டெல்லி – ஆக்ரா யமுனை விரைவுச் சாலை (Yamuna Expressway) என்றாலே வேகத்திற்குப் பெயர் பெற்றது. ஆனால், அந்த வேகம் இன்று 13 பேரின் உயிரைப் பறிக்கும் எமனாக மாறியிருக்கிறது. கடும் பனிமூட்டம் காரணமாக நேற்று (டிசம்பர் 16) அதிகாலை நடந்த சங்கிலித் தொடர் விபத்து (Pile-up accident), ஒட்டுமொத்த நாட்டையும் சோகத்தில் ஆழ்த்தியுள்ளது.
நடந்தது என்ன?
உத்தரப் பிரதேச மாநிலம் மதுரா அருகே உள்ள பால்தேவ் பகுதியில், செவ்வாய்க்கிழமை அதிகாலை 4.30 மணியளவில் இந்த விபத்து நிகழ்ந்துள்ளது. அப்பகுதியில் பனிமூட்டம் மிக அதிகமாக இருந்ததால், எதிரே வரும் வாகனங்கள் கண்ணுக்குத் தெரியாத நிலை இருந்துள்ளது.
முதலில் ஒரு பேருந்தும் காரும் மோதியுள்ளன. விபத்து நடந்ததை அறியாமல், பின்னால் வந்துகொண்டிருந்த அடுத்தடுத்த வாகனங்கள் ஒன்றன்பின் ஒன்றாக மோதின. இதில் சுமார் 7 பேருந்துகள் மற்றும் 3 கார்கள் என மொத்தம் 10-க்கும் மேற்பட்ட வாகனங்கள் ஒன்றுடன் ஒன்று மோதிச் சிதறின.
தீப்பிடித்த வாகனங்கள் – அலறல் சத்தம்:
மோதிய வேகத்தில் வாகனங்களின் பெட்ரோல் டேங்க் வெடித்ததில், பேருந்துகள் தீப்பற்றி எரியத் தொடங்கின. அதிகாலை நேரம் என்பதால் பயணிகள் அனைவரும் ஆழ்ந்த உறக்கத்தில் இருந்தனர். கண்விழிப்பதற்குள் நாலாபுறமும் தீ சூழ்ந்துகொண்டது. பேருந்துக்குள் சிக்கிய பயணிகள், “காப்பாத்துங்க… காப்பாத்துங்க…” என்று அலறிய சத்தம் நெஞ்சைப் பதற வைத்ததாக நேரில் பார்த்தவர்கள் கூறுகின்றனர்.
இந்தக் கோர விபத்தில், தீயில் கருகி சம்பவ இடத்திலேயே 13 பேர் பரிதாபமாக உயிரிழந்தனர். 50-க்கும் மேற்பட்டோர் படுகாயங்களுடன் மருத்துவமனையில் அனுமதிக்கப்பட்டுள்ளனர். உடல்கள் அடையாளம் தெரியாத அளவிற்கு எரிந்துள்ளதால், டிஎன்ஏ (DNA) பரிசோதனை மூலமே அடையாளம் காண முடியும் என்ற சூழல் நிலவுகிறது.
தாயின் தியாகம்:
இந்த சோகத்திற்கு நடுவே ஒரு நெகிழ்ச்சியான சம்பவமும் நடந்துள்ளது. பார்வதி என்ற பெண், தீப்பிடித்த பேருந்துக்குள் இருந்துகொண்டே, ஜன்னல் கண்ணாடியை உடைத்துத் தனது இரண்டு குழந்தைகளை வெளியே வீசிக் காப்பாற்றியுள்ளார். ஆனால், அவரால் வெளியே வர முடியாமல் தீயில் சிக்கிக்கொண்டார். குழந்தைகளின் உயிரைக் காக்கத் தன் உயிரைத் தியாகம் செய்த அந்தத் தாயின் செயல் அனைவரையும் கலங்க வைத்துள்ளது.
நிவாரணம் அறிவிப்பு:
சம்பவ இடத்திற்கு விரைந்த மீட்புக்குழுவினர் தீயை அணைத்து காயமடைந்தவர்களை மீட்டனர். பிரதமர் நரேந்திர மோடி மற்றும் உ.பி முதல்வர் யோகி ஆதித்யநாத் ஆகியோர் உயிரிழந்தவர்களின் குடும்பங்களுக்குத் தலா 2 லட்சம் ரூபாயும், காயமடைந்தவர்களுக்கு 50,000 ரூபாயும் நிவாரணம் அறிவித்துள்ளனர்.
எச்சரிக்கை:
குளிர்காலம் தொடங்கிவிட்டாலே வட இந்தியாவில் பனிமூட்டம் (Fog) ஒரு பெரிய பிரச்சனையாக உருவெடுக்கும். நெடுஞ்சாலையில் செல்லும்போது முகப்பு விளக்குகளை (Fog lights) ஒளிர விடுவதும், மிதமான வேகத்தில் செல்வதுமே இது போன்ற விபத்துகளைத் தவிர்க்கும் ஒரே வழி.
13 உயிர்கள் போன பிறகு விழித்துக்கொள்வதை விட, விபத்து நடக்கும் முன்பே விழிப்போடு இருப்பது அவசியம்!