இந்திய அணி அடுத்ததாக ஆஸ்திரேலியாவுக்கு எதிராக பார்டர் – கவாஸ்கர் கோப்பையில் விளையாட உள்ளது. பிப்ரவரி 9ஆம் தேதி துவங்கும் முதல் போட்டி நடைபெறும் நாக்பூரில் இந்திய அணி வீரர்கள் வலைபயிற்சியில் ஈடுபட்டு வருகின்றனர்.
இந்நிலையில், நேற்று (பிப்ரவரி 3 ) நடைபெற்ற பயிற்சிகளை முடித்த தமிழக வீரர் அஷ்வின் வழக்கம் போல ரசிகர்களுக்காக வீடியோ ஒன்றை வெளியிட்டுள்ளார்.
குறிப்பாக சமீபத்திய இலங்கை மற்றும் நியூசிலாந்து ஒருநாள் தொடர்களில் சிறப்பாக செயல்பட்டு ஐசிசி தரவரிசையில் நம்பர் ஒன் பந்து வீச்சாளராக முன்னேறி சாதனை படைத்துள்ள முகமது சிராஜ் பற்றி அஷ்வின் பாராட்டி பேசினார்.
கடந்த 2019ஆம் ஆண்டு ஒருநாள் போட்டிகளில் அறிமுகமான முகமது சிராஜ் ஆரம்பத்தில் ரன்களை வாரி வழங்கியதால் முதல் போட்டியுடன் கழற்றி விடப்பட்ட நிலையில் ஐபிஎல் தொடரிலும் பெங்களூரு அணியில் ரன்களை வாரி வழங்கியதால் கிண்டல்களுக்கு உள்ளானார்.
இருப்பினும் பெங்களூரு அணியில் அப்போதைய கேப்டன் விராட் கோலி தொடர்ந்து நம்பிக்கையும் ஆதரவும் கொடுத்ததை பயன்படுத்திய அவர் மனம் தளராமல் போராடி சிறப்பாக செயல்பட்டார்.
அதனால் டெஸ்ட் கிரிக்கெட்டில் அறிமுகமாகி ’காபா’ போன்ற வெற்றியில் மிகச் சிறந்த செயல்பாடுகளை வெளிப்படுத்திய அவர் 2022 பிப்ரவரி மாதம் தன்னுடைய கேரியரின் 2வது போட்டியில் விளையாடினார்.
அதிலிருந்து பெரும்பாலான போட்டிகளில் அபாரமாக செயல்பட்டதால் தரவரிசையில் முன்னேறிய அவர் நம்பர் ஒன் பந்து வீச்சாளராக சாதனை படைத்துள்ளார்.
அப்படி கிண்டல்களையும் தடைகளையும் உடைத்து சாதனை படைத்த அவரிடம் “நம்பர் ஒன் ஒருநாள் பவுலர். எப்படிடா இருக்க. எப்படி ஃபீல் பண்ற”,
என்று ஜாலியாக பாராட்டிய அஷ்வின் சிராஜை தமிழில் பேச வைக்க முயற்சித்தார். ஆனால் தமிழ் தெரியாத சிராஜ் சிரித்துக் கொண்டே நல்லபடியாக உணர்கிறேன் என்று பதிலளித்தார்.
அதைத் தொடர்ந்து பயிற்சி முடிந்து ஹோட்டலுக்கு திரும்பும் போது மீண்டும் காரில் பேட்டி எடுத்த அஷ்வின் நம்பர் ஒன் இடத்தை அடைந்ததை பற்றி எவ்வாறு உணர்கிறீர்கள் என்று இம்முறை ஹிந்தியில் கேள்வி எழுப்பினார்.
அதற்கு சிராஜ் பதிலளித்தது பின்வருமாறு. “நான் சிறப்பாக உணர்கிறேன். ஆனால் நம்பர் ஒன் பந்து வீச்சாளராக வருவேன் என்று கனவில் கூட நினைத்ததில்லை.
இந்த இடத்தை பிடித்ததில் மிகவும் நல்லபடியாக உணர்கிறேன்” என்று கூறினார்.
அப்படி இந்திய வீரர்கள் மிகவும் ஜாலியாக பேசிய இந்த வீடியோ சமூக வலைதளங்களில் வைரலாகி வருகிறது.
மு.வா.ஜெகதீஸ் குமார்
இடைத்தேர்தல்: வேட்பாளருக்கு ஒப்புதல் பெற ஈபிஎஸ் தரப்பு தீவிரம்!
இணையத்தில் வைரலாகும் சைலேந்திர பாபு விழிப்புணர்வு வீடியோ!
