திமுக அரசுக்கு எதிராக பாஜகவின் குற்றப்பத்திரிகை.. பியூஷ் கோயல் பேசியது என்ன?

தமிழ்நாட்டில் திமுக ஆட்சிக்கு எதிராக ‘குற்றப்பத்திரிகை’யை ((chargesheet) பாஜக வெளியிட்டுள்ளது.

சென்னையில் இன்று மார்ச் 31-ந் தேதி திமுக அரசுக்கு எதிரான குற்றப்பத்திரிகயை வெளியிட்டு மத்திய அமைச்சர் பியூஷ் கோயல் பேசியதாவது: இந்தத் தேர்தல் தமிழக வரலாற்றில் ஒரு திருப்புமுனையாக இருக்கும். இந்தத் தேர்தல், திமுக தலைமையிலான புனிதமற்ற கூட்டணியை, தமிழகம் இதுவரை கண்டிராத மிக மோசமான ஆட்சியை அம்பலப்படுத்தும்.

திமுக ஆட்சி ஒரே ஒரு குடும்பத்தால் நடத்தப்படுகிறது. இதில் முதல்வர் ஸ்டாலின், துணை முதல்வர் உதயநிதி ஸ்டாலின், நாடாளுமன்ற உறுப்பினர் கனிமொழி, மாப்பிள்ளை சபரீசன் என ஒட்டுமொத்த குடும்பமும் தமிழ்நாடு மாநிலத்தைச் சுரண்டுவதில் ஈடுபட்டுள்ளது. உள் நாட்டிலும், உலக அளவிலும் தமிழ்நாட்டின் பிம்பத்தை அவர்கள் கெடுத்துவிட்டனர்.

தமிழ் கலாச்சாரத்தைப் பற்றி நாங்கள் பெருமிதம் கொள்கிறோம். தமிழ் மொழியை எண்ணிப் பெருமைப்படுகிறோம். வளர்ச்சிக்கும், சமூகத்தின் ஒவ்வொரு பிரிவினரின் நல்வாழ்வுக்கும் பாடுபடுகிறோம் என்பதில் பெருமைப்படுகிறோம்.

தமிழகத்தில் எடப்பாடி பழனிசாமி தலைமையிலான தேசிய ஜனநாயகக் கூட்டணி, பிரதமர் மோடியின் வழிகாட்டுதல் மற்றும் ஆசியுடன், தமிழ் மொழியின் பெருமை, இலக்கியம், கலாச்சாரம் மற்றும் வளமான மரபுகளை மீண்டும் மீட்டெடுப்பதை உறுதி செய்யும். கடந்த 5 ஆண்டுகளாகத் தமிழ்நாட்டு மக்கள் எதிர்பார்த்துக் கொண்டிருக்கும் நல்லாட்சியை நாங்கள் கொண்டு வருவோம்.

இன்று, 8 கோடி தமிழ் சகோதர சகோதரிகளின் வலியையும் வேதனையையும் பகிர்ந்து கொள்ள நான் இங்கே வந்திருக்கிறேன். ஸ்டாலின் மற்றும் உதயநிதியின் ஊழல் நிறைந்த மற்றும் முற்றிலும் பொறுப்பற்ற ஆட்சிக்கு எதிரான இந்த “குற்றப்பத்திரிகையை” Charge sheet இன்று நாங்கள் வெளியிடுகிறோம்.

இந்தக் குற்றப்பத்திரிகையில் உள்ள ஒவ்வொரு வார்த்தையும் ஆதாரபூர்வமான உண்மைகளால் ஆனது. இதை திமுகவோ, காங்கிரஸோ மறுக்க முடியாது. அவர்களால் யதார்த்தத்திலிருந்து ஒளிந்து கொள்ள முடியாது, மக்களின் கோபத்திலிருந்து தப்பிக்கவும் முடியாது.

தமிழ்நாட்டின் இந்தத் தந்தை-மகன் ஆட்சியானது, தமிழ் சமூகத்தின் ஒவ்வொரு பிரிவினருக்கும் எதிராகக் குற்றங்களை இழைத்துள்ளது. அவர்கள் பெண்களுக்கு எதிராகக் குற்றங்களைச் செய்துள்ளனர், குழந்தைகளுக்கு எதிராகக் குற்றங்களைச் செய்துள்ளனர், தலித் மக்களுக்கு எதிராகக் குற்றங்களைச் செய்துள்ளனர், இந்துக்களுக்கு எதிராகக் குற்றங்களைச் செய்துள்ளனர். அவர்கள் இளைஞர்களையும், விவசாயிகளையும் கூட விட்டுவைக்கவில்லை.

• கடந்த ஐந்து ஆண்டு திமுக ஆட்சியில் பெண்களுக்கு எதிரான பாலியல் வன்கொடுமை வழக்குகள் அதிர்ச்சியளிக்கும் வகையில் அதிகரித்துள்ளன.
• 2022-ஆம் ஆண்டில் 4,968 ஆக இருந்த போக்சோ வழக்குகள், 2024-ஆம் ஆண்டில் 6,969 ஆக உயர்ந்துள்ளன.
• திமுகவின் கவுன்சிலர்கள் மற்றும் இளைஞரணி தலைவர்களே பாலியல் வன்கொடுமை குற்றச்சாட்டுகளுக்கு ஆளாகியுள்ளனர்; அவர்கள் மீது முதல்வர் ஸ்டாலினோ அல்லது உதயநிதி ஸ்டாலினோ எந்த நடவடிக்கையும் எடுக்கவில்லை
• கடந்த மூன்று ஆண்டுகளில் மட்டும் மணல் சுரங்கம் மற்றும் விற்பனையில் சுமார் 4,700 கோடி ரூபாய் ஊழல் நடந்துள்ளதாகக் கூறப்படுகிறது.
• டாஸ்மாக் (TASMAC) முறைகேடு- சட்டவிரோத மது விற்பனை மற்றும் முறைகேடுகள் மூலம் சுமார் 1 லட்சம் கோடி ரூபாய் ஊழல் நடந்துள்ளது. இது மக்களின் உடல்நலத்தையும் மாநில பொருளாதாரத்தையும் பாதித்துள்ளது.
• நெடுஞ்சாலைத் துறை டெண்டர்கள், தாது மணல் கொள்ளை மற்றும் நகராட்சி நிர்வாகங்களில் நடந்த ஊழல்கள் மாநிலத்தின் முதலீட்டு வாய்ப்புகளைப் பாதித்துள்ளன.
• சட்டம் ஒழுங்கு மற்றும் பாதுகாப்பு- ஸ்டாலின் – உதயநிதி ஸ்டாலின் குடும்ப ஆட்சியில் சட்டம் ஒழுங்கு முற்றிலும் சீர்குலைந்துள்ளது.
• கடந்த 5 ஆண்டுகளில் தமிழகத்தில் 8,900 கொலைகள் நடந்துள்ளன. விசாரணை ஏதுமின்றி 32 லாக்கப் மரணங்கள் (சிறை/காவல் மரணங்கள்) நடந்துள்ளன. நீதிமன்ற வளாகங்களுக்குள்ளேயே நீதிபதிகள் மற்றும் வழக்கறிஞர்கள் தாக்கப்படும் சூழல் நிலவுகிறது.

நிறைவேற்றப்படாத தேர்தல் வாக்குறுதிகள்

• திமுக அளித்த 505 தேர்தல் வாக்குறுதிகளில் 70% வாக்குறுதிகள் இன்னும் நிறைவேற்றப்படவில்லை.
• சமையல் எரிவாயு (Gas Cylinder) மானியம் வழங்கப்படவில்லை.
• பெட்ரோல் மற்றும் டீசல் விலையைக் குறைக்கவில்லை.
• கல்விக்கடன் தள்ளுபடி செய்யப்படவில்லை.
• அரசுத் துறைகளில் 3.5 லட்சம் வேலைவாய்ப்புகள் வழங்கப்படும் என்ற வாக்குறுதி பொய்த்துப் போனது.
• மீனவர்கள் மற்றும் விவசாயிகளுக்கு அளித்த வாக்குறுதிகளும் நிறைவேற்றப்படவில்லை.

போதைப்பொருள் அச்சுறுத்தல்

‘போதைப்பொருள் இல்லா தமிழ்நாடு’ என்று முழக்கமிட்டு ஆட்சிக்கு வந்த திமுக ஆட்சியில் போதைப்பொருள் தொடர்பான குற்றங்கள் 51% அதிகரித்துள்ளன.

2021-ல் 6,852 ஆக இருந்த போதைப்பொருள் வழக்குகள், ஓராண்டிலேயே (2022-ல்) 10,385 ஆக உயர்ந்துள்ளன.

ஸ்டாலின், ஜாஃபர் சாதிக் மற்றும் சர்பராஸ் நவாஸ் போன்ற போதைப்பொருள் கும்பல் தலைவர்களுக்கு கட்சிப் பதவிகளை வழங்கி வெகுமதி அளிக்கிறார், இவர்கள் உயர்மட்ட திமுக தலைவர்களுடன் அடிக்கடி காணப்படுகிறார்கள்.

பட்டியல் சாதியினருக்கு (SC) எதிரான குற்றங்களைக் காணும்போது நாங்கள் வேதனைப்படுகிறோம்; பட்டியல் சாதியினருக்கு எதிரான குற்றங்கள் 2021 முதல் 2023 வரையிலான வெறும் இரண்டு ஆண்டுகளில் 1377-லிருந்து 1921-ஆக அதிகரித்துள்ளன.”

இந்தக் கொடுமைகள் மீது நடவடிக்கை எடுக்க ஸ்டாலின் தவறிவிட்டார்;

புதுக்கோட்டையில் பட்டியல் சாதியினரின் தண்ணீர் தொட்டிகளில் மனிதக் கழிவுகள் கலக்கப்பட்டதும், நமது பட்டியல் சாதி சகோதர சகோதரிகளின் பல ஆணவக் கொலைகளும் கண்டிக்கத்தக்கவை.

தமிழ்நாட்டின் ஒட்டுமொத்த நிதி நிர்வாகமும் ஸ்டாலின் குடும்பத்தால் முற்றிலும் பாழாக்கப்பட்டுவிட்டது என்பதை இது தெளிவாகக் காட்டுகிறது.

வருவாய்ப் பற்றாக்குறை 17% ஆக உயர்ந்துள்ள நிலையில், திமுக தமிழ்நாட்டை திவால் நிலையை நோக்கித் தள்ளியுள்ளது.

மொத்த மாநிலக் கடன் 10,71,000 கோடி ரூபாய்க்கும் அதிகமாக உயர்ந்துள்ளது; இன்று நாட்டின் அதிகக் கடன் சுமை கொண்ட மாநிலங்களில் ஒன்றாகத் தமிழ்நாடு உள்ளது.

இந்தச் சுமை தமிழ்நாட்டின் 8 கோடி மக்கள் மீதும், ஒவ்வொரு சகோதர சகோதரி மீதும் உள்ளது என்பது வருத்தத்திற்குரியது.

உள்கட்டமைப்பு சிதைந்து போவதையும், சிறுதொழில், MSME-கள், மீனவர்கள் மற்றும் விவசாயிகளை ஊக்குவிக்க வேண்டிய நிதி மக்களுக்குச் சென்றடையாமல் அவர்கள் துயரப்படுவதையும் நீங்கள் காண்கிறீர்கள்.

மத்திய அரசு ஜிஎஸ்டி (GST) இழப்பீடாகத் தமிழ்நாட்டிற்கு வழங்கிய 50,700 கோடி ரூபாயில் ஒரு ரூபாய் கூட மக்களின் உள்ளூர் தேவைகளைப் பூர்த்தி செய்ய உள்ளாட்சி அமைப்புகளுக்கு வழங்கப்படவில்லை.

இந்து எதிர்ப்பு திமுக ஆட்சி

திமுக மற்றும் அதன் தலைவர்களின் வெளிப்படையான இந்து எதிர்ப்பு நிலைப்பாட்டை நாம் அடிக்கடி பார்த்திருக்கிறோம்; அவர்கள் திட்டமிட்டே இந்து நம்பிக்கையை அவமதித்துள்ளனர்.

முதலமைச்சர் ஸ்டாலின் நமது வேத மந்திரங்களை ‘அருவருப்பானது’ என்று அழைப்பதைக் கேட்டிருக்கிறோம்; தமிழ்நாடு தனது கலாச்சாரம் மற்றும் பாரம்பரியம் குறித்து பெருமிதம் கொள்கிறது, நமது நம்பிக்கையை அவர்கள் தாக்குவதை எப்படிப் பொறுத்துக்கொள்ள முடியும்?

கனிமொழி அவர்கள் திருப்பதியை எள்ளி நகையாடியதை நாம் பார்த்தோம்.

உதயநிதி ஸ்டாலின், சனாதன தர்மத்தை மலேரியா மற்றும் டெங்குவுடன் ஒப்பிட்டு அதை ஒழிக்க அழைப்பு விடுத்ததை எவராலும் மன்னிக்க முடியாது.

கார்த்திகை தீப விவகாரம் திமுகவை முழுமையாக அம்பலப்படுத்தியது; அவர்கள் இந்துக்களுக்கு விரோதமானவர்கள், மெட்ராஸ் உயர் நீதிமன்ற உத்தரவை அவர்கள் வெளிப்படையாக நிராகரித்துள்ளனர்.

சிறுபான்மை வாக்கு வங்கி அரசியலுக்காகச் செயல்படும் இந்த இந்து எதிர்ப்பு ஸ்டாலின் அரசாங்கத்தை நினைத்து நான் முற்றிலும் வெட்கப்படுகிறேன்.

மரியாதைக்குரிய பிரதமர் மோடி, புனிதமான திருப்பரங்குன்றம் கோயிலுக்குச் சென்று, மறைந்த பூர்ணச்சந்திரன் அவர்களின் குடும்பத்தினரைச் சந்தித்தபோது, ஒரு வகையில் பிரதமர் அவர்கள் அக்குடும்பத்திற்கு நீதி வழங்கினார்; அவர் பக்தர்களின் கௌரவத்தை மீட்டெடுத்தார்.

இது வெறும் குற்றப்பத்திரிகை மட்டுமல்ல, திரு. ஸ்டாலின் அரசாங்கத்தின் தவறான நிர்வாகத்தின் கண்ணாடி.

ஸ்டாலின் குடும்பம் மற்றும் திமுக-காங்கிரஸ் கூட்டணியின் தவறான ஆட்சியைத் தமிழ்நாடு இனி ஐந்து ஆண்டுகளுக்குத் தாங்க முடியாது என்பதற்கான எச்சரிக்கை இது.

ஸ்டாலின் மற்றும் உதயநிதி ஸ்டாலினின் தோல்விகள் குறித்த உண்மைகளைப் படித்த பிறகு, தமிழக மக்கள் இந்த ‘குற்றப்பத்திரிகையை’ (Charge sheet) ஒரு ‘மாற்றத்திற்கான தாளாக’ (Change sheet) மாற்றுவார்கள் என்று நான் நம்புகிறேன்.

தமிழக மக்களுக்கு மாற்றம் தேவை. இந்த ஊழல் நிறைந்த திமுக அரசை அகற்ற அவர்கள் விரும்புகிறார்கள். எடப்பாடி பழனிசாமி தலைமையிலான ஒரு நல்ல அரசாங்கத்திற்கும், நரேந்திர மோடி அவர்களின் சிறப்பான ஆட்சி மற்றும் வளர்ச்சி, மக்கள் நலக் கொள்கைகளால் வழிநடத்தப்படும் அரசாங்கத்திற்கும் வாக்களிக்க மக்கள் முடிவு செய்துள்ளனர்.

மத்தியிலும் மாநிலத்திலும் உள்ள என்.டி.ஏ (NDA) கூட்டணியின் இரட்டை எஞ்சின் தமிழக மக்களுக்குச் சேவை செய்யும் என்பதையும், தமிழகத்தில் நல்லாட்சியை உறுதி செய்து, வளர்ச்சி மற்றும் ஸ்திரத்தன்மையைக் கொண்டுவரும் என்பதையும் நாங்கள் உறுதி செய்வோம். இதன் மூலம் ஒரு ‘வளர்ச்சியடைந்த தமிழ்நாடு’ (Viksit Tamil Nadu), ‘வளர்ச்சியடைந்த இந்தியாவின்’ (Viksit Bharat) முன்னணியில் இருக்கும்.

வளர்ச்சியடைந்த பாரதத்திற்கு ‘வளர்ச்சியடைந்த தமிழ்நாடு’ தான் பாதை. எங்களது தமிழ் சகோதர சகோதரிகளின் சாதனைகளால் பாரதம் பெருமிதம் கொள்கிறது. நாம் அனைவரும் இணைந்து தமிழகத்தை இந்தியாவின் சிறந்த மாநிலமாக மாற்றுவோம். இவ்வாறு பியூஷ் கோயல் கூறினார்.

செய்தியாளர்களின் கேள்விகளுக்கு பியூஷ் கோயல் அளித்த பதில்கள்:

கேள்வி: திமுகவின் ஊழல் குறித்து நீங்கள் தொடர்ந்து குற்றம் சாட்டுகிறீர்கள். நீங்கள் தான் மத்தியில் ஆட்சியில் இருக்கிறீர்கள். அப்படியிருக்கையில் நடவடிக்கை எடுக்காமல் உங்கள் அரசு ஏன் அமைதியாக இருக்கிறது?

பதில்: நாங்கள் பலமுறை நடவடிக்கை எடுக்க முயற்சி செய்தோம். ஆனால் மாநில அரசு வழக்குத் தொடர அனுமதி அளிக்காமலும், ஊழல் அரசியல்வாதிகள், அமைச்சர்கள் மற்றும் தமிழக அதிகாரிகள் மீது நடவடிக்கை எடுக்க அனுமதி (sanction) வழங்காமலும் தடுத்து நிறுத்தியுள்ளது.

கேள்வி: திமுக ஆட்சியில் 4 லட்சம் கோடி ரூபாய்க்கும் மேல் ஊழல் நடந்துள்ளதாகக் கூறி எடப்பாடி பழனிசாமி அவர்கள் ஆளுநரிடம் மனு அளித்துள்ளார். இது குறித்து உங்கள் கருத்து என்ன?

பதில்: திமுக மற்றும் ஸ்டாலின் குடும்பத்தைச் சேர்ந்த இந்த ஊழலில் ஈடுபட்ட எவரையும் நாங்கள் விடமாட்டோம். தமிழக மக்களின் ஆசீர்வாதத்துடனும் உங்கள் ஆதரவுடனும் புதிய அரசு பதவியேற்றவுடன், திமுக அரசாலும் ஸ்டாலின் குடும்பத்தாலும் கொள்ளையடிக்கப்பட்ட ஒவ்வொரு ரூபாயும் மீட்கப்படுவதை உறுதி செய்வோம்.

ஸ்டாலின் ஆகட்டும், உதயநிதி ஆகட்டும், சபரீசன் அல்லது கனிமொழி ஆகட்டும், ஸ்டாலின் குடும்பத்தைச் சேர்ந்த யாரையும் அவர்களின் ஊழல் நடவடிக்கைகளுக்காகவும், தமிழக மக்களுக்கு எதிராகச் செய்த தவறுகளுக்காகவும் நாங்கள் விடமாட்டோம். இவ்வாறு பியூஷ் கோயல் தெரிவித்தார்.