தமிழ்நாடு அரசு போக்குவரத்து கழகத்தில் காலியாக உள்ள 2877 பணியிடங்களை நிரப்ப அரசாணை வெளியிட்டுள்ளது.
இது தொடர்பாக போக்குவரத்து துறைச் செயலாளர் பனீந்திர ரெட்டி வெளியிட்டுள்ள அரசாணையில் “கடந்த ஆண்டு பிப்ரவரி மாதம் கும்பகோணம் போக்குவரத்து கழகத்திற்கு 122 ஓட்டுநர்கள், அரசு விரைவு போக்குவரத்து கழகத்திற்கு 685 ஓட்டுநர்கள் மற்றும் நடத்துனர் பணியிடங்களை நிரப்பவும், அதேபோல கடந்த ஜூலை மாதம் மதுரை, கும்பகோணம், சேலம், கோவை, நெல்லை, ஆகிய 5 கோட்டங்களில் 812 ஓட்டுநர்கள் மற்றும் நடத்துனர் பணியிடங்களை நிரப்பவும் ஆணை வழங்கப்பட்டது.
இந்த நிலையில் அரசின் மகளிர் விடியல் பயணம், கிராம பகுதிகளுக்கு இயக்கப்படும் பேருந்துகளை சீராக வைக்கவும், வருவாய் இழப்பை தடுக்கவும் போக்குவரத்து கழகங்களில் காலிப்பணியிடங்களை நிரப்புவது முக்கியத்துவம் வாய்ந்தது என போக்குவரத்து துறை சிறப்பு அலுவலர் தெரிவித்துள்ளார்.
அந்த வகையில் வரும் 2025ம் ஆண்டு ஜனவரி 1ம் தேதி நிலவரப்படி போக்குவரத்து கழகங்களில் ஏற்படும் காலிப்பணியிடங்கள் சிறப்பு அலுவலரால் கணக்கிடப்பட்டுள்ளது.
அதன்படி மொத்தமாக 8 போக்குவரத்து கழகங்களில் 12,437 காலிப் பணியிடங்கள் உள்ளன. அதில் 25 சதவீதம் பணியிடங்களை நிரப்ப வேண்டும் என சிறப்பு அலுவலர் வலியுறுத்தியுள்ளார்.
ஓட்டுநர், நடத்துனர் பணிகளை இணைந்து மேற்கொள்ளும் 2,340 ஓட்டுநர்கள் மற்றும் நடத்துனர் பணியாளர்கள் மற்றும் 537 தொழில்நுட்ப பணியாளர்களுக்கான காலி பணியிடங்களை நிரப்ப தமிழ்நாடு அரசு உத்தரவிட்டுள்ளது.
இதில் 307 ஓட்டுநர்கள் மற்றும் நடத்துனர் மற்றும் 462 தொழில்நுட்ப பணியாளர்கள் என மொத்தம் 769 காலியிடங்கள் பட்டியலின மற்றும் பழங்குடியின பிரிவினர்களுக்கு ஒதுக்கீடு செய்யப்பட்டுள்ளது. மீதமுள்ள 2,108 பணியிடங்கள் மற்ற பிரிவினர்களுக்கு ஒதுக்கீடு செய்யப்பட்டுள்ளது.
மாநகர போக்குவரத்து கழகத்தில் 454, அரசு விரைவு போக்குவரத்து கழகத்தில் 382, விழுப்புரம் போக்குவரத்து கழகம் 322, சேலம் போக்குவரத்து கழகம் 303, கோவை போக்குவரத்து கழகம் 388, கும்பகோணம் போக்குவரத்து கழகம் 561, மதுரை போக்குவரத்து கழகம் 223, நெல்லை போக்குவரத்து கழகம் 244 பணியிடங்கள் என மொத்தம் 2,877 பணியிடங்கள் நிரப்ப அரசு அனுமதி வழங்கியுள்ளது” என்று குறிப்பிடப்பட்டுள்ளது.
–அப்துல் ரஹ்மான்
செய்திகளை உடனுக்குடன் பெற மின்னம்பலம் வாட்ஸப் சேனலில் இணையுங்கள்….
களைகட்டும் தீபாவளி பண்டிகை : தலைவர்கள் வாழ்த்து!
தமிழக அரசின் ‘கபீர் புரஸ்கார் விருது’க்கு விண்ணப்பிக்கலாம்!
ஹெல்த் டிப்ஸ்: தயிர், மோர்… எதை அதிகம் உணவில் சேர்த்துக்கொள்வது நல்லது?
