இன்றைய டிஜிட்டல் உலகில் வங்கி சேவைகள் மிகவும் எளிதாகிவிட்டன. ஏடிஎம் கார்டை வீட்டில் மறந்துவிட்டாலோ அல்லது அவசரமாக பணம் தேவைப்பட்டாலோ இனி கவலைப்படத் தேவையில்லை. பல ஏடிஎம்களில் இப்போது ஏடிஎம் கார்டு இல்லாமலேயே பணம் எடுக்கலாம். இதற்கு ‘கார்டுலெஸ் கேஷ் வித்ட்ராவல்’ என்று பெயர். இதை UPI செயலியைப் பயன்படுத்தி நேரடியாக ஏடிஎம்களில் இருந்து பணம் எடுக்கலாம்.
இந்த வசதி எப்போதும் ஏடிஎம் கார்டை எடுத்துச் செல்லாதவர்களுக்கும், டிஜிட்டல் பணப் பரிமாற்றத்தை விரும்புபவர்களுக்கும் மிகவும் பயனுள்ளதாக இருக்கும். ஆனால், இந்த வசதியைப் பயன்படுத்துவதற்கு முன் சில முக்கிய நிபந்தனைகளை தெரிந்து கொள்வது அவசியம்.
இந்த வசதியைப் பெற, உங்கள் வங்கி கணக்கு UPI உடன் இணைக்கப்பட்டிருக்க வேண்டும். மேலும், உங்கள் மொபைலில் Google Pay, PhonePe, Paytm, அல்லது BHIM போன்ற UPI செயலி இருக்க வேண்டும். நீங்கள் பணம் எடுக்கும் ஏடிஎம்-ல் ‘கார்டுலெஸ் கேஷ் வித்ட்ராவல்’ அல்லது ‘UPI கேஷ் வித்ட்ராவல்’ வசதி இருக்க வேண்டும். உங்கள் மொபைலில் நிலையான இணைய இணைப்பு, உங்கள் UPI பின் நம்பர் மற்றும் உங்கள் வங்கி கணக்கில் போதுமான இருப்பு ஆகியவை அவசியம்.
முதலில், கார்டுலெஸ் கேஷ் வித்ட்ராவல் வசதி உள்ள ஏடிஎம்-க்கு செல்லுங்கள். ஏடிஎம் திரையில், ‘கார்டுலெஸ் கேஷ்’, ‘UPI கேஷ் வித்ட்ராவல்’, அல்லது ‘ICCW’ என்ற விருப்பத்தைத் தேர்ந்தெடுக்கவும். சில ஏடிஎம்களில், இந்த விருப்பம் ‘Other Transactions’ என்பதன் கீழ் இருக்கலாம். அதன் பிறகு, ஏடிஎம் திரையில் ஒரு QR குறியீடு அல்லது 6 இலக்க குறியீடு தோன்றும். இப்போது, உங்கள் மொபைலில் UPI செயலியைத் திறந்து, ‘Scan QR’ அல்லது ‘Cash Withdrawal’ என்ற விருப்பத்தைத் தேர்ந்தெடுக்கவும். திரையில் காட்டப்படும் QR குறியீட்டை ஸ்கேன் செய்யவும், அல்லது குறியீடு கொடுக்கப்பட்டிருந்தால், அதே குறியீட்டை செயலியில் உள்ளிடவும்.
இப்போது, பணம் எடுக்க விரும்பும் தொகையைத் தேர்ந்தெடுத்து, எந்த வங்கி கணக்கிலிருந்து பணம் எடுக்கப்பட வேண்டும் என்பதைத் தேர்ந்தெடுக்கவும். பொதுவாக, ஏடிஎம் மற்றும் வங்கி விதிகளின்படி, ஒரு நேரத்தில் ரூ.100 முதல் ரூ.10,000 வரை எடுக்கலாம். அதன் பிறகு, உங்கள் UPI PIN நம்பரை உள்ளிட்டு பரிவர்த்தனையை உறுதிப்படுத்த வேண்டும். UPI பரிவர்த்தனை வெற்றிகரமாக முடிந்தவுடன், ஏடிஎம் உடனடியாக பணத்தை வழங்கும்.
இந்த வசதி பணப் பரிமாற்றத்தை மேலும் எளிதாக்குகிறது. இனி ஏடிஎம் கார்டு இல்லாவிட்டாலும் உங்கள் ஸ்மார்ட்போன் மூலம் எளிதாக பணம் எடுக்கலாம்.