பீகாரில் காலை உணவுத் திட்டம்.. திமுக பாணியில் பாஜக கூட்டணி தேர்தல் அறிக்கை!

பீகார் சட்டமன்றத் தேர்தல் 2025 களம் (Bihar Election NDA Manifesto) சூடுபிடித்துள்ள நிலையில், பாஜக தலைமையிலான தேசிய ஜனநாயகக் கூட்டணி (NDA) இன்று (அக்டோபர் 31, 2025) தனது பிரம்மாண்டமான தேர்தல் அறிக்கையை, “சங்கல்ப் பத்ரா” என்ற பெயரில் வெளியிட்டது.

பீகாரில் நவம்பர் 6 மற்றும் 11 ஆகிய தேதிகளில் இரண்டு கட்டங்களாக நடைபெறவுள்ள தேர்தலை எதிர்நோக்கி, மாநில மக்கள் மத்தியில் பெரும் எதிர்பார்ப்புகளை உருவாக்கியுள்ள இந்த அறிக்கை, பல கவர்ச்சிகரமான வாக்குறுதிகளை அள்ளி வீசியுள்ளது.

பாஜக தேசியத் தலைவர் ஜே.பி. நட்டா, பீகார் முதல்வர் நிதிஷ் குமார், ஹம் (எஸ்) தலைவர் ஜிதன் ராம் மாஞ்சி, லோக் ஜனசக்தி கட்சித் தலைவர் சிராக் பாஸ்வான் மற்றும் ஆர்.எல்.எம் தலைவர் உபேந்திர குஷ்வாஹா உள்ளிட்ட முக்கிய NDA தலைவர்கள் முன்னிலையில் இந்தப் பிரகடனம் வெளியிடப்பட்டது.

பீகார் மக்களுக்கு வளர்ச்சி, வேலைவாய்ப்பு மற்றும் சமூக நலன்களை மையமாகக் கொண்டு 25 முக்கிய வாக்குறுதிகள் இதில் இடம்பெற்றுள்ளன.

முக்கிய வாக்குறுதிகள்:

• இளைஞர்களுக்கு ஒரு கோடிக்கும் அதிகமான அரசு வேலைகள் மற்றும் புதிய வேலைவாய்ப்புகளை உருவாக்குவதாக என்.டி.ஏ உறுதி அளித்துள்ளது. மேலும், ஒவ்வொரு மாவட்டத்திலும் உள்ள திறன் மேம்பாட்டு மையங்களை உலகத் தரம் வாய்ந்தவையாக மேம்படுத்துவது, ஒரு கோடி “லட்சாதிபதி தீதி” (கோடீஸ்வரப் பெண்கள்) உருவாக்குவது மற்றும் சில பெண்களை “மிஷன் குரோர்பதி” திட்டத்தின் கீழ் கோடீஸ்வரர்களாக மாற்றுவது போன்ற திட்டங்களும் இதில் அடங்கும்.
• ஏழை மாணவர்களுக்கு இலவசக் கல்வியுடன் காலை மற்றும் மதிய உணவுத் திட்டத்தை வழங்க பாஜக வாக்குறுதி அளித்துள்ளது. மேலும், கே.ஜி. முதல் முதுகலைப் படிப்பு (PG) வரை அனைவருக்கும் இலவச மற்றும் தரமான கல்வி அளிப்பதாகத் தெரிவிக்கப்பட்டுள்ளது.
• பட்டியல் சாதி மாணவர்களின் உயர்கல்விக்கு மாதந்தோறும் ₹2000 நிதியுதவி வழங்கப்படும் என்பதும் இதில் குறிப்பிடத்தக்கது.
• ‘கபூர்கரி தாக்கூர் கிசான் சம்மான் நிதி’ திட்டத்தின் கீழ் விவசாயிகளுக்கு ஆண்டுக்கு ₹3,000 வழங்கப்படும், இது மொத்தமாக ₹9,000 வரை சென்றடையும்.
• மெகா உள்கட்டமைப்பு மேம்பாடு: ₹50 லட்சம் கோடி முதலீட்டில் ஏழு விரைவுச் சாலைகள், 10 புதிய தொழில் பூங்காக்கள், நான்கு புதிய மெட்ரோ திட்டங்கள் மற்றும் 3600 கிலோமீட்டர் ரயில்வே பாதைகளை நவீனமயமாக்குவது போன்ற பிரம்மாண்ட வாக்குறுதிகள் அளிக்கப்பட்டுள்ளன.
• தர்பங்கா, பூர்னியா, பாகல்பூர் விமான நிலையங்களை சர்வதேசத் தரத்திற்கு உயர்த்தி, 10 புதிய நகரங்களுக்கு உள்நாட்டு விமானச் சேவையை விரிவுபடுத்துவதாகவும் அறிவிக்கப்பட்டுள்ளது.
• ஒவ்வொரு மாவட்டத்திலும் நவீன உற்பத்திப் பிரிவுகள் உருவாக்கப்படும் என்றும் தெரிவிக்கப்பட்டுள்ளது.
• ஏழை எளிய மக்களுக்கு இலவச ரேஷன், 125 யூனிட் வரை இலவச மின்சாரம், ₹5 லட்சம் வரை இலவச மருத்துவ சிகிச்சை, 50 லட்சம் புதிய கான்கிரீட் வீடுகள் மற்றும் சமூகப் பாதுகாப்பு ஓய்வூதியம் ஆகியவை என்.டி.ஏ-வின் முக்கிய வாக்குறுதிகளாகும்.
• மிகவும் பின்தங்கிய வகுப்பினருக்கு ₹10 லட்சம் வரை நிதியுதவி அளிப்பதாகவும் தேர்தல் அறிக்கையில் குறிப்பிடப்பட்டுள்ளது.
• “லட்சாதிபதி தீதி” திட்டத்தின் கீழ் ஒரு கோடி பெண்களுக்கு நிதி உதவி அளிப்பதுடன், பெண்களுக்கு ₹2 லட்சம் வரை நிதியுதவி வழங்கப்படும் என்றும் வாக்குறுதி அளிக்கப்பட்டுள்ளது.
• சீதாமர்ஹி மாவட்டத்தில் உள்ள சீதாதேவியின் பிறந்த இடமாகக் கருதப்படும் புனௌரா தாம் ஜானகி கோவிலை உலகத் தரம் வாய்ந்த ஆன்மீக நகரமாக மேம்படுத்துவதும், சுற்றுலாப் பயணிகளை ஈர்ப்பதும் தேர்தல் அறிக்கையின் முக்கிய அம்சங்களில் ஒன்றாகும்.