிக்கப்பட்டால், இந்திய நீதிமன்றங்களால் அதன் மீது நேரடி கட்டுப்பாடு செலுத்த முடியாது.

உள்நாட்டில் சேமித்தால், இந்தியாவின் பதிவுசெய்யப்பட்ட தரவுக் பாதுகாப்பு சட்டங்கள் (Digital Personal Data Protection Act, 2023) உடன் இணைந்த பாதுகாப்பு நடைமுறைகளை பின்பற்ற முடியும்.

வெளிநாடுகளில் சேமித்தால், அந்நாட்டு நிறுவனங்கள் இந்திய பயனர் தரவுகளை அவர்கள் விருப்பப்படி பகிர்ந்துகொள்ளலாம்.

உள்ளூர் தரவுத்தளங்கள் உருவாகும் போது இந்தியாவில் வேலைவாய்ப்புகள் உருவாகும்.

இந்திய தொழில்நுட்ப நிறுவனங்கள் (Data center providers, Cloud companies) வளர வாய்ப்பு கிடைக்கும்.

உதாரணமாக Amazon Web Services, Microsoft Azure போன்ற நிறுவனங்கள் இந்தியாவில் தரவுத்தளங்கள் அமைத்ததில் இருந்து ஆயிரக்கணக்கான தொழில்நுட்ப வேலைகள் உருவாகின.

உள்ளூர் கேட்வே (Gateway) நிலையங்கள்:

கேட்வே நிலையங்கள் என்பது இணையத் தகவல்கள் அனுப்பும் – பெறும் இடங்களாகும். இணைய சேவைகள் இந்தியா வழியாகவே வழங்கப்பட வேண்டும்.

இவை வெளிநாடுகளில் இருந்தால், பயனர் தகவல்கள் முழுமையாக வெளியே சென்று வர வேண்டி இருக்கும். இதனால் அந்த நாட்டு அரசு அல்லது உளவுத்துறை அந்த தரவுகளைப் பார்த்துவிடலாம்.

இந்திய ராணுவ, அரசுத் துறை ஊழியர்களின் தகவல்கள் வெளிநாட்டுக்கு செல்லும் அபாயம் உண்டு. இந்தியா உள்ளே கேட்வே இருந்தால், அந்த இடங்கள் இந்திய சட்டங்களுக்குப் பொறுப்பாக இருக்கும். வெளிநாடுகளில் இருந்தால், இந்திய அரசு அதற்கெதிராக சட்ட நடவடிக்கை எடுக்க முடியாது.

பயனர் உபகரணங்கள் பதிவு:

இந்தியாவில் பயன்படுத்தப்படும் அனைத்து உபகரணங்களும் பதிவு செய்யப்பட வேண்டும்.

பதிவு செய்யாத சாதனங்கள் வழியாக சேவையை பெறும் பயனாளிகள் யாரென்று கண்காணிக்க முடியாது.

இதனால் தீயநோக்கத்துடன் இணையத்தைப் பயன்படுத்தும் பயனாளிகளை அடையாளம் காண முடியாமல் போகும்.

பதிவு செய்யப்பட்ட உபகரணங்களைத் தொடர்புடைய நபர்களுடன் இணைத்து வைத்தால், சட்டம் மீறிய செயல்கள் நிகழும்போது துல்லியமான விசாரணை நடத்த முடியும்.

பதிவு இல்லாமல் செயற்கைக்கோள் டிஷ்கள் சந்தையில் வந்தால், கடத்தல் (smuggling), கள்ள விற்பனை போன்றவை நடைபெறலாம்.

இது சேவை தரத்தை பாதிப்பதோடு, சட்ட விரோத பயன்பாடுகளுக்கு வாய்ப்பு தரும்.

ஸ்டார்லிங் டிஷ் மற்றும் ரவுடர்களை எந்த இடத்தில் பயன்படுத்தலாம் என்பதை பதிவு செய்யப்படாதபோது கட்டுப்படுத்த முடியாது.

இந்தியா வலிமை வாய்ந்த யூனிக் பயனர் அடையாளம் (unique ID) கொண்டு, சட்டப்படி செயற்கைக்கோள் இணையத்தின் சர்வதேச தாக்கங்களை கட்டுப்படுத்த முடியும்.

ஸ்டார்லிங், 20 வருடங்கள் செல்லுபடியாகும் உரிமத்தை கோரியது. ஆனால், இந்திய தொலைத்தொடர்பு ஒழுங்குமுறை ஆணையம் (TRAI), சந்தையின் நிலைத்தன்மையை மதிப்பீடு செய்யும் நோக்கில், 5 வருடங்கள் செல்லுபடியாகும் உரிமத்தை பரிந்துரைத்தது. இந்த முரண்பாடு அனுமதி வழங்குவதில் மேலும் தாமதத்தை ஏற்படுத்தியது.

இந்தியாவின் முன்னணி தொலைத்தொடர்பு நிறுவனங்கள், ரிலையன்ஸ் ஜியோ மற்றும் ஏர்டெல், ஸ்டார்லிங்கிற்கு வழங்கப்பட்ட குறைந்த உரிமம் கட்டணங்களை எதிர்த்தன. இந்தியாவின் தொலைத்தொடர்பு நிறுவனங்களுக்கு வழங்கப்படும் உரிமம் கட்டணங்களை விட குறைவாக இருந்ததால், போட்டியில் பாதிப்பை ஏற்படுத்தும் என அவர்கள் கூறினர். இந்த எதிர்ப்பு, அனுமதி வழங்குவதில் மேலும் தாமதத்தை ஏற்படுத்தியது.

ஸ்டார்லிங், அதன் தாய் நிறுவனமான ஸ்பேஸ்‌எக்ஸ் பற்றிய முழுமையான உரிம விவரங்களை இந்திய அரசுக்கு வழங்கவில்லை. அமெரிக்காவின் தனியுரிமை சட்டங்களை காரணமாகக் கூறி, இந்த விவரங்களை வழங்க மறுத்தது. இந்த தகவல் பற்றாக்குறை, இந்திய அரசின் அனுமதி வழங்கும் செயல்முறையில் தாமதத்தை ஏற்படுத்தியது.

ஸ்டார்லிங்க் திட்டத்தின் கீழ், பூமியை சுற்றும் ஆயிரக்கணக்கான சிறிய செயற்கைக்கோள்கள் மூலம் இணையம் வழங்கப்படுகிறது. பாரம்பரிய டவர் வசதிகள் இல்லாத மலைப்பகுதி, வனப்பகுதி, எல்லைப் பகுதிகள் போன்ற இடங்களிலும், ஸ்டார்லிங்கின் மூலம் உயர் வேக இணைய சேவை பெற முடியும்.

இதன் அடுத்த கட்டமாக, ஸ்டார்லிங்க் இந்திய விண்வெளி ஊக்குவிப்பு மற்றும் அனுமதி மையம் (IN-SPACe) மற்றும் தகவல் பரிமாற்ற ரேடியோ அலைகளுக்கான (spectrum) ஒதுக்கீடுகளுக்காக விண்ணப்பிக்க வேண்டும்.

இதனுடன் தேசிய பாதுகாப்பு விதிமுறைகளுக்கும் உட்பட்டு சேவைகளை சோதனை செய்த பின்பே இந்திய சந்தையில் வர்த்தகமாக சேவை வழங்க அனுமதி கிடைக்கும்.

ஸ்டார்லிங்கின் விலை விவரங்களை 2022-ல் அதன் முன்னாள் இந்திய இயக்குநர் சஞ்சய் பார்கவா வெளியிட்டிருந்தார்.

அவரது கூற்றுப்படி, முதல் ஆண்டு ரூ.1.58 லட்சம் மற்றும் இரண்டாவது ஆண்டு ரூ.1.15 லட்சம் கட்டணமாக இருக்கலாம்.

ஆனால், இது இந்தியாவின் தற்போதைய குறைந்த தரவுக் கட்டணங்களைப் பொறுத்தவரை உயர்ந்ததாகவே கருதப்படுகிறது. எனவே, விலை குறைப்புகள் மற்றும் வர்த்தக சலுகைகள் எதிர்பார்க்கப்படுகின்றன.

இந்நிலையில், ஸ்டார்லிங்க் இந்தியாவின் முன்னணி தொலைத்தொடர்பு நிறுவனங்களான ஜியோ மற்றும் ஏர்டெலுடனும் கூட்டணி அமைக்க முயற்சி செய்து வருகிறது.

உபகரணங்களை உள்ளூர் சந்தையில் தயாரித்து விநியோகிக்கும் வாய்ப்பு இதன் மூலம் உருவாகலாம்.

இந்த அனுமதி, இந்திய அரசின் “டிஜிட்டல் இந்தியா” திட்டத்திற்கு புதிய ஊக்கமாக விளங்கும். 1.4 பில்லியன் மக்களில் 40% பேர் இன்னும் இணைய சேவையைப் பெறாத நிலையில், ஸ்டார்லிங்கின் சேவைகள் இந்த இடைவெளியை நிரப்பும் முக்கிய முயற்சியாக பார்க்கப்படுகிறது.

தகவல் சமத்துவம், கல்வி, டிஜிட்டல் சேவைகள் மற்றும் அவசர தொடர்பு வசதிகளை அனைத்து பிராந்தியங்களுக்கும் கொண்டு சேர்க்கும் வகையில், செயற்கைக்கோள் இணைய சேவைகள் இந்தியாவின் வளர்ச்சிப் பாதையில் மாற்றத்தை ஏற்படுத்தும் என்று வல்லுநர்கள் கருதுகின்றனர்.