“என் பையனை பெரிய இன்டர்நேஷனல் ஸ்கூல்ல படிக்க வைக்கணும்… ஆனா கையில காசு இல்லையே” என்று கவலைப்படும் பெற்றோரா நீங்கள்? அந்தக் கவலையைத் தூக்கி ஓரம் கட்டுங்கள். கார்ப்பரேட் பள்ளிகளுக்கே டஃப் கொடுக்கும் வகையில் செயல்பட்டு வரும் தமிழக அரசின் ‘மாதிரி பள்ளிகளில்’ (Model Schools) சேர்வதற்கான அறிவிப்பு வெளியாகியுள்ளது.
2026-27 கல்வி ஆண்டிற்கான மாணவர் சேர்க்கை வழிகாட்டு நெறிமுறைகளைப் பள்ளிக் கல்வித்துறை தற்போது வெளியிட்டுள்ளது. “யாருக்கெல்லாம் சீட் கிடைக்கும்? எப்படிச் சேர்வது?” என்பதற்கான முழு விவரம் இதோ.
யாருக்கு அட்மிஷன்? தற்போது அரசுப் பள்ளிகளில் 8ஆம் வகுப்பு படித்துக் கொண்டிருக்கும் மாணவர்கள், வரும் கல்வி ஆண்டில் (2026-27) 9ஆம் வகுப்பில் மாதிரி பள்ளிகளில் சேர விண்ணப்பிக்கலாம். தமிழகம் முழுவதும் உள்ள 44 மாதிரி பள்ளிகளில் (மாவட்டத்திற்கு ஒன்று வீதம்) இந்தச் சேர்க்கை நடைபெறும்.
செலக்ஷன் முறை எப்படி? “சும்மா அப்ளிகேஷன் போட்டா சீட் கிடைக்குமா?” என்றால், “இல்லை” என்கிறது கல்வித்துறை. இதற்கென ஒரு ‘அடிப்படைத் திறனாய்வுத் தேர்வு’ (Baseline Assessment Test) நடத்தப்படும்.
- தேர்வு: வரும் மார்ச் மாதத்தில் இந்தத் தேர்வு நடைபெறவுள்ளது. கணிதம், அறிவியல் மற்றும் மொழிப்பாடங்களில் இருந்து கேள்விகள் கேட்கப்படும்.
- மதிப்பெண்: தேர்வில் மாணவர்கள் எடுக்கும் மதிப்பெண்கள் அடிப்படையில் மாநில அளவில் தரவரிசைப் பட்டியல் (Merit List) தயார் செய்யப்படும்.
- இடஒதுக்கீடு: அரசுப் பள்ளி மாணவர்களுக்கான இடஒதுக்கீடு மற்றும் 69% இடஒதுக்கீடு முறை பின்பற்றப்பட்டு சீட் வழங்கப்படும்.
ஏன் மாதிரி பள்ளியில் சேரணும்?
- இலவசப் பயிற்சி: நீட் (NEET), ஜெஇஇ (JEE), கிளாட் (CLAT) போன்ற தேசிய அளவிலான போட்டித் தேர்வுகளுக்குத் தலைசிறந்த வல்லுநர்களைக் கொண்டு இலவசப் பயிற்சி அளிக்கப்படுகிறது.
- ஹை-டெக் வசதி: ஸ்மார்ட் வகுப்பறைகள், ஆய்வகங்கள் மற்றும் கணினி வசதிகள் தனியார் பள்ளிகளை விடத் தரமாக இருக்கும்.
- தங்கும் விடுதி: வெளியூர் மாணவர்களுக்குப் பாதுகாப்பான தங்கும் விடுதி மற்றும் சத்தான உணவு முற்றிலும் இலவசம்.
பெற்றோர்களே… உங்க பிள்ளை படிப்புல சுட்டியா? ஸ்போர்ட்ஸ், கலைனு எல்லாத்துலயும் ஆர்வம் இருக்கா? அப்போ யோசிக்காம மாதிரி பள்ளிக்கு முயற்சி பண்ணுங்க. கடந்த வருஷங்கள்ல இங்க படிச்ச பசங்கதான் இன்னைக்கு ஐஐடி, மெடிக்கல் காலேஜ்ல கெத்தா வலம் வர்றாங்க. உடனே உங்க பையன்/பொண்ணு படிக்கிற ஸ்கூல் ஹெச்.எம் (HM) கிட்ட இது பத்தி விசாரிங்க. நுழைவுத் தேர்வுக்கு இப்பவே பழைய பாடங்களை ஒருவாட்டி புரட்டிப் பார்க்கச் சொல்லுங்க. இது ஒரு ‘லைஃப் சேஞ்சிங்’ வாய்ப்பு, மிஸ் பண்ணிடாதீங்க!