அரசியல் கட்சிகளின் பொதுக்கூட்டங்களுக்கு வழிகாட்டு நெறிமுறைகளை வகுக்கக் கோரிய வழக்கில் அதிமுகவும் தவெகவும் பல்வேறு மாற்றங்கள் செய்ய வேண்டும் என்று கேட்டுள்ளன.
கடந்த செப்டம்பர் 27ஆம் தேதி கரூரில் நடந்த தமிழக வெற்றிக் கழகப் பிரச்சாரக் கூட்ட நெரிசலில் சிக்கி 41 பேர் உயிரிழந்தனர்.
இந்த நிலையில் அனைத்து கட்சிகளையும் அழைத்து தமிழக அரசு சார்பில் வழிகாட்டு நெறிமுறைகள் தொடர்பாக பரிந்துரைகள் வழங்கப்பட்டன.
உயர்நீதிமன்ற உத்தரவின் அடிப்படையில் இந்த கூட்டம் நடைபெற்றது.
இந்தக் கூட்டப் பரிந்துரைகள் குறித்த அறிக்கையும் நீதிமன்றத்தில் தாக்கல் செய்யப்பட்டது.
இது தொடர்பான வழக்கு விசாரணை தலைமை நீதிபதி ஸ்ரீவஸ்தவா மற்றும் நீதிபதி அருள்முருகன் அமர்வில் நடந்து வந்தது.
இதில் அதிமுக சார்பில் மூத்த வழக்கறிஞர் விஜய் நாராயணன் ஆஜராகி வாதாடினார்.
“அரசின் வழிகாட்டு நெறிமுறையில் மதக் கூட்டங்களுக்கும் வழிபாட்டு கூட்டங்களுக்கும் இந்த வழிகாட்டு நெறிமுறை பொருந்தாது என்று தெரிவிக்கப்பட்டுள்ளது.
கடந்த காலங்களில் நம் மாநிலத்தில் மட்டுமல்ல நாடு முழுவதும் மத நிகழ்வுகளின் போது கூட்ட நெரிசல் காரணமாக உயிரிழப்புகள் ஏற்பட்டுள்ளது. எனவே வழிபாட்டுத்தலங்கள் அல்லது வழக்கமான இடங்களில் நடத்தப்படும் மதக் கூட்டங்களுக்கும் தற்போதைய வழிகாட்டு நெறிமுறைகளை நீட்டிக்கலாம். அல்லது அந்த நிகழ்வுகளுக்கு தனியாக வழிகாட்டு நெறிமுறைகளை கொண்டு வரலாம் என்று பரிந்துரை செய்தார்.
மேலும் அவர், தற்போதைய வரைவு வழிகாட்டு நெறிமுறைகளை பொறுத்தவரை, பொதுக்கூட்டங்கள் மற்றும் போராட்டங்களை நடத்துபவர்களுக்கு அவர்கள் விரும்பும் ஒரு நியமிக்கப்பட்ட இடம் அல்லது மாற்று இடத்தை தேர்ந்தெடுக்கும் வாய்ப்பு எப்போதும் வழங்கப்பட வேண்டும். குறிப்பிட்ட இடங்களில் மட்டுமே நிகழ்ச்சிகளை நடத்த வேண்டிய கட்டாயத்தை ஏற்படுத்தக் கூடாது என்றும் கேட்டுக்கொண்டார்.
தேசிய நெடுஞ்சாலை ஆணையம் மற்றும் மாநில நெடுஞ்சாலை துறையிடம் அனுமதி பெறுவதற்கான நிபந்தனையையும் கைவிட வேண்டும். நிகழ்ச்சிகளில் நடத்துவது குறித்து ஏற்பாட்டாளர்கள் அந்த அதிகாரிகளுக்கு தெரிவித்து காவல்துறையிடம் மட்டுமே அனுமதி பெற்றால் போதுமானது. விண்ணப்பங்களை சமர்ப்பித்த மூன்று நாட்களுக்குள் அனுமதி வழங்குவது அல்லது மறுப்பது குறித்து காவல்துறை முடிவெடுக்க வேண்டும்.
விண்ணப்பங்களை சமர்ப்பிப்பதற்கான காலக்கெடுவை நிகழ்வுக்கு முன்னதாக 15 நாட்களில் இருந்து 21 நாட்களாக அதிகரிக்க வேண்டும் உள்ளிட்ட கோரிக்கைகளை முன் வைத்தார் அதிமுக வழக்கறிஞர்.
தமிழக வெற்றிக் கழகம் சார்பில் மூத்த வழக்கறிஞர் பி வி பாலசுப்ரமணியம் ஆஜராகி, நிகழ்ச்சிகள் நடத்த நியமிக்கப்பட்ட அனைத்து இடங்களின் பட்டியலையும் மாநில அரசின் இணையதளத்தில் வெளியிட வேண்டும். ஒவ்வொரு இடத்திலும் இருக்கை மற்றும் நிற்கும் திறனை மதிப்பீடு செய்த அறிவிக்க வேண்டும்.
எதிர்பார்க்கப்படும் கூட்டம் ஒரு இடத்தின் கொள்ளளவை விட அதிகமாக இருந்தால் விண்ணப்பங்களை நிராகரிக்க கூடாது. அதற்கு பதிலாக பங்கேற்பாளர்களின் எண்ணிக்கையை குறைக்கலாம்” என்று வாதங்கள் முன்வைத்தார்.
இந்த வாதங்களை கேட்ட நீதிபதிகள் வழக்கை ஒத்தி வைத்திருந்தனர்.
இந்நிலையில் இவ்வழக்கு மீண்டும் இன்று (நவம்பர் 28) விசாரணைக்கு வந்த போது அதிமுக சார்பில் தங்களது பரிந்துரைகளை எழுத்துப்பூர்வமாக நேற்றே வழங்கி விட்டதாக தெரிவிக்கப்பட்டது.
தமிழக வெற்றிக் கழகம் மற்றும் தேசிய மக்கள் சக்தி கட்சி சார்பில் தங்களது பரிந்துரைகளை இன்று தாக்கல் செய்தனர்.
அரசு சார்பில் கூடுதல் தலைமை வழக்கறிஞர் ரவீந்திரன் ஆஜராகி அரசியல் கட்சிகள் அளித்துள்ள பரிந்துரைகள் பரிசீலிக்கப்படும் என்று தெரிவித்தார்.
இதையடுத்து இந்த வழக்கின் தீர்ப்பை நீதிபதிகள் தேதி குறிப்பிடாமல் ஒத்தி வைத்தனர்.