இலங்கை அணிக்கு எதிரான தொடரில் விளையாடும் இந்திய கிரிக்கெட் அணி வீரர்களின் விவரங்களை பிசிசிஐ அறிவித்துள்ளது.
அதன்படி, சமீபத்தில் நடந்த வங்கதேசத்திற்கு எதிரான தொடரில் கட்டை விரலில் ஏற்பட்ட காயம் காரணமாக விளையாடாமல் இருந்த இந்திய அணி கேப்டன் ரோகித் சர்மா காயத்தில் இருந்து மீண்டு வந்து அணியை வழிநடத்த உள்ளார். எனினும், ரோகித் சர்மா ஒருநாள் போட்டித் தொடருக்கே கேப்டனாக அறிவிக்கப்பட்டுள்ளார்.
இதனிடையே, ஒருநாள் தொடருக்கு கேப்டன் பொறுப்பேற்றுள்ள ரோகித் சர்மா டி20 தொடரில் இடம்பெறவில்லை. மாறாக, ஆல்ரவுண்டர் ஹர்திக் பாண்டியா மீண்டும் அணியை வழிநடத்துவார் என்று தெரிவிக்கப்பட்டுள்ளது.
இலங்கை கிரிக்கெட் அணி இந்தியாவில் சுற்றுப்பயணம் மேற்கொண்டு மூன்று 20 ஓவர் மற்றும் 3 ஒரு நாள் போட்டிகளில் விளையாட உள்ளது.
மும்பை வான்கடே மைதானத்தில் இந்தியா மற்றும் இலங்கை அணிகள் மோதும் முதலாவது டி 20 போட்டி ஜனவரி 3 ஆம் தேதியும், 2-வது ஆட்டம் புனேவில் ஜனவரி 5 ஆம் தேதியும், 3-வது ஆட்டம் ஜனவரி 7 ஆம் தேதியும், அதைத் தொடர்ந்து ஒரு நாள் போட்டிகள் ஜனவரி 10, 12, மற்றும் 15 ஆம் தேதிகளில் நடத்தப்படுகிறது.
இந்நிலையில், இலங்கைக்கு எதிரான கிரிக்கெட் தொடரில் விளையாடும் இந்திய அணி வீரர்களின் பட்டியல் நேற்று (டிசம்பர் 27 ) பிசிசிஐ அறிவித்துள்ளது.
இதில் டி20 போட்டிக்கான இந்திய அணியில் கேப்டன் ரோகித் சர்மா, முன்னாள் கேப்டன் விராட் கோலி, லோகேஷ் ராகுல் ஆகியோருக்கு ஓய்வு அளிக்கப்பட்டுள்ளது. ஆல்-ரவுண்டர் ஹர்திக் பாண்டியா கேப்டனாகவும், சூர்யகுமார் யாதவ் துணை கேப்டனாகவும் நியமிக்கப்பட்டு உள்ளனர். அத்துடன் ஐ.பி.எல். ஏலத்தில் கோடிகளில் விலை போன இளம் வேகப்பந்து வீச்சாளர்கள் ஷிவம் மாவி, முகேஷ்குமார் ஆகியோர் புதுமுக வீரர்களாக களம்கான உள்ளனர். விக்கெட் கீப்பர் ரிஷப் பண்ட் நீக்கப்பட்டுள்ளார்.
அணிக்கு திரும்பும் ஷமி
இலங்கைக்கு எதிரான ஒரு நாள் தொடரில் ஆடும் இந்திய அணியை ரோகித் சர்மா வழிநடத்துகிறார். தென்னாப்பிரிக்கா மற்றும் நியூசிலாந்திற்கு எதிரான தொடரில் அணியை வழிநடத்திய தவான் மோசமான பார்ம் காரணமாக அணியில் இருந்து கழற்றிவிடப்பட்டுள்ளார். அதே சமயம் தோள்பட்டை காயத்தில் இருந்து குணமடைந்துள்ள வேகப்பந்து வீச்சாளர் முகமது ஷமி அணிக்கு திரும்புகிறார்.
இலங்கை தொடருக்கான இந்திய டி20 அணி: ஹர்திக் பாண்டியா (கேப்டன்), இஷான் கிஷன், ருதுராஜ் கெய்க்வாட், சுப்மான் கில், சூர்யகுமார் யாதவ் (துணை கேப்டன்), தீபக் ஹூடா, ராகுல் திரிபாதி, சஞ்சு சாம்சன், வாஷிங்டன் சுந்தர், யுஸ்வேந்திர சாஹல், அக்ஷர் பட்டேல், அர்ஷ்தீப்சிங், ஹர்ஷல் பட்டேல், உம்ரான் மாலிக், ஷிவம் மாவி, முகேஷ்குமார்.
இந்திய ஒரு நாள் போட்டி அணி: ரோகித் சர்மா (கேப்டன்), சுப்மான் கில், விராட் கோலி, சூர்யகுமார் யாதவ், ஸ்ரேயாஸ் அய்யர், லோகேஷ் ராகுல், இஷான் கிஷன், ஹர்திக் பாண்டியா (துணை கேப்டன்), வாஷிங்டன் சுந்தர், யுஸ்வேந்திர சாஹல், குல்தீப் யாதவ், அக்ஷர் பட்டேல், முகமது ஷமி, முகமது சிராஜ், உம்ரான் மாலிக், அர்ஷ்தீப்சிங்.
மு.வா.ஜெகதீஸ் குமார்
கிச்சன் கீர்த்தனா: கருப்பட்டி முட்டை புடிங்
டாப் 10 செய்திகள் : இதை மிஸ் பண்ணாதீங்க!
