பிகார் சட்டமன்றத் தேர்தலின் முதல் கட்ட வாக்குப்பதிவு விறுவிறுப்பாக நடைபெற்று வரும் நிலையில், இன்று பிற்பகல் 1 மணி நிலவரப்படி ஒட்டுமொத்தமாக 42.31% வாக்குகள் பதிவாகியுள்ளதாக தேர்தல் ஆணையம் அறிவித்துள்ளது.
கோபால்கஞ்ச் மாவட்டம் அதிகபட்சமாக 46.73% வாக்குப்பதிவை எட்டி முன்னிலை வகிக்கிறது. அதைத் தொடர்ந்து லகிசராய் (46.37%) மற்றும் பெகுசராய் (46.02%) ஆகிய மாவட்டங்களிலும் நல்ல வாக்குப்பதிவு பதிவாகியுள்ளது. முசாபர்பூர் (45.41%) மற்றும் சஹர்சா (44.20%) ஆகிய பகுதிகளிலும் வாக்காளர்கள் ஆர்வமுடன் வாக்களித்து வருகின்றனர்.
அதே சமயம், பிகார் மாநிலத் தலைநகரான பாட்னாவில் குறைந்தபட்சமாக 37.72% வாக்குகள் மட்டுமே பதிவாகியுள்ளன. பிற மாவட்டங்களான போஜ்பூர் (41.15%), பக்ஸர் (41.10%), தர்பங்கா (39.35%), ககாரியா (42.94%), மாதேபுரா (44.16%), முங்கேர் (41.47%), நாலந்தா (41.87%), சமஸ்திபூர் (43.03%), சாரன் (43.06%), ஷேக்ஸ்புரா (41.23%), சிவான் (41.20%), வைஷாலி (42.60%) ஆகியவையும் குறிப்பிடத்தக்க வாக்குப்பதிவைச் சந்தித்துள்ளன.
மொத்தம் 18 மாவட்டங்களில் உள்ள 121 தொகுதிகளில் நடைபெற்று வரும் இந்த முதல் கட்டத் தேர்தலில், சுமார் 3.75 கோடி வாக்காளர்கள் 1314 வேட்பாளர்களின் அரசியல் எதிர்காலத்தைத் தீர்மானிக்க உள்ளனர்.
காலை 9 மணி நிலவரப்படி 13.13% ஆக இருந்த வாக்குப்பதிவு, 11 மணிக்கு 27.65% ஆக உயர்ந்து, தற்போது 1 மணிக்கு 42.31% ஐ எட்டியுள்ளது.
இந்த தேர்தலில் என்.டி.ஏ கூட்டணிக்கும், இந்தியா கூட்டணிக்கும் இடையே கடுமையான போட்டி நிலவி வருகிறது. வரும் நவம்பர் 11ஆம் தேதி இரண்டாம் கட்ட தேர்தல் நடைபெறவிருக்கிறது என்பது குறிப்பிடத்தக்கது.