ஹோண்டா (Honda) நிறுவனம் சர்வதேச சந்தையில் தனது என்ட்ரி-லெவல் ஸ்போர்ட்ஸ் பைக்கான 2026 Honda CB125R மாடலை அறிமுகப்படுத்தியுள்ளது. பார்க்க அப்படியே பெரிய பைக் (Big Bike) லுக் கொடுக்கும் இந்த பைக், இப்போது புதிய வண்ணங்களில் ஜொலிக்கிறது.
புதிதாக என்ன இருக்கிறது? 2026 மாடலில் மெக்கானிக்கல் மாற்றங்கள் எதுவும் செய்யப்படவில்லை. ஆனால், பைக்கின் தோற்றத்தை மெருகேற்ற 4 புதிய கலர் ஆப்ஷன்கள் (Colour Options) அறிமுகப்படுத்தப்பட்டுள்ளன.
- மேட் ராக் கிரே (Matt Rock Gray)
- மேட் லூசென்ட் சில்வர் மெட்டாலிக் (Matt Lucent Silver Metallic)
- ஜெஃபிரோ ப்ளூ மெட்டாலிக் (Zefiro Blue Metallic)
- மேட் பேர்ல் டயஸ்ப்ரோ ரெட் (Matt Pearl Diaspro Red)
பார்ப்பதற்கு நம்ம ஊரில் விற்பனையான CB300R போலவே ‘Neo Sports Café’ டிசைனில், ரெட்ரோ மற்றும் மாடர்ன் கலந்த கலவையாக இது உள்ளது. வட்ட வடிவ எல்இடி ஹெட்லைட், கூர்மையான பெட்ரோல் டேங்க் டிசைன் என இளைஞர்களைக் கவரும் வகையில் இது வடிவமைக்கப்பட்டுள்ளது.
இன்ஜின் & பவர்: “பார்க்கத் தான் குட்டி, பவர்ல சுட்டி” என்று சொல்லும் அளவுக்கு இதன் இன்ஜின் திறன் உள்ளது.
- இன்ஜின்: 125cc, சிங்கிள் சிலிண்டர், லிக்விட் கூல்டு (Liquid Cooled) இன்ஜின்.
- பவர்: இது 14.7 bhp பவரையும், 11 Nm டார்க்கையும் வெளிப்படுத்தும்.
- கியர்: 5-ஸ்பீடு கியர்பாக்ஸ் உள்ளது.
பிரீமியம் வசதிகள்: சாதாரண 125cc பைக்குகளில் இல்லாத பல ஹை-டெக் வசதிகள் இதில் உள்ளன.
- சஸ்பென்ஷன்: முன்பக்கம் தடிமனான 41mm ஷோவா (Showa) USD ஃபோர்க்ஸ் கொடுக்கப்பட்டுள்ளது. இது பெரிய பைக்குகளில் மட்டுமே வரக்கூடியது.
- பிரேக்கிங்: பாதுகாப்பிற்கு இரண்டு சேனல் ABS (Dual Channel ABS) மற்றும் IMU சென்சார் உள்ளது. இது வளைவுகளில் திரும்பும்போது பிரேக் அடித்தால் பைக் சறுக்காமல் பார்த்துக்கொள்ளும்.
- எடை: வெறும் 130 கிலோ எடை மட்டுமே என்பதால், டிராஃபிக்கில் புகுந்து புறப்பட்டுச் செல்ல (City Riding) மிகவும் இலகுவாக இருக்கும்.
- திரை: 5 இன்ச் டிஎஃப்டி (TFT) டிஸ்ப்ளே உள்ளது.
இந்தியாவுக்கு வருமா? இதுதான் நம்ம பைக் பிரியர்களின் முக்கியக் கேள்வி. உண்மையைச் சொல்ல வேண்டுமென்றால், இந்த பைக் இந்தியாவுக்கு வருவதற்கான வாய்ப்பு மிக மிகக் குறைவு.
ஏனென்றால், இதில் உள்ள லிக்விட் கூல்டு இன்ஜின், ஷோவா சஸ்பென்ஷன் போன்ற பிரீமியம் வசதிகளால் இதன் விலை மிக அதிகமாக இருக்கும். 125cc பைக்குக்கு 1.5 லட்சத்திற்கு மேல் விலை கொடுத்தால் இந்தியாவில் விற்பனை ஆவது கஷ்டம். நம்ம ஊர் மார்க்கெட் ‘மைலேஜ் மற்றும் விலை’ (Price Sensitive) சார்ந்தது. இந்தியாவில் ஹோண்டா ஏற்கனவே SP 125 மற்றும் Shine 125 ஆகிய மாடல்களை வெற்றிகரமாக விற்று வருகிறது. பிரீமியம் செக்மென்டில் CB300F மற்றும் ஹைனஸ் (H’ness) மாடல்கள் உள்ளன. எனவே, இந்த “குட்டி பீஸ்ட்” இப்போதைக்கு வெளிநாட்டுச் சாலைகளில் மட்டுமே உறுமும்!