மும்பையை மையமாக கொண்டு, 13 முக்கிய பொறுப்புகளுக்கான வேலைவாய்ப்பு அறிவிப்புகளை டெஸ்லா நிறுவனம் வெளியிட்டுள்ளது. சமூக வலைதளமான லிங்க்டின் (LinkedIn) தளத்தில் இந்த அறிவிப்பு இடம் பெற்றுள்ளதால், தொழில்நுட்பத்துறையில் ஆர்வமுள்ள பலர் இதை கவனித்து வருகின்றனர். tesla cars coming india
எந்தெந்த பணிகளுக்கு ஆட்கள் தேவை?
விற்பனை ஆலோசகர், நுகர்வோர் ஆதரவு நிபுணர், சேவை மேலாளர், வணிக செயல்பாடு ஆய்வாளர், கடை மேலாளர், உதிரிபாக ஆலோசகர், வாடிக்கையாளர் மேற்பார்வையாளர் உள்ளிட்ட பல்வேறு பதவிகளுக்கான வேலை வாய்ப்புகள் இதில் இடம்பெற்றுள்ளன. இதன் மூலம் இந்தியாவில் டெஸ்லா தனது விற்பனை மற்றும் சேவை மையங்களை விரிவுபடுத்த திட்டமிட்டிருக்கலாம் என எதிர்பார்க்கப்படுகிறது.
டெஸ்லாவின் இந்திய முயற்சிகள் – பின்னணி!
டெஸ்லா நிறுவனம் இந்திய சந்தையில் தனது தயாரிப்புகளை அறிமுகப்படுத்த தீவிரமாக முயற்சி செய்து வந்தது. ஆனால், மத்திய அரசின் அதிக இறக்குமதி வரி காரணமாக அதற்கு தடைகள் ஏற்பட்டன.
இந்தத் திட்டத்தை தொடர்ந்து முன்னேற்றம் செய்ய அண்மையில் தாக்கல் செய்யப்பட்ட மத்திய பட்ஜெட்டில், வெளிநாடுகளில் இருந்து இறக்குமதி செய்யப்படும் மின்சார வாகனங்களுக்கான வரிகளை குறைக்கும் நடவடிக்கைகள் எடுக்கப்பட்டன. இது டெஸ்லா போன்ற நிறுவனங்களுக்கு மிகப்பெரிய ஆதரவாக அமைந்திருக்கலாம்.
மோடி – எலான் மஸ்க் சந்திப்பு: புதிய ஒத்துழைப்பு?
இந்த வேலைவாய்ப்பு அறிவிப்பின் பின்னணி என்ன? பிரதமர் நரேந்திர மோடி, அமெரிக்கா சென்ற போது டெஸ்லா நிறுவனத் தலைவர் எலான் மஸ்கை சந்தித்து பேசினார். இந்த சந்திப்பில் தொழில்நுட்பம், செயற்கை நுண்ணறிவு, எரிசக்தி, மின்சார வாகன உற்பத்தி உள்ளிட்ட பல முக்கிய அம்சங்கள் குறித்து விவாதிக்கப்பட்டன. இந்தச் சந்திப்பின் தாக்கமாகவே தற்போது இந்தியாவில் டெஸ்லா தனது வேலைவாய்ப்பு அறிவிப்புகளை வெளியிட்டிருக்கலாம் என்று கூறப்படுகிறது.
இந்திய சந்தையில் மின்சார வாகன வருகை!
மின்சார வாகன சந்தை இந்தியாவில் வளர்ச்சி அடையத் தொடங்கியுள்ள நிலையில், டெஸ்லா போன்ற உலகளாவிய நிறுவனங்களின் வருகை தொழில்துறை வளர்ச்சிக்கும், சுற்றுச்சூழல் நலனுக்கும் சாதகமாக அமையலாம். இதோடு, ஸ்டார்லிங்க் இணைய சேவையை இந்தியாவில் விரிவுபடுத்தவும் எலான் மஸ்க் திட்டமிட்டுள்ளதாக தகவல்கள் தெரிவிக்கின்றன. இதனால் எதிர்காலத்தில் இந்தியாவில் டெஸ்லாவின் பயன்பாடு மிகுந்த ஒரு வளர்ச்சியை அடைய வாய்ப்புள்ளது.
இந்த வேலைவாய்ப்பு அறிவிப்பு, இந்திய சந்தையில் டெஸ்லாவின் உறுதிப்பாட்டை வெளிப்படுத்துகிறதா? எதிர்கால வளர்ச்சியின் தன்மையை மதிப்பீடு செய்யும் முக்கியமான விவகாரமாக இது விளங்கும். tesla cars coming india