குழந்தையின் பாலினத்தை அறிவித்த இர்ஃபான்: சுகாதாரத்துறை விளக்கம்!

யூடியூபர் இர்ஃபான் தனக்கு பிறக்கப்போகும் குழந்தையின் பாலினத்தை அறிவிக்கும் வீடியோவை நேற்று (மே 20) யூடியூபில் வெளியிட்டார்.

இந்த வீடியோவிற்கு பலத்த எதிர்ப்பு கிளம்பியது. மேலும், பாலின தேர்வு தடைச் சட்டத்தின் கீழ் இர்ஃபான் மீது நடவடிக்கை எடுக்க வேண்டும் என்று பலரும் சமூக வலைதளங்களில் கருத்து பதிவிட்டு வந்தனர். இதுதொடர்பாக தமிழக சுகாதாரத்துறை சார்பில் இர்ஃபானுக்கு நோட்டீஸ் அனுப்பப்பட்டுள்ளது.

இதுகுறித்து விளக்கமளித்துள்ள தமிழக சுகாதாரத்துறை, “வலைஒளியாளர் (You tuber) இர்ஃபான் என்பவர் தான் துபாய் சென்ற போது தனது மனைவியின் கருவில் உள்ள சிசுவின் பாலினத்தை (பெண்) என்று ஸ்கேன் பரிசோதனை செய்து தெரிந்து கொண்டதாகவும் அதனை குடும்ப நிகழ்ச்சி ஒன்றின் போது அங்கு குழுமியிருந்தவர்களிடம் தெரிவித்துள்ளார்.

அந்த நிகழ்வினை ஒளிப்படமாக எடுத்து 19.05.2024 அன்று தனது You tube Channal-ன் மூலம் வெளியிட்டுள்ளார். அதனை இதுவரை பல பார்வையாளர்கள் உலகம் முழுவதும் பார்த்தும் பகிர்ந்தும் உள்ளனர்.

மேலும், இந்தியாவில் சிசுவின் பாலினம் அறிவதும் அறிவிப்பதும் பாலின தேர்வை தடை செய்தல் சட்டம் 1994 (PCPNDT ACT 1994) (Central Act 57 of 1994) ன் படி தடை செய்யப்பட்டுள்ளது.

இத்தகைய செயலால், தமிழ்நாடு மட்டுமல்லாமல் அகில இந்திய அளவில் பெண் குழந்தைகளின் பிறப்பு விகிதம் குறையும்.

மேலும், பெண்களுக்கு எதிரான குற்றங்கள் அதிகமாகும் வாய்ப்புள்ளது. எனவே, இதுபோன்ற செயலில் ஈடுபடும் நபர்களின் மீது சட்டப்பூர்வமான நடவடிக்கை எடுக்கும் பொருட்டு, மாநில அமலாக்க அலுவலர், (PCPNDT ACT 1994) மற்றும் இயக்குநர், மருத்துவம் மற்றும் ஊரக நலப்பணிகள் அவர்களால் இர்பானுக்கு இன்று (மே 21) பாலினத் தேர்வை தடை செய்தல் சட்ட விதிகளை மீறியதற்காக குறிப்பானை சார்பு செய்யப்பட்டுள்ளது.

மேலும், இர்ஃபான் வலையொளி செய்யப்பட்ட ஒளிப்படத்தினை சமூக வலைதளங்களிலிருந்து உடனடியாக நீக்கிட வலையொளி தளத்திற்கும், கணிணி குற்றம் (Cyber Crime)பிரிவிற்கும் இன்று கடிதம் மூலம் அறிவுறுத்தப்பட்டுள்ளது.

கருவின் பாலினம் அறிவதும் அறிவிக்கும் செயலில் ஈடுபடும் நபர்கள்  ஸ்கேன் சென்ட்டர்கள், மருத்துவமனைகள் மீது இந்த அரசு கடுமையான சட்ட நடவடிக்கை மேற்கொள்ளும் என்பதை இதன் மூலம் தெரிவித்துக் கொள்ளப்படுகிறது” என்று தமிழக சுகாதாரத்துறை தெரிவித்துள்ளது.

செல்வம்

செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்…

மீண்டும் “மக்களுடன் முதல்வர்” திட்டம்: சிறப்பு முகாம் எப்போது?

கருவில் இருக்கும் குழந்தையின் பாலினம்… வீடியோவை நீக்கிய இர்ஃபான்!