உங்கள் வீட்டில் தொடர்ந்து துர்நாற்றம் வீசுகிறதா?.. காரணங்களும் தீர்வுகளும்..!

வீட்டில் தொடர்ந்து துர்நாற்றம் வீசுவதற்கான காரணம் என்ன, அவற்றை எப்படி சரிசெய்வது என பார்க்கலாம்.

நமது பரபரப்பான வாழ்க்கை முறையில் அலைந்து திரிந்துவிட்டு வீட்டிற்கு வந்துதான் ஆசுவாசப்படுத்துவோம். வீட்டுக்கு வந்தால்தான் நம்மால் எதைப் பற்றியும் சிந்திக்காமல் நிம்மதியாக இருக்க முடியும். அதேபோல வீடு எப்போதும் சுத்தமாக இருக்க வேண்டும் என்றே நாம் அனைவரும் விரும்புகிறோம். வீட்டில் இருந்து சற்று துர்நாற்றம் (Smell in room) வந்தால் கூட நமக்கு தொந்தரவாக இருக்கும். அது எங்கிருந்து வருகிறது என்று கூட நமக்கு தெரியாததால் என்ன செய்வது என்று தெரியாமல் இருப்போம்.

சில நேரங்களில் துர்நாற்றத்தை மறைக்க நறுமண ஸ்பிரேக்கள் அல்லது ஊதுபத்திகளை பயன்படுத்துகிறோம். ஆனால், துர்நாற்றத்தை தொடர்ந்து மறைக்க முடியவில்லை என்று நினைக்கிறீர்களா? அதற்கான முக்கிய காரணம் என்ன, எவ்வாறு துர்நாற்றத்தை விரட்டுவது என்பது குறித்து பார்ப்போம்.

சமையலறை

பல வீடுகளில் துர்நாற்றம் ஏற்பட சமையலறைகளே முக்கிய காரணமாக உள்ளன. சமைத்த பிறகு அடுப்பைச் சுற்றி மீதமுள்ள உணவு எச்சங்கள், கைகழுவும் தொட்டியில் தேங்கும் கழிவுகள், மற்றும் சரியான நேரத்தில் சுத்தம் செய்யப்படாத கழிவுநீர்க் குழாய்கள் ஆகியவை வீட்டில் துர்நாற்றத்தை (Kitchen Cleaning) ஏற்படுத்துகின்றன. தினமும் சமைத்த பிறகு சமையலறை பொருட்கள் வைத்திருக்கும் பகுதிகளையும், கைகழுவும் தொட்டியையும் சுத்தம் செய்வதன் மூலம் இந்த பிரச்சனையைப் பெருமளவில் குறைக்க முடியும்.

குப்பைக் கூடைகள்

வீட்டில் துர்நாற்றம் ஏற்படுவதற்கான இன்னொரு காரணம் குப்பைக் கூடை. பலர் குப்பைகளை (Garbage Smell Prevention) இரண்டு அல்லது மூன்று நாட்களுக்கு ஒரே இடத்தில் விட்டுவிடுகிறார்கள். குறிப்பாக, உணவுக் கழிவுகள் நீண்ட நேரம் அங்கேயே விடப்பட்டால் பாக்டீரியாக்கள் வளர்ந்து துர்நாற்றத்தை ஏற்படுத்தக்கூடும். ஆகவே, குப்பைக் கூடைகளை அடிக்கடி காலி செய்வதும், வாரத்திற்கு ஒரு முறை சுத்தம் செய்வதும் ஒரு நல்ல யோசனையாகும்.

குளியலறை

சில சமயங்களில் துர்நாற்றத்திற்குக் காரணம் அறைகளில் இருப்பதில்லை, குளியலறையிலும் கூட இருக்கலாம். அதிக ஈரப்பதம், மோசமான காற்றோட்டம் மற்றும் தண்ணீர் வடியாதது (Bathroom Odor Control) உள்ளிட்டவை காரணமாக குளியலறையில் ஏற்படும் துர்நாற்றம் வீடு முழுவதும் பரவக்கூடும். குளியலறையை ஈரப்பதம் இல்லாமல் உலர்த்துவது மற்றும் காற்றை வெளியேற்றும் விசிறியைப் பயன்படுத்துவது போன்ற நடைமுறைகள் துர்நாற்றத்தை அகற்ற உதவும்.

குளிர்சாதன பெட்டி

குளிர்சாதனப் பெட்டியில் வைக்கப்படும் அழுகிய உணவும் (Fridge Bad Smell) துர்நாற்றத்தை ஏற்படுத்தும். அதேபோல பழைய காய்கறிகள், காலாவதியான பொருட்கள் மற்றும் மூடப்படாமல் விடப்பட்ட உணவு போன்றவையும் குளிர்சாதனப் பெட்டியில் துர்நாற்றத்தை உண்டாக்கி, அது வீட்டின் சூழலையும் பாதிக்கக்கூடும். ஆகவே, குளிர்சாதனப் பெட்டியை அடிக்கடி சுத்தம் செய்வது அவசியம்.

ஜன்னல்கள்

நாள் முழுவதும் ஜன்னல்களை மூடி வைப்பது, காற்று வீட்டுக்குள் வருவதைத் தடுக்கிறது. இது வீட்டில் ஈரப்பதத்தையும் துர்நாற்றத்தையும் அதிகரிக்கிறது. காலையிலோ அல்லது மாலையிலோ ஜன்னல்களைத் (Windows Closed) திறந்து வைப்பது, புத்துணர்ச்சியான காற்றை உள்ளே வரவிட்டு, சூழலை மேம்படுத்த உதவும். அதேபோல வீட்டில் சோஃபாக்கள், தரைவிரிப்புகள் மற்றும் அட்டைப் பெட்டிகளிலும்கூட துர்நாற்றம் வீசக்கூடும். தூசி, ஈரப்பதம், மற்றும் வெளியிலிருந்து வரும் செல்லப்பிராணிகளின் முடி போன்ற காரணிகளால் காலப்போக்கில் இவற்றில் துர்நாற்றம் உண்டாகலாம். எனவே, அவற்றைத் தவறாமல் சுத்தம் செய்வது அவசியம்.