பிக்பாஸ் தமிழ் 9 நிகழ்ச்சி ஒவ்வொரு வாரமும் ஒரு புதிய திருப்பத்துடன் ரசிகர்களை ஆச்சரியத்தில் ஆழ்த்தி வருகிறது. குறிப்பாக, நான்காவது வாரம் அனல் பறக்கும் சண்டைகள், கண்ணீர்த் துளிகள், பிக்பாஸின் டாஸ்க்குகள் மற்றும் எதிர்பாராத திருப்பங்களுடன் பரபரப்பாக அரங்கேறியது.
இந்த வாரத்தின் மிக முக்கியமான நிகழ்வாக “BB Push” கேப்டன்சி டாஸ்க் அமைந்தது. இது உடல் வலிமை மற்றும் ஒருங்கிணைப்பு தேவைப்படும் ஒரு சவாலான டாஸ்க் ஆகும். இந்த டாஸ்க்கில் கனி, பிரவீன் ராஜ் மற்றும் விக்ரம் இடையே கடுமையான வார்த்தைப் போர்கள் வெடித்தன. இறுதியில், பிரவீன் ராஜ் அனைவரையும் தாண்டி நான்காவது வாரத்தின் புதிய தலைவராகத் தேர்ந்தெடுக்கப்பட்டார்.
பிரவீனின் ‘ராணுவ ஆட்சி’யால் வெடித்த மோதல்கள்!
நான்காவது வாரத்தின் கேப்டனாக பிரவீன் ராஜ் தேர்ந்தெடுக்கப்பட்டார். அவர் பிக்பாஸ் வீட்டை ஒரு “ராணுவப் பள்ளி” போல் மாற்றியமைத்து, கடுமையான விதிகளை வகுத்தார். போட்டியாளர்கள் அனைவருக்கும் சீருடை வழங்கப்பட்டு, ஒழுங்குமுறை பின்பற்றப்பட்டது. இந்த புதிய ஆட்சிமுறை ஆரம்பத்திலிருந்தே பெரும் சலசலப்பை ஏற்படுத்தியது.
கேப்டன் பிரவீனின் இந்த ‘ராணுவ விதி’ மற்றும் அவரது கண்டிப்பு விஜே பார்வதியுடன் பெரும் மோதலை உருவாக்கியது. பிரவீன் பாரபட்சமாக நடந்து கொள்வதாகவும், அநியாயமானவர் என்றும் பார்வதி பகிரங்கமாகக் குற்றம் சாட்டினார். இந்த மோதலில் திவாகர், பார்வதிக்கு ஆதரவாகப் பேசியதால் சண்டை மேலும் தீவிரம் அடைந்தது. திவாகரின் ஆக்ரோஷமான போக்கு பல சமயங்களில் சர்ச்சைகளைக் கிளப்பியது. சட்டை அணிய மறுத்த விவகாரம் தொடங்கி, அவரது பாரபட்சம் குறித்து சபரி, எஃப்.ஜே, கனி மற்றும் பிரவீன் ராஜ் ஆகியோர் அவருடன் நடத்திய விவாதம் வரை, திவாகர் மையப்புள்ளியாக இருந்தார்.
“BB Hat Task” என்ற சவாலில் பிக்பாஸ் போட்டியாளர்களுக்கும், சூப்பர் டீலக்ஸ் போட்டியாளர்களுக்கும் இடையே கடும் போட்டி நிலவியது. வினோத் மற்றும் கெமி ஆகியோரின் சிறப்பான செயல்பாடு பிக்பாஸ் அணிக்கு வெற்றியைத் தேடித் தந்தது. இந்த டாஸ்கின் போது கானா வினோத் மற்றும் துஷார் இடையே காரசாரமான வாக்குவாதம் ஏற்பட்டது, இது வீட்டிற்குள் நிலவிய பதற்றத்தை மேலும் அதிகரித்தது.
ஒவ்வொரு வாரமும் நடக்கும் எவிக்ஷன் நாமினேஷன் இந்த முறையும் பெரும் பரபரப்பை ஏற்படுத்தியது. வி.ஜே. பாரு, காமரூதின், கானா வினோத், அரோரா சின்க்ளேர் மற்றும் கலையரசன் ஆகியோர் இந்த வார வெளியேற்றத்திற்கு நாமினேட் செய்யப்பட்டனர். போட்டியாளர்களில் பலர் காமரூதின் மற்றும் வி.ஜே. பாருவின் அணுகுமுறை, ஒருங்கிணைப்பு இல்லாமை மற்றும் விதிகளை மீறியது போன்ற காரணங்களால் அவர்களுக்கு அதிக வாக்குகளை அளித்தனர்.
நாமினேஷன் மட்டுமல்லாது, வீட்டிற்குள் சமையல் விநியோகம் தொடர்பாக திவாகர், சபரி மற்றும் எஃப்.ஜே. இடையே ஒரு பெரிய சண்டை வெடித்தது. சபரி, எஃப்.ஜே, கனி மற்றும் ரம்யா ஆகியோர் ஒரு குழுவாகச் செயல்பட்டு உணவில் பாரபட்சம் காட்டுவதாக திவாகர் பிக்பாஸிடம் புகார் அளித்தார். இந்த மோதல் வீட்டிற்குள் இருந்தவர்களை இரண்டு குழுக்களாகப் பிரித்ததுடன், சமூக ஊடகங்களிலும் பெரும் விவாதப் பொருளாக மாறியது. இந்தப் பிரச்சனையில் கேப்டன் பிரவீன் ராஜ், சபரி, எஃப்.ஜே. மற்றும் கனி ஆகியோர் திவாகரை கடுமையாக விமர்சித்தனர். இதற்கு வி.ஜே. பாரு, வினோத், காமரூதின் ஆகியோர் திவாகருக்கு ஆதரவு தெரிவித்தனர்.
வீட்டின் விதிகளை மீறியதற்காக, போட்டியாளர்களுக்கு “Uniform” தண்டனை வழங்கப்பட்டது. இதன் காரணமாக அவர்கள் தனிப்பட்ட உடைகள், மேக்கப் பொருட்கள் மற்றும் அணிகலன்களை அணிய தடை விதிக்கப்பட்டது. வி.ஜே. பார்வதி மற்றும் காமரூதின் ஆகியோர் வாரத்தின் மோசமான போட்டியாளர்களாகத் தேர்வு செய்யப்பட்டு சிறைக்கு அனுப்பப்பட்டனர்.
ஐந்தாவது வாரத்தில் பிரஜின் பத்மநாபன், திவ்யா கணேஷ், அமித் பார்கவ் மற்றும் சாண்ட்ரா எமி ஆகியோர் வைல்ட் கார்டு போட்டியாளர்களாக நுழைய உள்ளனர். குறிப்பாக, திவ்யா கணேஷின் வருகை மிகுந்த எதிர்பார்ப்பை ஏற்படுத்தியுள்ளது, ஏனெனில் கமரூதீனுடன் அவருக்கு ஏற்கனவே மோதல்கள் இருந்தன. இதனால் வரும் வாரங்களில் மேலும் பல சண்டைகளும், திருப்பங்களும் இருக்கும் என்று எதிர்பார்க்கப்படுகிறது.