மூன்று வகையான மருத்துவ படிப்பு தரவரிசை பட்டியல் வெளியீடு!

தமிழ்நாட்டில் உள்ள எம்.பி.பி.எஸ், பி.டி.எஸ் படிப்பில் சேர்வதற்கான தரவரிசை பட்டியலை மக்கள் நல்வாழ்வுத்துறை அமைச்சர் மா.சுப்பிரமணியன் இன்று (ஜூலை 16) வெளியிட்டார்.

தமிழ்நாட்டில் அரசு மருத்துவக் கல்லூரிகளில் 5,050 எம்பிபிஎஸ் இடங்களும், 200 பிடிஎஸ் இடங்களும், 150 இஎஸ்ஐ இடங்களும் உள்ளன. இளநிலை மருத்துவ படிப்புகளுக்காகன அகில இந்திய கவுன்சிலிங் 20ம் தேதி தொடங்குகிறது.

எனவே இங்குள்ள எம்.பி.பி.எஸ், பி.டி.எஸ் ஆகிய இளநிலை மருத்துவப் படிப்பில் சேர்வதற்கு 2023 – 2024ஆம் ஆண்டில் 40,193 மாணவர்கள் விண்ணப்பம் செய்துள்ளனர்.

3 வகையான தரவரிசை பட்டியல்

இந்த நிலையில், இந்தப் படிப்புகளில் சேர்வதற்கான தரவரிசை பட்டியலை சென்னை கிண்டியில் இன்று காலை மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன் வெளியிட்டார்.

நீட் மதிப்பெண்களின் அடிப்படையில், அரசு ஒதுக்கீடு, நிர்வாக பிரிவு ஒதுக்கீடு, அரசுப் பள்ளி மாணவர்களுக்கான 7.5% உள் ஒதுக்கீடு என 3 வகையான தரவரிசை பட்டியல் வெளியிடப்பட்டுள்ளது.

சேலம் மாணவி முதலிடம்

இதில் அரசுப்பள்ளி மாணவர்களுக்கான 7.5% உள் ஒதுக்கீட்டில் சேலம் மாவட்டத்தை சேர்ந்த மாணவி கிருத்திகா 569 மதிப்பெண்கள் (அரசு பெண்கள் மேல்நிலைப்பள்ளி சேலம்) பெற்று தரவரிசை பட்டியலில் முதலிடம் பிடித்துள்ளார்.

அவரை தொடர்ந்து தர்மபுரி மாவட்டத்தை சேர்ந்த பச்சையப்பன் 565 மதிப்பெண்களுடன் (அரசு மேல்நிலைப்பள்ளி மங்கரை, தருமபுரி) 2-ம் இடம் பிடித்துள்ளார். காஞ்சிபுரம் மாவட்டத்தை சேர்ந்த மாணவன் முருகன் 565 மதிப்பெண்களுடன் (அரசு ஆதி திராவிடர் நலத்துறை மேல்நிலைப்பள்ளி மௌல்வாக்கம்) 3ஆம் இடம் பிடித்துள்ளார்.

7.5% உள் ஒதுக்கீட்டில் எம்.பி.பி.எஸ், பி.டி.எஸ் படிப்பில் சேர 2,662 மாணவர்கள் விண்ணப்பித்துள்ள நிலையில், 606 இடங்கள் வழங்கப்பட்டுள்ளன.

அரசு ஒதுக்கீட்டு தரவரிசை பட்டியலில், விழுப்புரம் மாவட்டத்தை சேர்ந்த மாணவன் பிரபஞ்சன் நீட் தேர்வில் 720 மதிப்பெண்கள் பெற்று முதலிடத்தை பிடித்துள்ளார்.

அவரைத் தொடர்ந்து சென்னை மாவட்டத்தைச் சேர்ந்த சூர்ய சித்தார்த், சேலம் மாவட்டத்தைச் சேர்ந்த வருண் ஆகியோர் தரவரிசை பட்டியலில் அடுத்த 2 இடங்களை பிடித்துள்ளனர்.

ஜூலை 25ல் தொடங்க வாய்ப்பு!

தரவரிசை பட்டியலை வெளியிட்ட பின் அமைச்சர் மா.சுப்பிரமணியன் பேசுகையில், “அகில இந்திய ஒதுக்கீட்டிற்கான முதல் சுற்று கலந்தாய்வை மருத்துவ மாணவர் சேர்க்கைக்குழு ஜூலை 20ம் தேதி தொடங்க உள்ளதாக கூறப்பட்டுள்ளது.

அது உறுதி செய்யப்படும் பட்சத்தில் தமிழ்நாட்டில் மருத்துவ படிப்புகளுக்கான கலந்தாய்வு ஜூலை 25ஆம் தேதி தொடங்கப்படும்” என்று அவர் தெரிவித்துள்ளார்.

கிறிஸ்டோபர் ஜெமா

24 மணி நேரம் டூ 24 ஆண்டுகள்… சுயம்வரம்: தமிழ் சினிமாவின் சாதனை படம்!

யுவன் இசை நிகழ்ச்சி: தெறிக்கவிட்ட சிம்பு… VIBE செய்த ரசிகர்கள்!