நீங்கள் செல்ல வேண்டிய இணைப்பு விமானத்தை நீங்கள் தவற விட்டுவிட்டால் கவலை வேண்டாம். நீங்கள் இப்படிச் செய்தால் பிரச்சினையை மிக எளிதாக சமாளிக்கலாம்.
அடிக்கடி விமானப் பயணம் செய்பவர்கள் இந்தப் பிரச்சினையை சந்தித்திருப்பார்கள். தூரமாக ஒரு இடத்துக்கோ அல்லது வெளிநாட்டுக்கோ செல்வதற்கு நேரடி விமானம் இல்லாமல் மற்றொரு விமானத்தில் மாறிச் செல்வார்கள். இந்த இணைப்பு விமானத்தைத் தவறவிடுவது பயணிகளுக்கு மிகுந்த மன அழுத்தத்தை ஏற்படுத்தும். ஒருவேளை நீங்கள் உங்களுடைய இணைப்பு விமானத்தை தவறவிட்டால் கவலைப்படத் தேவையில்லை. சரியான நேரத்தில் சரியான நடவடிக்கைகளை எடுத்தால், உங்கள் பயணத்தை மீண்டும் சீராக்குவது மட்டுமல்லாமல், கூடுதல் செலவுகளையும் சிரமங்களையும் தவிர்க்கலாம்.
இணைப்பு விமானத்தைத் தவறவிட்ட உடனேயே நீங்கள் என்ன செய்ய வேண்டும், இந்தச் சூழ்நிலையை உங்களுக்குச் சாதகமாக எப்படி மாற்றுவது என்று இங்கே பார்க்கலாம்.
இணைப்பு விமானத்தைத் தவறவிட்டதும் என்ன செய்ய வேண்டும்?
முதலில் அமைதியாக இருக்க வேண்டும். இது எரிச்சலூட்டும் என்றாலும், பதற்றப்படுவதால் எந்தப் பிரச்சனையும் தீராது. ஏன் விமானத்தைத் தவறவிட்டீர்கள் என்பதைப் புரிந்துகொள்ள முயற்சி செய்யுங்கள். முந்தைய விமானம் தாமதமாக வந்ததா, அல்லது விமான நிலையத்திற்குள் சரியான நேரத்தில் செல்ல முடியவில்லையா? இந்தத் தகவல், விமான ஊழியர்களுக்கு உங்கள் சூழ்நிலையை விளக்கிக் கூறவும், ஒரு தீர்வைக் கண்டறியவும் உதவும்.
உங்கள் விமானத்தைத் தவறவிட்டதை உணர்ந்த உடனேயே, தாமதிக்காமல் உங்கள் விமான நிறுவனத்தின் வாடிக்கையாளர் சேவை அல்லது உதவி மையத்தைத் தொடர்பு கொள்ளுங்கள். நீங்கள் எவ்வளவு சீக்கிரம் அங்கு செல்கிறீர்களோ, அவ்வளவு சீக்கிரம் அடுத்த விமானத்தில் இடம் கிடைப்பதற்கோ அல்லது மாற்று ஏற்பாடுகளைச் செய்வதற்கோ வாய்ப்புகள் அதிகம். அங்கே நீண்ட வரிசைகள் இருக்கலாம். எனவே உங்கள் முறை (turn) வரும்போது பொறுமையாக இருக்க வேண்டும்.
விமான ஊழியர்களிடம் பேசும்போது, அவர்களின் பயணிகளுக்கான கொள்கைகள் மற்றும் கிடைக்கும் வாய்ப்புகள் குறித்துத் தெளிவாகக் கேளுங்கள். அடுத்த விமானத்தில் இலவசமாக இடம் ஒதுக்க முடியுமா என்று விசாரியுங்கள். விமானத்தின் தவறு காரணமாக (முந்தைய விமான தாமதம் போன்றவை) உங்களுக்கு ஏற்பட்ட இழப்புகளுக்கு இழப்பீடு பெற உங்களுக்கு உரிமை உள்ளதா என்பதைக் கண்டறியுங்கள். விமான நிறுவனம் தவறவிட்ட இணைப்பு விமானங்களுக்கான கொள்கையைப் புரிந்துகொள்வது உங்கள் நேரத்தையும் பணத்தையும் மிச்சப்படுத்தும்.
சிறந்த மற்றும் விரைவான தீர்வைக் கண்டறிய விமான நிறுவனத்துடன் இணைந்து செயல்படுங்கள். அடுத்த விமானத்தில் இடம் ஒதுக்க முடியுமா, வேறு பாதையில் செல்ல முடியுமா, அல்லது வேறு விமான நிறுவனத்தில் செல்ல முடியுமா என்று கேளுங்கள். உங்களுக்கு அருகில் வேறு விமான நிலையம் இருந்து, அது உங்களை விரைவாக உங்கள் இலக்கை அடைய வைக்கும் என்றால், அந்த மாற்று விமான நிலையத்தைப் பயன்படுத்தவோ அல்லது வேறு போக்குவரத்து முறைகளைப் பயன்படுத்தவோ பரிசீலிக்கலாம்.
ஒருவேளை விமான நிலையத்தில் இரவு தங்க வேண்டியிருந்தால் அல்லது நீண்ட நேரம் காத்திருக்க வேண்டியிருந்தால், விமான நிறுவனத்திடம் ஹோட்டல் தங்குமிடம் மற்றும் உணவு கூப்பன்கள் குறித்துக் கேளுங்கள். விமான நிறுவனத்தின் தவறு காரணமாக தாமதம் ஏற்பட்டிருருந்தால், அவர்கள் பொதுவாக இந்தச் செலவுகளை ஏற்றுக்கொள்வார்கள். எந்தெந்தச் செலவுகள் ஏற்கப்படும், பணத்தைத் திரும்பப் பெற என்னென்ன ஆவணங்கள் (பில்கள் போன்றவை) வைத்திருக்க வேண்டும் என்று கேளுங்கள்.
எதிர்காலத்தில் எந்தப் பிரச்சனையும் வராமல் இருக்க, நீங்கள் பேசிய ஒவ்வொரு உரையாடல் மற்றும் செய்த செலவு பற்றிய பதிவுகளை வைத்திருப்பது முக்கியம். நீங்கள் எந்த விமான ஊழியரிடம் பேசினீர்கள் (பெயர், பதவி), எந்த நேரத்தில் பேசினீர்கள், என்ன தீர்வு வழங்கப்பட்டது என்பதைக் குறித்துக் கொள்ளுங்கள். உங்கள் அசல் டிக்கெட், போர்டிங் பாஸ், மற்றும் எந்தப் புதிய டிக்கெட் அல்லது செலவு பில்களின் புகைப்படங்கள் அல்லது ஸ்கிரீன் ஷாட்களை வைத்திருங்கள்.
இணைப்பு விமானத்தைத் தவறவிட்டதற்கு நீங்கள் இழப்பீடு பெறலாம். ஆனால், இது பல காரணிகளைப் பொறுத்தது. விமான நிறுவனத்தின் தவறு காரணமாக (தொழில்நுட்பக் கோளாறுகள், ஊழியர் பற்றாக்குறை) விமானம் தவறவிடப்பட்டால், இழப்பீடு பெறுவதற்கான வாய்ப்புகள் அதிகம். இது விமான நிறுவனத்தின் சொந்தக் கொள்கை மற்றும் நீங்கள் பயணிக்கும் நாடு அல்லது பிராந்தியத்தின் பயணிகளுக்கான பாதுகாப்புச் சட்டங்களைப் பொறுத்தது. நீங்கள் இழப்பீடு பெறத் தகுதியுள்ளவரா என்று விமான நிறுவனத்திடம் நேரடியாகக் கேளுங்கள். அப்படி வாய்ப்பு இருந்தால் தேவையான ஆவணங்களுடன் உங்கள் கோரிக்கையைச் சமர்ப்பிக்கலாம்.
இந்தப் படிகளைப் பின்பற்றினால் இணைப்பு விமானத்தைத் தவறவிட்டாலும், உங்கள் பயணத்தை எளிதாகத் தொடரலாம்.