தீபாவளியை முன்னிட்டு நிறைய ஸ்வீட்ஸ் சாப்பிட்டு பழக்கப்பட்டவர்களுக்கு இன்றைக்கும் ஏதாவது ஸ்வீட்ஸ் சாப்பிட்டால் நன்றாக இருக்குமே என்று தோன்றும். இந்த நிலையில் இந்த எளிதாகச் செய்யக்கூடிய இந்த ரவா மில்க் ஸ்வீட் செய்து சாப்பிடலாம். இதை ஃப்ரிட்ஜில் வைத்து ஒரு வாரம் வரை பயன்படுத்தலாம்.
என்ன தேவை?
வெள்ளை ரவை – ஒரு கப்
நெய் – ஒரு கப்
சர்க்கரை – 2 கப்
பால் – 3 கப்
ரோஸ் எசென்ஸ் – 10 சொட்டு
சாரைப்பருப்பு, பிஸ்தா, முந்திரி – தேவையான அளவு
இனிப்பில்லாத கோவா – 50 கிராம்
எப்படிச் செய்வது?
பிஸ்தா, முந்திரியைப் பொடியாக நறுக்கி, சிறிதளவு நெய்யில் வறுத்து வைக்கவும். சாரைப்பருப்பை 20 நிமிடங்கள் ஊறவிட்டு, நீரை வடித்து, சிறிதளவு நெய்யில் வறுத்து வைக்கவும். ரவையை லேசாக வறுக்கவும். பிறகு ஒரு பாத்திரத்தில் ரவை, சர்க்கரை, பால், நெய் சேர்த்து ஒரு கரண்டியால் நன்கு கரைக்கவும்.
அடிகனமான பாத்திரத்தை அடுப்பிலேற்றி கரைத்த ரவைக் கலவையைச் சேர்த்துக் கைவிடாமல் கிளறவும். பிறகு தீயைக் குறைத்து, சிறு தீயில் நன்கு கிளறிக்கொண்டே கோவா சேர்க்கவும். 15 நிமிடங்களில் நெய் பிரிந்து வரும் பக்குவத்தில் ரோஸ் எசென்ஸ், சாரைப்பருப்பு, பிஸ்தா, முந்திரி தூவி அடுப்பை அணைக்கவும்.
பின்னர் மூடி போட்டு அந்தப் பாத்திரத்திலேயே ஒரு மணி நேரம் வைத்திருந்து நெய் தடவிய ட்ரேயில் பரப்பி, விருப்பப்பட்ட வடிவில் கட் செய்து துண்டுகளாக்கவும். வித்தியாசமான ரவா ஸ்வீட் ரெடி.
குறிப்பு: அரை கிலோ ரவைக்கு 100 கிராம் கோவா போதுமானது. நெய்யுடன் எண்ணெய் கலந்தும் செய்யலாம்.
